محمد عبد الماجد: بشه وشيبوب والشعلة وامبومبو وصلاح نمر وعدار وقريش ومحمد الشيخ و(الفار)

وان طال السفر

· الحفلة زمان بتبدأ من الفاصل التاني.

· عارفين الفاصل الاول بكون شنو؟.

· الفاصل الاول بيظبطو في (الصوت).

· زمان كانت في حاجات كدا.

· والله عشان يظبطوا الصوت عاوزين ليهم سنة.

· الموضوع كان صعب شديد.

· ما زي هسع أي شي بقى بي نظام.

· ومازال الليل يحبو.

· العبارة دي كانوا بقولها في الحفلة لمن الشمس تشرق.

· الليل كان بي خيرو.

· زمان وقت تصوير الحفلات كان جديد ، (تقليعة جديدة كدا) وتسجيل حفلة العرس في شريط فيديو كان موضة حديثة ولا يتم إلّا في الزيجات التى يكون فيها (العريس) من اصحاب الجاه والمال ، كان الواحد وقت يمشي ليه عرس شاشات التصوير فيه معلقة بيعمل حسابه.

· تعمل فيها محترم.

· وتحترم نفسك.

· بمعني وقت (الكاميرا) تقرب عليك بتصلح قعدتك.

· وتظهّر (القلم) في جيب القميص.

· كان في حاجات كدا.

· ولو كنت شايل ليك صحن كوكتيل – بترميه سريع.

· ما عندك قضية بالعشاء.

· انت بس جيت عشان تجامل العريس.

· ويمكن تكون ما بتعرف اسم العريس ولا حصل قابلتو في حياتك.

· لكن مع ذلك شايل الكرسي وقاعد قدام – في الصف الاول.

· الدنيا كانت بي خير.

· قبل ما الجماعة ديل يظهروا.

· زمان كان لمن تظهر في الشاشة – الحلة كلها بتقعد تتكلم في الحتة دي.

· موضوع كبير.

· واساسي.

· نص البنات زمان عرسوهن عن طريق (تقنية الفيديو).

· الواحدة تظهر في الشريط.

· اليوم التاني تسمع بيها عرست.

· ما بتشوف ليك (بنت) إلّا في شريط فيديو بتاع عرس.

· غير كدا ما عندك طريقة.

· وعشان تعمل حسابك.

· وتكون حريف.

· ومفتح.

· وعارف أي شيء.

· اوعك يضبطك الفيديو وانت بتقشر في البيضة.

· الموضوع دا كان ما حلو في حقك.

· حتى البارد وقت تكون شايلو وقت الكاميرا تقرب عليك بتحاول تتخصل منه.

· زي الجريمة.

· زي المخدرات.

· البيبسي كان عزيز.

· لكن مع ذلك ما حلو يجيبوك في الفيديو وانت بتشرب في (البيبسي).

· انت ماشي عشان البيبسي.

· العريس نفسه زمان وقت الكاميرا تتوجه عليه ، كان بيزيد معدل (التبشير) شوية.

· الهوشة بتكون حاصلة.

· مبروك يا عريس.

· الف مبروك.

· بيت مال وعيال.

· الكلام دا بتسمعو في الشريط.

· الفرحة بتظهر في (الكرفتة).

· ما عارف علاقة الفرحة بالكرفتة شنو؟.

· يمكن دي حاجة دبلوماسية نحن ما بنفهم فيها كتير.

· لكن الموضوع مؤسس.

· وراسخ.

· وثابت كمان.

· المهم – والشيء العاوز اقوله من الكلام الفوق دا كلو – ان مباراة القمة بكرة في ابوظبي فيها (تقنية فيديو).

· شيلوا شيلتكم.

· عشان ما تقعدوا تقطعوا لينا حاجات من رأسكم.

· يعني ما في أي طريقة عشان مامون ابوشيبة يقعد ينظر لينا في التحكيم بعد المباراة.

· الكلام دا مع (الفار) ما بنفع.

· ولا بنقبلو.

· ولا عند ابوشيبة أي طريقة عشان يشكك في الهدف الرابع للهلال.

· اقبلوها كدا يا ابوشيبة.

· ما في كلام زي دا.

· حكاية انك تتطلع بعد المباراة يا مامون ابوشيبة وتقول عندنا ضربة جزاء ما احتسبت لينا مع تقنية الفيديو ما في كلام زي دا.

