معلومات مثيرة حول القنبلة “حمدي سليمان” .. تناكح الفساد وتناسل الاستبداد

كشف الصحفي السوداني أسعد التاي في عموده الصحفي معلومات مثيرة حول نائب رئيس قطاع التنظيم حمدي سليمان الذي استضافته قناة الحدث واصبح محل سخرية واسعة عبر وسائط التواصل الاجتماعي .

بالفيديو.. مذيعة قناة الحدث “تقصف” جبهة نائب رئيس التنظيم بالحزب السوداني الحاكم (مش كل الإجابات شعر يا أستاذ)

شبكة سودافاكس تورد لكم المقال كاملاً :

أسعد التاى : تناكح الفساد وتناسل الاستبداد
أسعد التاى فيسبوك
اولاد من ضو ..
في زول عصامي شديد ما شاء الله يا هاشم صلاتو.
قبل سنتين تقريبا كنت معزوم افطار رمضاني .. و أخبرنا مضيفنا أن صديقه القادم من امريكا متوجها إلى السودان عبر دبي سيشاركنا الافطار الرمضاني الشهي في المطعم الإيراني الشهير ..
اها اشوف ليك (القنبل) من بعيد داخل .

حمدي سليمان؟!
فاندهش صديقي .. هل تعرفه؟
قلت ليهو اكيد بعرفو .. كان رئيس الاتحاد العام للطلاب السودانيين .. ثم مديرا لشركة سيدكو للاتصالات (وكيل الثريا و نوكيا واحدى استثمارات امنا الغولة ) ..
بعد الافطار انتقلنا إلى (تراس) المطعم لشرب الشاي .. وكانت الونسة .
بدأ الحمدي بالحديث حول انو ما عارفنا نحن متحملين الغربة دي كيف وانو هو ما بيقدر يغترب .
قلنا ليهو نعمل شنو يعني؟

قال نشتغل في السودان.
طبعا ليهو حق يقول نشتغل في السودان .. فهو شغال الان في السودان موظف في شركة سوداتل .. و الان راجع من امريكا .. اكيد من زيارة عمل أو رحلة تدريبية .
فسألته عن زيارة امريكا فقال بعضمة لسانه انها (مجرد إجازة ساي وفسحة مع العيال .)
موظف في السودان يقضي إجازة في امريكا .
اكيد لو ما زول عصامي زي هند بت اخو البشير ما كان اشتغل في سوداني ..
عصامي شديد بدليل أنه تزوج من إحدى قريبات السيد الرئيس ..
وما لم اكن أعرفه قبل تلك الجلسة هو أنه كان يعمل بشركة سودابت للبترول .

احاااااا
طبعا في نقاشنا معاهو حول هجرتنا واغترابنا انو السودان مافيهو فرص عادلة .. و بقروشك ما بتشتغل خليك من وظيفة عامة .. والسودان غارق في الفساد الإداري والمالي والفشل الحكومي ..
بدأ حمدي في خانة الدفاع ثم انتقل لخانة الوسط متقبلا لبعض ما نقول و منكرا لكثير .
حاول يذكر بعض الحاجات الكويسة ليهو شخصيا وانو ما بيجامل و ما بيحابي .. فذكر قصته مع تعيين أحد إخوته في الله بشركة سودابت للبترول (ذكره بالاسم) .. قال اتصل بيهو قال ليهو يا اخونا (فلان) والله عندنا شاغرة و انا رشحتك لكن عندي ليك شرط .. حادخلك معاينات.

قال اخوهو في الله زعل اول حاجة و ذكر انو رفض لعبدالغفار الشريف يعمل ليهو معاينات لجهاز الامن .. قال ليهو انت يا عبدالغفار العمل ليك معاينات منو لما خشيت الجهاز .
فناقشنا (المهندس الشيخ) حمدي قلنا ليهو العملتو دة ما بيدلل على أنك زول حقاني .. لانو اخوك دة ما نافس الناس على وظيفة معلنة في الجرائد أو عبر لجنة الاختيار .. فأقر بصحة ما قلنا وقال ايوة هو صاح ما بالمعايير العالمية لكن برضو هو كتر خيرو عمل ليهو معاينات .

