الجلسة الأولى:
منو فيكم كان سفير… منو فيكم كان وزير
هوووي احذروا
حقيقي الناس مقامات وماشغالة بالفارقات
هووووي احذروا
تجدعوا في كلامكم … بتعرفوا ليه شنو
ناس فلانة احذروا
ياعوازل ارتاحوا … حقيقة الكبير كبير
هوووي احذروا
كانت أول دندنات أسمعها من قون عالم القونات، والقون عالم مثير للدهشة عندما تنخرط في عالمهم لم تنظر للخلف ولم تكترث لمن حولك، عالم أقرب للسحر فهو عالم دنيوي بحت، فعندما أردت التجوال والترحال في عالم القونات تزوَّدت بجزء قليل من الزاد عبارة عن بن وسكر وسجائر برنجي ويعتبر هذا الزاد أساس كل جلسة حزمت أمتعتي وكانت لي أول جلسة مع قون فكانت جلسة ما منظور مثيلا، كانت جلسة تحفها الضحكة والفرفشة وكانت بصحبتنا بعض المشروبات البلدية التي تجدها في معظم البيوت في عيد الأضحى المبارك المتمثل في (…..) فينا من أرتشف القهوة والبعض لم يتناول شيء.
جوباك حياة الفي الدايات
ففي أثناء هذه الجلسة كان الحديث جماعي والونسة عالية وكذلك الضحكة، قال القون (ب.ا): نحن مجتمعنا مجتمع براءة وونسة وضحك ما عندنا حاجة لزول في بعضنا البعض قال(قلتو .. ستو) والقونة المقصود بيها الفنانة، والقون هو الفنان، قاطعته سائلة: وشيخات الزار؟ رد قائلاً: هوووى ما تلخبطي (شنو الجوباك دا ثم ضحك وقال دا جوباك حياة الفي الدايات) ثم سألته مرة أخرى: حياة الحصل ليها شنو في الدايات؟ حياة قالوا مجنونة والديات ما عرفن يولدنها فماتت، ثم واصل حديثه: شيخات الزار ما عندهن علاقة بالقونات والقونات هن الفنانات المبتدئات ؟ وكذلك الفنانين، أغاني القونات كلها مطاعنة ؟ شوفي يا أستاذة سبب المطاعنة شنو مثلاً أنا جاني كلام (قوالة) أنو الفنانة الفلانية قالت فيك كذا وكذا أو عندي حساسية مع فنانة أو فنان معيَّن ففي أقرب مناسبة نحن مجتمعين فيها وحضرت الفنانة القالت الكلام فيني بشيل المايك بغني فيها.
أنا بجيبو بقوله ليكي … وأنا بوريه ليكي
وفي مقطوعة تانية بتقول
شلبت راجل صحبتي … وبسكوتي بجرسة… وبكلمة واحدة بمقسة
كمان الفنانة بتشيل المايك وبترد عليَّ بتقول :
أنحن ناس الدنيا … وأنحن سياد الشيء ذاتو
مثلاً في واحدة من الحفلات اجتمعن فيها الكثير من القونات كانت في أم درمان والمعروف وقت تكون في حفلة لواحدة من القونات بقية القونات بيجن بجاملوها ومعاهن العازفين حقنهن أو أصحابهن وبدأت الحفلة في أم درمان وحصلت مشكلة كبيرة بين القونات لدرجة الضرب وواحدة من القونات (جرت عديييل) تركت المناسبة، أغاني القونات من تأليف القونة ولا من تأليف شاعر، معظمها تأليف من القونة أو القون الشخص الموجوع بيقول أي كلام وبالرغم من ذلك مجتمع القونات مجتمع جميل ووقت تحصل حاجة لواحدة كل القونات بيكونن حاجة واحدة.
علاقتكن بالإعلاميين؟ علاقتنا مئة المئة علاقة سمحة ومصاحبين الكثير منهم وبيدعونا في مناسباتهم ونحن كمان ولو في قعدات سمحة عادي ممكن يشرِّفونا
ورجال السياسة؟ لالالا، ما عندنا ليهم حاجة نحن بنخاف من الهواء ما بنخاوي أي زول وما بنثق في أي زول وما بنصارح أي زول ثم دندنت:
هو البقى غالي ذاتو منو … من فارقتو ارتحتي
ديل ناس بالحال ببشتنو
العلاقة حاجة عادية العلاقة المادية … ياجدو حاجة عادية
الخساسة أساسة والصحبة مصلحجية
ثم ختمت الجلسة الأولى بمجموعة من الأغاني البعض لم أسمع بها من قبل مثلاً:
معروف أنا سيد مقدرة … لابخاف لا برجع ورا
الجاياني من الله بتحملا … والقاصداني بدمرا
وأيضاً مثل
العسل البترمش … من جنبو كيف أمش
والبعض الآخر كنت معتادة على سماعها وكثير من الفنانات يقمن بترديدها مثل:
شطة شطة شطة شطة
وعندما رددت هذه الكلمات الكل اغلق كف يده وأصبح يؤشر للأعلى والكل يقول شطة شطة شطة شطة والبعض يكملها بقول (شطة حارة دنقابة) وآخرين يرددوا كلمة (قلتو) ثم ختمت الجلسة بدندنات:
وما بفوتو مابفوت … ناس الدنيا يلا موتوا
أي واحدة شلابة … من فلان تعمل حسابة
(ثم ذكرت اسم معظم الجالسين في القعدة حتى أنا) أنا فلان ما بتشلب …والبتشلبني كذابة.