· لكن مع ذلك – لا استبعد ان يطلّع لينا مامون ابوشيبة (تقنية الفيديو) هلالابية.

· وهلالابية كمان على السكين.

· ما بتتغالط.

· تقنية الفيديو عندها حبوبة كانت بتلعب سلة في مناشط الهلال.

· يا ناس المريخ احسن تقعدوا مع صلاح نمر.

· اشرحوا ليه الحكاية.

· قولوا ليه الموضوع فيه (تقنية فيديو).

· فار عديل كدا.

· زمان وقت كان تكون في مناسبة ويجيبوا لينا (شعيرية) مع الفطور او مع العشاء كنا بنهمل (الفول) ونركز في الشعيرية.

· دحين هسع صلاح نمر احسن تكلموه.

· احسن تقعدوا معاه.

· احسن تقولوا ليه الموضوع فيه (شعيرية).

· شعيرية قاطعة كمان.

· عشان ما يركز على (الفول).

· يا صلاح نمر الموضوع فيه (تقنية فيديو).

· فار.

· اوعك تضرب بدون كورة.

· الشغل البتعملوا مع ناس لجنة عامر عثمان مع (الفار) ما بنفع.

· اوعك تدخل غلط.

· ضربة جزاء.

· كرت احمر.

· كلو بيكون مصور.

· ما عندك أي طريقة.

· ألعب كورتك بس.

· ولو عندك مشكلة مع الشبكة.

· احسن من اول 3 دقائق في عمر المباراة تمشي تدخل الشبكة.

· واحسن تعمل الكلام دا في التسخينة قبل تقنية الفيديو ما تشتغل.

· مباراة بكرة (بشه) ح يتجدع فيها.

· يومك يا بشه.

· انطلق.

· وتعال من الخلف.

· اكتر زول ممكن يستفيد من تقنية الفيديو بشه.

· عارفين ليه؟.

· بشه عندو هدف في المريخ في الدوري الممتاز ما حسبوه ليه بحجة التسلل.

· ولا في تسلل ولا في حاجة.

· وبشه في البطولة الافريقية عنده هدف في المريخ برضو ما حسبوه ليه بحجة التسلل.

· وبشه ما متسلل.

· بشه اتظلم شديد في الحتة دي.

· لاعب سريع.

· وطيف.

· وبتحرك مع الخط.

· عشان كدا يا بشه بكرة اخد راحتك على الاخر.

· الموضوع جاب ليه (فار).

· وليد الشعلة الايامات دي فوق.

· فاز بلقب هداف الدوري.

· سجل في اخر مبارتين لعبهما امام المريخ.

· وفاز في استفتاء صدى الملاعب بجائزة افضل لاعب سوداني.

· كل هذا يفعله لاعب صغير في السن.

· لم يلعب مع المنتخب سوى بعض مباريات.

· لاعب كل مشاركاته مع الهلال لا تتجاوز فترة الـ 6 شهور.

· مع ذلك فقد حقق وليد الشعلة كل هذه الارقام.

· نجح رقميا.

· ونجح فنيا.

· افضل لاعب.

· وهداف الدوري.

· وليد الشعلة سوف يدخل مباراة الغد وهو في وضعية معنوية عالية.

· وتقنية الفيديو موجودة.

· يمكنك ان تفعل أي شيء في صلاح نمر.

· تجيبو.

· ترجعو.

· تدخل بيه الشبكة.

· تدخل بيه صندوق.

· اعمل أي شيء.

· وفي لاعب اسمو (الجس).

· هدية من السماء.

· بكرة شوفوا الجس ح يعملوا فيه شنو؟.

· اللاعب دا بيلف غلط.

· عندو مشكلة في الاتجاهات.

· وقت يكون عاوز يمشي يمين بيمشي شمال.

· والعكس صحيح.

· ركزوا في صلاح نمر.

· وركزا في (الجس).

· وركزوا كذلك في منجد النيل.

· بكرة بتعرفوا فرق جمال سالم.

· قلت ليكم منجد النيل حارس ما ثابت في الارض.

· يعني في لحظة حركتو دي لو ضربت الكورة في أي حتة بتدخل.

· ركزوا في هذه الاسماء تغلبوا المريخ زي ما عاوزين.

· التقنية موجودة.