طبعا سودابت كانت ماشاء الله ملانة عصاميين .. منهم المهندس العصامي حمادة نافع علي نافع .. و صاحب حمدي العملو ليهو المعاينات دة برضو كان عصامي الله يرحمو.

المهم ..
حمدي المهندس العصامي الشاطر من اتحاد الطلاب كان مدير شركة سيدكو للاتصالات . وكيل الثريا و نوكيا .
و بعدها كان شغال في سودابت للبترول
و بعدها اشتغل وما زال في سوداتل .
في سوداتل زميل العصامية الشاطرة البت من ضو زينب حسن احمد البشير شقيقة بشة .
و في سوداتل زميل العصامية الشاطرة البت من ضو هند محمد حسن احمد البشير بنت اخو بشة .
و مديرهم في سوداتل طارق حمزة الذي كان فردة طه عثمان و طه فردة الشاب العصامي الولد من ضو طارق سر الختم .. مدير سين للغلال .. و زوج ابنة (مامون عبدالرحمن بلال) ابن خال بشة .
اها طارق دة عديل حمدي سليمان زط .

يعني حمدي متزوج قريبة الرجل الصالح بشة و بذلك انضم لنادي العصاميين .
نادي العصاميين يضم راشد عبدالرحيم الذي أصبح ملحقا إعلاميا بسبب عصاميته و ليس بسبب اقترانه بالعصامية الشاطرة قريبة بشة التي أصبحت مديرة لأكاديمية السودان لعلوم الاتصال بقرار من قريبها بشة .
اول مرة اسمع بمصطلح زواج تكتيكي سنة 97 من مجموعة كيزان راجعين من مناسبة زواج أحد إخوانهم في الله .
النيل الفاضل الذي أصبح رئيسا لاتحاد الطلاب السودانيين زي حمدي سليمان حاول يدخل نادي العصاميين لكن دقت في العراضة ما عارف ليه .. رغم انو قريبة بشة كانت مكسرة فيهو .

خالد محمد عثمان كان رئيس لاتحاد الطلاب زول عصامي شديد هسي شغال في الخارجية و مناسب ابراهيم احمد عمر .. عصاميين ياخ .

حكاية النسب و شربكات الزيجات دي الرجل الصالح بشة عندو فيها استراتيجية و بعد نظر .. بتخدم مصالح ..
عبضرحمان ود الإمام نفد بجلدو .. فقد كان (من المفترض) أن يناسب محمد اخو بشة ( صرح اللواء ابن الإمام للصحف أنه تلقى ترشيحات زواج من البشير ) .. الارتباط باسرة المهدي كان حيشكل دفعة قوية لأسرة (اولاد الغفراء الطيبين) .. طبعا دة حسب فهمهم المريض.. . فمن أبطأ به عمله لم يسرع به نسبه.
تتذكر بكير الوهمي داك القال في زول شاف الرسول ماسك بشة ونافع من يديهم؟
بكير دة زول عصامي شديد .. نسيب زينب اخت بشة .

احااااااااا
الواحد لو ما ناسب العيلة المالكة ما بيكون عصامي كلو كلو.
حمدي سليمان والمأمون أعضاء مجلس تشريعي الخرطوم.
عندك الشاب العصامي معتز موسى سالم وداخت بشة باللفة .. بعد التخرج طوالي وزارة الخارجية المانيا .. ثم سد مروي والان وزير الكهرباء.
عندك برضو العميد تبيدي بتاع الامن الكان مسؤول عن مصادرات الصحف برضو تبع العصاميين المتزوجين من ال royal family
.
.
و لقد كتبنا من قبل عن #تناكح_الفساد_وتناسل_الاستبداد
.
.
“و لقد كتبنا في الزبور من بعد الذكر أن الأرض يرثها عبادي الصالحون “.
ملحوظة: عيلة بشة فيها ناس كويسين.
…………………………………
كتب البحات الهادي بورتسودان
لأميرة هند البشيرفي ديار شنقيط
#البت_العصامية
أمس البنية سارا بت الاسرة الملكية في معرض دفاعها عن زواج أختها الباذخ قالت كانت بتتعب وتمشي تتقفل في الفندق في مورتانيا بالتلات شهورعشان تصلح الشبكة هناك وعملت دولارات من الشغل ده