الجلسة الثانية
كانت الجلسة الثانية مع أحد أصدقاء القونات، قال: القونات ديل ماعندهن قضية بزول ديل ناس جبنة سااااي مع بعضهن حلوين للغاية وأي فنانة مبتدئة وبتغني أغاني هابطة يطلق عليها اسم قونة، والفنان يقال عليه قون وبعض القونات في نهاية الحفلة بتمشي ترتاح في شقة وغالباً بيكون في ناس من الحفلة عجبتهم وعزمها يا جبنة أو يضربوا سجائر أو يدخلوا معها في برنامج أو القونة إذا دايره معاك بتعزمك جبنة والجبنة ما نهارية بتكون ليلية، ثم قال: زي ما هم بقولوا ثم دندن ببعض الكلمات مثل :
الرايدنا بنجيبو …والماداير بنكاويه جنب بيتو
وأيضاً قال:
فى بحري أنا جيت … وللمغارز أنا أبيت
وردد:
مشيت جنب بابو … عشان أعكر أعصابه
ثم سألته: يقال هنالك بعض القونات بصطحبوا بعض الشباب للحفلة عشان يجمعوا ليهن النقطة، (المبالغ البتوضع في الفنانة أثناء الغناء)؟ في بعض القونات بعملوا كده والبجمع القروش عنده نسبة معينة إذا الختة (القروش) كثيرة بيأخذ 200 جنيه، وفي بعض الأحيان بتكون أكثر من ذلك وإذا العكس بيأخذ 100جنيه، وفي بعض الشباب في أثناء الحفلة بيضعوا نقطة بكميات كبيرة وديل بسموهم الدنفارة والدنفارة عاملين فيها شيوخ بالكذب بغشوا الناس وبشيلوا منهم قروش، قاطعته سائلة: القونات بتناولن أي نوع من المكيفات؟ أكثرهن بشربن الشيشة والحاجات التانية ؟ ضحك ثم رد بكلمات قائلاً :
الناس تونس والريح تكنس
ثم اتبعها بكلمات أخرى قائلاً: هههههي ناس الدنيا ديل
تجيهم سلام يسوك خدام
حياة القونات عموماً كيف؟ ردَّ: حياة عادية يهيئوك ويمهمجوك بجتمعوا مع بعضهم البعض في المناسبات الأفراح والأتراح والقعدات سواء أكان قعدات الجبنة وفي الأغلب بتكون يوم العطلة (يوم السبت)، دائماً ما بيكون في عداد (يعني حفلة) أو قعدات الصندوق، قاطعته: قعدات صندوق كيف؟ صناديق القروش العادية دي والصناديق ذاته بتختلف بتكون على حسب مقامات القروب كيف؟ يعني في صندوق بـ 15 جنيهاً، و10 جنيهات، لأنه في قونات العداد حقهم تعبان بي 400 جنيه، وفي صناديق كبيرة مثلاً بـ 50 جنيهاً، وديل مواضيعهن وأمورهن تمام التمام، ثم سألته: هنالك بعض الأساليب المتعارفة مابين القونات؟ كل مجتمع وله خصوصياته، مثلاً فني الساون بنقول عليه البعام، والبت البتمشي معاها القونة بتقول دي بتي أو دي بت بتي، وهنالك كلمات مثلاً يا قصة ويا سكسك المقنطرة تعني شنو؟ ضحك ثم قال: أنتو ياناس الدنيا المقنطرة أو المقطورة دي بقوله للزول أو الزولة القاعدة أو القاعد في بيت القون أو القونة وفي الأغلب بيكون ما عندها أهل أو طالعة من أهلها لأي سبب من الأسباب، بتكون قاعدة في بيت القون أو الشيخة أو الجرارة ومهمتها تنظف البيت وتستقبل الضيوف وتعمل الجبنة مقابل إقامتها في البيت، وكمان القونة بتقوم بكل مصاريف المقنطرة من صرف كريمات ولبس لكن ما بتديها قروش في يدها.