· وسط المريخ ما وسط شدايد.

· اتغطوا على وسط المريخ.

· بيقعدوا ساكت.

· ما عندهم خبرة.

· وما عندهم قدرة للكلام دا.

· استفيدوا من الحتة دي.

· بكرة ومن منطلق خاص وحسابات محددة – القمة قمة شيبوب.

· شيخ شيبوب في مباراة بكرة عندو كلام كتير.

· من برة الصندوق.

· ومن جوة.

· بالرأس.

· والقدم.

· شيبوب عندو كلام كتير ان شاءالله.

· والكلام د كله ح يتوثق بتقنية الفيديو.

· أي حاجة مصورة.

· افعل ما يحلو ليك يا شيبوب.

· تنط من الطابق الرابع.

· تمشى كينيا.

· جنوب السودان.

· اثيوبيا.

· تمر من كل تلك الدول بدون (اوراق ثبوتية).

· ما بتهمنا.

· ما بخصنا.

· وما عندنا مشكلة.

· بكرة افعل ما يحلو ليك يا شيبوب.

· الحكاية موثقة.

· ومشهودة.

· وتقنية الفيديو موجودة.

· بكرة مع تقنية الفيديو يوجد ادريسا امبومبو.

· هسع دا يتفاهموا معاه كيف؟.

· يعملوا ليه شنو؟.

· يتصرفوا معاه كيف؟.

· ودا طبعا ناس المريخ ما فاهمين ليه أي حاجة.

· يجوه من وين؟.

· يدخلوا ليه كيف؟.

· ما فاهمين شيء.

· بكرة أي حاجة ممكن تكون في صالح الهلال موجودة.

· الارضية الرائعة.

· الجمهور الكبير.

· التحكيم الممتاز.

· وتقنية الفيديو.

· وفوق هذا كله يوجد ايمن عدار.

· ومع عدار يوجد محمد الشيخ مدني.

· وكذلك محمد جعفر قريش.

· ثلاثي النقعة.

· الثلاثي الذي كان حاضرا لخسارة المريخ امام مريخ الفاشر.

· بكرة قاعد.

· والثلاثي هذا ان شاءالله وباذن الله وتوفيقه يحضر لخسارة المريخ بكرة امام الهلال.

· جهزوا شكوتكم.

· واوعكم مع تقنية الفيديو دي تكتبوها غلط.

· ما بنرحمكم.

· مباراة بكرة فيها مزمل ابوالقاسم.

· عشان تاني ما يقعد يتفاصح ليكم.

· بكرة بتفهم حاجة.

· السنة كلها تغالط.

· عندكم صلاح نمر.

· والجس.

· ومنجد النيل.

· وعدار.

· وقريش.

· ومحمد الشيخ مدني.

· ومزمل ابوالقاسم.

· وقاعدين تتكلموا في السياسة.

· الكلام دا صعب عليكم.

· مع (الفار) مافي هظار.

· وان شاءالله خير.

· وكله خير فوق خير.

· وقولوا يا رب.

· ……….

· ملحوظة : وقلنا يا رب.

هوامش

· مجلس المريخ مفكر في المائة الف دولار التى سوف يستلمها بعد الخسارة من الهلال ان شاءالله.

· مجلس الهلال قال كل الجائزة سوف تكون للاعبي الهلال في حالة تحقيق الانتصار.

· يعني الـ 150 الف دولار سوف توزع للاعبين وللجهاز الفني للهلال.

· الهلال ما عاوز شيء من قيمة الجائزة.

· مجلس المريخ قال أي لاعب سوف يمنح الف دولار في حالة الانتصار على الهلال لا قدر الله.

· يعني عاوزين يطلعوا بـ 100 الف دولار.

· لأن حوافز المجلس للاعبين والجهاز الفني سوف تكون في حدود 50 الف دولار.

· قلت ليكم المجلس بس هموا الـ 100 الف دولار.

· والتى سوف تعود للمجلس في الحالتين.

· اما الهلال فان الجائة كلها سوف تكون للاعبين والجهاز الفني للفريق.

· شفتوا الفرق.

· مجلس المريخ عارفو قدرو تماما.

· وعارف قيمتو.

· وبكرة فرحتنا ان شاءالله.

· وبكرة يوم اخر.

· وابقوا على سفر.

تعليقات الفيسبوك

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.