نشرت فتاة سودانية على صفحة (احترس.. أمامك كشة) بموقع التواصل الاجتماعي (فيسبوك)، الصفحة التي تعتبر من أكثر الصفحات إنتشاراً ويتابعها عدد كبير من رواد موقع (فيسبوك)، تفاصيل القصة التي حدثت لها مع أحد حراس رئيس الجمهورية المشير عمر حسن أحمد البشير بمستشفى علياء التخصصي، حيث كتبت قائلاً: (تعدييييل…
شكرررا يا جماعة على دعوااتكم وكلامكم الطيب جبرتو بخاطرى ربنا يجبر خاطركم ❤️
البقول كذابة و مافى رئيس بطلع بالليل تقدر تمشي تسأل وتتأكد قبل تشارك بتعليق وهمى وتطلع نفسك بيش وسط مئات الناس ساى ومواعيد كتابتى للبوست اكيد ما حكون بتشاكل وبكتب يعنى ولا حنكون راجعين المستشفى القاعدين فيهو وبكتب فى الشارع.. بعد خلصنا ورجعنا كتبت البوست..
والناس البيسألو من الصورة عملناها الحمدلله والدكتور بجى الصباح يشوفه ان شاءالله ?
عاوزة احكى حاجة حصلت قبل شوية ما عندها علاقة بالمرور ولا العربيات وبتمنى الادمن ما يمسحو البوست لأنى مقهوورة بحق وحقيقى من الظلم البلاقيهو المواطن السودانى فى اى مكان فى البلد دى واخترت القروب دا بالذات اكتب فيهو.
أمى عيانة وراقدة فى عناية مكثفة احتاجت صورة رنين.. الصورة مافى فى المستشفى الراقدة فيهو فرسلونا مستشفى علياء ..
سقنا أمى بالاسعاف مشينا علياء وقفو الاسعاف فى المسطبة بتاعتم ديك قدام الباب و الحرس رفضو يفتحو الباب ينزلو امى للصورة ما فهمت قلت يمكن ندخل نحن نكمل الاجراءات اول على حسب لخمتى جيت انا ادخل قالو لى ماشة وين قلت ليهم عندى اجراءات صورة ل أمى الفى الاسعاف عاوزة اعمله جوا خشيت قبل اصل مكان الصورة تانى وقفونى فى نص الممر قلت ليهو داخلة مكان الرنين فإنتبهت انو خالى اتأخر وراى ما جا سريع فتحت الشنطة اطلع تلفونى و قعدت عشان افتش كويس الشنطة واطلع الورق والقروش فى الجلوس بتاع علياء لمن قعدت انتبهت لإنو علياء كلها واقفة بمعنى كلها واقفة على رجلينه شلته تلفونى اعاين للساعة اظنهم عاوزين يغيرو الناس لدوام الليل سمعت ليكم رجلين كتاااار جايين و زول بقول السلام عليكم لمن رفعت راسي ارد السلام لقيتو عمر البشير وانا فى قعدتى ديك ومعاو عبدالرحيم محمد حسين و دنقرت تانى لموبايلى اشوف خالى دا وينو طوالى جانى حرس طاير كيف ما تقومى ليهو ويلا قومى من هنا اطلعى برا قلت ليهو ما بطلع برا و هو رئيسك زاتو طلع برا مطلعنى ليه بعد دا؟
قال لى يا زولة قومى لى من هنا اطلعى برا قلت ليهو ما طالعة و ما حطلع و انفجررررررت بالبكا فى نص علياء وكووووركت قدرتى فرجت الخلق قلت ليهو هو عيان و نحن عيانين و جايين بقروشنا والمرض ما فيهو رئيس ولا شيطان رجيم و مرض امى الجاية باسعاف فى اللحظة دى اهم منو هو الجاى نصيح برجلينو ولو ما عاوزننا فى مستشفياتكم كلموهو يصلح مستشفيات الشعب عشان الشعب ما يضايقو فى مستشفاهو حريقة فيكم و فى علياء و فى البشير .. جا بتاع الرنين زاتو قال لى احترمى المؤسسة الانتى فيها قلت ليهو المؤسسة الما بتحترم المريض دى مؤسسة غير محترمة ولو العيانة انا ما بقيف دقيقة فى بابكم دا وانا ما جياشية عشان احترم مؤسستك الربحية و اصفق للغلط و اقول حاضر للرتب والاوامر.. فى اللحظة ديك الدنيا ضلمت فى وشى و جا واحد حرس قال لى انا اسف على الحصل ليك انا حقيقى اسف خلانى ابكى زيادة من الحرقة و ولد خالى وخالى كانو خلاص جو وعرفو و مشو يفتشو فى الحرس والموضوع بقى شكلة فى الاخر بعداك الحرس طلعنى نفيسة ساى وسامحنى عشان امى عيانة و مثل دور انو هو اتجاوز كلامى رأفة بى وطبعا ما جاو ابدا احساس انو هو الغلطان و كان نظرتو نظرة كتر خيرنا خليناك تطلعى من دارنا مع اهلك ما طلعناك ببوكس الجهاز ☹️
ربنا ينتقم من كل زول عندو سلطة خلتو يظلم و يفترى ربنا ياخدهم اخذ عزيز مقتدر.
و ادعو لأمى كلكم ربنا يخفف عنها).
ولاقت القصة ردود فعل متباينة من المتابعين.
الخرطوم_ سودفاكس