الجلسة الثالثة
كانت برفقة الفنانة مروة الامتداد الشهيرة بمروة خدوم، بعد جهد ومشقة استطعت مقابلتها عمرها صغير ولكنها تحمل عقل شخص كبير عندما تحدثت إليها كانت تتجاوب معي بكل هدوء، فأول سؤال وجهته لها كلمة القونة تعني شنو ومن أطلقها؟ القونة أو القون في الكورة تعني الهدف فمثلاً يقال هذه قونة أو قون يعني هدافة أو هداف أو غناية أو غناي، قاطعتها: أو يقال هذه صرَّاخة بمعنى غناية، اتفقت معي قائلة: أكيد، ثم واصلت حديثها بكل هدوء وهذا الاسم أطلقه الشباب، هل بتوافقي على هذا الاسم؟ والله دا اسم الشباب، لكن الأفضل يقال فنانة بدل قونة لأن كلمة فنان عندها معانٍ كثيرة وجميلة في ذات الوقت، ثم وجهت إليها سؤالاً آخر في الحفلة بتجدي معظم الشباب والشابات بعملوا حركة تتمثل في غمد الكف، ماذا تعني؟ ضحكت ثم قالت: الحركة دي بترمز للبهجة والطرب وأنو الأغنية دي جات في الجرح وفي محلها وهي حركة عادية مثلها مثل حركة الأصابع الاثنين وهذه الحركات بعملوها الشباب وبجيوبوها من الأفارقة، هنالك من يقول إن القونات عند نهاية الحفلة بيمشوا شقق يرتاحوا فيها؟ قالت: كل الناس ما واحد في أي مجتمع في الصالح وفي الطالح، لكن الفنانة بتنتهي لحدي الساعة 11 أو11 وربع، ووقت تصل البيت تكون عملت الساعة 12 ليل، وين الزمن البتمشي فيه لشقة عشان تعمل برنامج ووين الطاقة مهما كنتِ فنانة غناية بتكون متوترة حتى نهاية الحفلة. الدنفارة البياتوا للحفل باتفاق مع القونات من أجل النقطة؟ لالا، النقطة ما عندها علاقة بشخص معين، فمثلاً بيجيك واحد ويوسوس ليك بأن تذكري اسم فلان وعلان ويكون مثلاً فلان دا عم العريس أو خال العروس ومجرد ماتذكر اسمه بيجي ويضع القروش على الفنانة وهنالك شخص بتعجبه غنية معيَّنة مجرَّد ما الفنانة تغنيها يضع قروش على الفنانة ويكون ليس له علاقة بها أو بناس الحفلة مجرَّد تحفيز للفنانة، بالنسبة للشخص البجمع النقطة، بنت أو ولد عنده نسبة؟ لالالا، الكلام دا ما حقيقي، لكن نحن بنتعامل بطريقة وبمفهوم مختلف، كيف؟ أنا في الحفلة ودي صحبتي خافت على حقي وجمعتوا لي فما ممكن أخليها دي حاجة ذوقية لابد أن أعطيها شيئاً، فإذا أصلاً هي ما كانت خايفة عليَّ ما كان بتجمع لي قروش، وبعد مرات أنا أمي بتمشي معاي وبتجمع لي النقطة.
في كل منزل فنانة أو فنان توجد مقطورة أو مقطور ؟ أولاً المقنطرة دي لغة قونات ودي الشخص البتجده طوالي مع القونة وبقول عليها بنتها أو ولدها وإذا عايزين يشوِّهوك بقولوا دي مقنطرة أو مقطورة ودا كلام ما صاح عشان نتعامل بيه. نوع العلاقة شنو البتجمع القونات مع الشيوخ والشيخات؟ لاتوجد علاقة مابين الفنانين والشيوخ معظم أغاني القونات أغاني هابطة؟ دا أصبح الذوق العام خاصة في الحفلات يعني مثلاً أنا مابحب أغني الأغاني بتاعت الهجيج لكن بتلقى الجمهور بصر على أساس لازم تغنيها يعني بتكوني مجبرة مثل شنو؟ كثيرة لكن أغاني الخالات دي مرغوبة، لأن الخالات ديل عذبوا الناس ومتعبنهم، الخالات ديل منو؟ النسوان الكبار ممكن مقطوعة؟ دندنت قائلة:
ويا خوانا عندي شمار … شمار قالوا في البوبار
أول مرة أسمع خالة …كبيرة وشفع صغار
ياخوانا ما حالة .. حالة صعبة وبطالة
خائنة شلبتني يمة …مشى للخالة بعيالة
ثم صمتت برهة ثم قالت: وهنالك أيضاً مقطع في الخالات بتقول :
الخالات الجنونني …في البريدو كتبوني
ياناس أنا قلبي أكلني …وقت شفت رقمه في تلفوني
ناس الدنيا قالوا شلبتي .. معقولة بس يا خالتي
يالعجزتي وكبرتي ..ولسانك ما راعيتي
هو يالوردة (الكنج ) جنيتي ..حبيتي وما استخرتي
العامل شيخة شيخة زار … بتسوي الشينة مع الأخوان
قدارة قدرتي بي يا خاينة … والله في الدنيا ماليك أمان
هنالك فنان بصطحبن أولاد الجيران معاهن للحفلات كحماية؟ لالا، مافي كلام بالشكل دا، كل مافي الموضوع المعجبين بتابعوك بس ما أكثر، ثم واصلت حديثها: مجتمع القونات أو الفنانات مجتمع عادي مثل المجتمعات العادية فيه الجبنات، وبعزموننا لكن أنا شخصياً ما قاعدة اختلط بهن لأن كثيراً ما تحصل نقاشات ومشاكل وشمارات، ثم دندنت:
فلانة جات للشمار … يلا موتي ولعي نار
ودا كلوا بخصم من حق الفنان.
تحقيق: أسماء ميكائيل اسطنبول
التيار