قصة أدهشت الجميع ..مغترب سوداني يتنازل عن عمارته للغفير ويستأجر شقة لأولاده
في قصة ضربت مثالاً للرجل السوداني الأصيل ، وألهبت مشاعر رواد مواقع التواصل الاجتماعي ، رغم تكتم صاحبها عليها وعدم إخباره هذا السر حتى زوجته وأولاده .
وبحسب رصد شبكة سودافاكس فان مغترب سوداني تفاجأ عند عودته النهائية من بلاد الاغتراب بان الغفير الذي كان يحرس له المبنى الذي يقوم بتشييده حتى يستقر به على ارض الوطن ، بان الغفير قد أصيب بالشلل و زوجته تقوم ببيع الأكل لتطعمه و أولاده .
و أوقف المغترب تكملة السكن وذهب ليستأجر شقة ليسكن فيها هو وأولاده رافضاً أخبار الغفير بانه قد عاد نهائياً ليستقر بالمنزل الذي تعب طوال سنين في بناءه ، ولكن ومن خلال بعض المعارف اكتشف الغفير هذه الحكاية المذهلة .
وكتب احد رواد مواقع التواصل الاجتماعي القصة التي رواها له الغفير بنفسه قائلا:
# المغترب بالله شوفوا الزول دا !!
زول رجع من إغتراب مشى يشوف بيتو شان ينزل فيهو عفشو لقى غفير بيتو راقد شبه مشلول بي غضروف وزوجتو بتطلع تبيع فطور كسرة وملاح وترجع تشتري ليهم الاكل والمصاريف حقت مدارس الأولاد
طبعا قايلنو جايي إجازة وجايي يتفقد البيت وراجع زي كل مرة ، خجل منهم واداهو شويت مصاريف للعلاج ومشى الدكان إشترى حلاوة وبسكويت ختاها للعيال
المغترب النبيل دا أجر شقة من سنتين قاعد فيها وبيقول لي زوجتو إنو البيت فيه مشكلة سايفون مشقق كلو محتاج صيانه
يعني بس خجل من الناس التعبانين ديل يمشوا وين بقى مديهم بيتو مجان وهو مأجر بي قروش ورفض حتى يوري الغفير إنو رجعوا نهائي إلا في ناس من أصحابوا الفي السعودية جوهو زيارة وإفتكروهو نزل في بيتو ملكو حتى عرف منهم إنو هو واولادو رجعوا نهائي من سنتين ،،
يا ايها المغترب : القصة دي حكاها لي عمك الغفير زاتو والآن قصتك دي بقت فضيحة ليك بين اهل الأرض والسماء وحسك إتشال بالخير وانا ما حا اخلي غنماية في الشارع ما احكي ليها قصتك دي .
أسأل الله ان يجعل صدقاتك دي فتوح ربانية تنزل عليك رزق مطر وسعادة وقبول بين الناس حتى يتعجب لها اهل السماوات والأرض .انا ميرغني سوارالدهب مابعرفك ولا شفتك اشهد الله إني أحبك وأنت كبير شديد في عصر الأقزام .
جغمة أخيرة : قاعد احاول اتخيل الله حايدهشك كيف ،، ياهو السوداني وين ماكان .