………………………………………………………..
يلا دي رواية الشناقيط :

في نوفمبر 2015 م سافر الفريق طه مع صديقه طارق حمزة مدير سوداتل لمورتانيا وايامها الفريق طه كان بساسق على مورتانيا ومكتول هناك Crush .. المهم قاموا بتعين عمار الفاتح حمدين مديراً لشركة شنقيتل المملوكة لسوداتل هناك وعمار على علاقة قديمة طارق حمزة من ايام أمريكيا
بعدها بشهرين أرسلت المتدربة في سوداتل والخريجة حديثاً الأميرة هند محمد حسن البشير ذات 24 عاماً لمورتانيا ، قام السيد المدير العام عمار بإستقبالها في المطار وتوصليها للفندق بعد حجز جناح لها في افخم فنادق مورتنانيا ، ثم تولى العمل عندها سائقاً خاص متطوعاً في مشاوريها للعمل والمشاوير الخاص يعني بطل شغل الشركة واشتغل (شوفير أو ديرويل زي ناس الأمارات) .

وبعدها قام بنقل وتهميش مديرة التسويق المورتانية واسمها عائشة منت البشير وتعيين الأميرة مديرة تسويق ، ولك أن تتخيل مهندسة خريجة مديرة تسويق في بلد ما ليها علاقة بيهو وجاية من شهرين .. طبعا وكلو بالدولار يا حبة ، وأنت عارف زي دي دولارها بيكون قدر كيف طالما وراها الفريق طه وبشة شخشياً .
وعشان أمها داعية ليها في أيامها هناك حضرت قرض بي 700 مليون دولار من بنك صيني لشنقيتل رغم إنو قيمتها ما تسوى 150مليون ناس طه وطارق حمزة حولو القرض لشركتهم أسمها أكسبريسو في دبي وخلقت ضجة كبيرة هناك وبرضو شال قرض محلي 22 مليون دولار .
المهم بتصرفات الأميرة دي وكسير تلج المدير ده كانت سبب مباشر لتمرد الموظفيين المورتانيين وده الأتسبب في فصل مديرها عمار الفاتح ورجعوا المورتانية عائشة

……………………………………………………………
على فكرة الجيل التاني من الأسرة الملكية أمورو كلها باسطة الأخطبوطي طه كان ما محوجهم يوسخو يدهم.. ياريتو الأمر يقيف على أولاد الأبناء والبنات ولو أنهم ما شوية ما شاء الله لانو كلو واحد من أخوة البشير إقترن بعدد لا يحصى من النسوان ..

الموضوع بيتجاوز الصف الأول ده للأقارب والأصهار وديل مئات :-
في واحد كوز بيتداخل مع أخوانو في السائحون متزوج بت خال البشير شغال في تلاتة وظائف كبيرة من ضمنها وظيفة في سوداتل أموروا زااااابطة جد وللا ما كده يا #أزعد Asaad Eltay؟
اذكر واحد متزوج بت أخت ودواد عيّنو المرضي التجاني “واحد من ازرع الأخطبوط ” والرئيس السابق لكنانة.. الود هسه خلا كنانة .. و برضو هسه رجل أعمال .
عل فكرة ياسر ولد أخت جمال الوالي العريس ده تاني ما محتاج يفتش شغل لوكالته الشغل بيجيهو لحدي عندو وبعشرة أضعاف ما يحلم

الفساد في السودان ما حالة .. الفساد مؤسسي مقترن بوجود البشير تحديداً وده يفسر ليك ليه عايزين يعيدوا أنتخابه .. حتى حاجة هدية عارفة كده “قدمنا شوية ”
تعريف العلمي للفساد المؤسسى Systemic Corruption هو : حينما تكون مؤسسات الدولة هشة وضعيفة بما يصبح معه جهاز الدولة نفسه مؤسسة للفساد.

صورة من خطاب موظف مورتاني يشرح الحاصل.
http://www.tawary.com/spip.php?article28157