الرشيد بدوي عبيد (وردي) المعلقين الرياضيين
الخميس 21 مايو 2015 الساعة 15:36
ما بتعرف شكل اللاعب ..لكن لمن تشوفو في الجريدة ..بتعرف صورتو من كلام الرشيد بدوي عبيد
مباريات العصر …بنخلي ليها الغداء…ومباريات المساء ..كنا بندك ليها (المذاكرة)
· اول علاقة (شوف) لينا للكورة كانت عن طريق (الرشيد بدوي عبيد)
· نقعد في صوالين – ونفتح الشبابيك ..ونحضر الكورة.
· او نطلع في الحوش ..ونجيب (الشاي).
· والرشيد ما بقصر.
· لي عند (القهوة) دي كان بشربها معانا.
· لغاية ..(البسكويت) كان بجيبوا لينا.
· كورة الراديو طاعمة ..وما فيها (الطفيش) البنشوف فيه هسع دي.
· مباريات العصر …بنخلي ليها الغداء.
· ومباريات المساء ..كنا بندك ليها (المذاكرة).
· الهلال وقت يكون لاعب ..ما في زول بتكلم.
· مدير المدرسة ذاتو ما بقدر يقول لينا حاجة.
· ايام التلفزيون (ابيض واسود).. وقت كان التلفزيون زي شاشة الموبايل الآن…
· الهجمة يجيبوها ليك بي صفحة.
· بي جنبة.
· والكورة لو شاتوها شديد ..بتطلع من (الكادر).
· هو (الكادر) ذاتو كان قدر شنو؟.
· بي حالتو دي ..كان احلى ..وكان طاعم وعندو قيمة.
· لو ما نزلت في الواطة ما بتشوف الصورة.
· الصورة تقول شاحدنها.
· اللاعب لو طويل بجيبوا ليك من الركب.
· المشاهدة في الزمن داك كانت زي (التنقيب) عن الذهب الآن.
· لمن يجيبوا (الدعايات) لو ما قربت للتلفزيون ما بتشوف حاجة.
· اعمامك الكبار كان يقربوا يدخلوا في التلفزيون وقت يجيبوا ليهم دعاية (المربه)..والجبنة اللباشكري.
· يفتحوا خشمهم زي اورنيك 8.
· يشهوك (الجبنة).
· اي واحد فيهم وقت يقوم من التلفزيون بمشي الدكان يشتري ليه (جبنة لباشكري)
· الوقت داك – نحكي ليكم عنو.
· ونقص.
· ونشوف الحاصل.
· زمن كان التلفزيون بيشتغل (ساعة ونص) بس – يطلعوه للمباراة ويرجعوه تاني…يرفعوه فوق (الدولاب) عشان ما في (شافع) يحوم تحتو.
· ايام كان بيشتغل بي (البطارية).
· والبطارية لمن تنزل اسبوع التلفزيون ما بيشتغل.
· تقنع بس.
· وقت الصورة تزوغ – الحلة كلها بتطلع في رأس البيت – عشان تظبط (الصورة).
· والصورة تنزل وتطلع..وعمك بكورك بالشباك – كمان شوية.
· لمن الصورة تثبت.
· تكشح ليك موية في جوفك …وتتفن في التراب عشان تشاهد المباراة.
· في الوقت داك ..كان (الرشيد بدوي عبيد) بصوته (الملون) بنافس التلفزيون – بل كان يغني عنه ..وكان لمن يخيّروك بين مباراة في التلفزيون ومباراة في الاذاعة بصوت الرشيد بدوي عبيد ..بتختار من غير تردد مباراة الراديو.
· زي البتاكل ليك في (موز).
· الموز وينو؟.
· تقعد تحرس صوت الرشيد بدوي عبيد وهو بقدم وصف حي للمباراة ..ما بخلي ليك حاجة في الملعب.
· تغالط الحاضر المباراة في الاستاد.
· تبقى ليه في رقبتو ..وانت حضرتها في الراديو.
· لو في زول طلع ليه (كيس تمباك) في المدرجات – الرشيد بدوي عبيد بنقل ليك (الصورة).
· بقول ليك اي حاجة.
· صوت الرشيد بدوي عبيد وقتها ..كان في الهجمة بكون زي صوت (محمد وردي) وهو بغني في (نور العين).
· انت وينك وين؟.
· تنزل وتطلع.
· والكورة لمن تطلع (كورنر) ..بتسمع (وا اسفاي).
· تقوم وتقع.
· يطلعها حارس المرمى ويصدها – تسمع الرشيد بدوي عبيد زي البغني (لو بالصد ابيتني ولو بالنار صليتني).
· تمرق من شعورك.
· تتلعب (ضربة مرمى)..تسمع الرشيد في (يا اول غرام).
· تشم الهوا.
· لمن تصل للنص ..الرشيد بدوي عبيد ببقى ليك زي (الطيب عبدالـلـه) في (السنين).
· (قالوا لي انساهو وامسح من خيالك ذكرياتو)…الاغنية عجيبة ..ومدهشة وبتفتت (العظام).
· تتخيلوا بسمع الاغنية الف مرة الى الآن ما وصلت الى نتيجة.
· الى الآن ما عارف ..الاغنية دي حلوة عند الطيب عبدالـلـه وإلّا عند الرشيد بدوي عبيد؟.
· ما عارف.
· ولا عاوز اعرف ذاتو.
· الكورة مجنونة – ونحن ماشيين على الخرطوم.
· في الدفاع صوت الرشيد بدوي عبيد ببقى ليك زي صوت عبدالعزيز محمد داؤود وهي بغني (غصن الرياض).
· تشيل نفس عميق ..وتعاين في السما.
· لمن تسمع الرشيد بدوي عبيد في (رشقتني عيونها) تعرف الكورة اتشتت – تقوم تشرب ليك موية ..وتكسّر الدقائق شوية.
· لمن تصل لي (انت معي)…تشيل الراديو وتدخل جوة.
· دا الرشيد بدوي عبيد ..كان في (الراديو) ..بوصف ليك اي حاجة.
· المقارنة معدومة بين تلفزيون ابيض واسود ..وصوت الرشيد بدوي عبيد.
· المعادلة كانت في صالح الرشيد بدوي عبيد.
· ما بتعرف شكل اللاعب ..لكن لمن تشوفو في الجريدة ..بتعرف صورتو من صوت الرشيد بدوي عبيد.
· جاء (الديجتال).
· وارتحنا من (لحظات ونواصل البرنامج).
· وارسال شندي.
· ومحطة بانقا.
· والليلة في هوا.
· ارتحنا من الحكاية دي ..وظهرت التلفزيونات الملونة..الصورة بقوا يقدموها ليك زي (المحشي).
· الزول جديد.
· اجدد من الواقع.
· تلفزيونات 24 بوصة.
· 24 شنو؟.
· شاشات 42 بوصة.
· 72 بوصة.
· زي السينما.
· يجيبوا ليك الزول قدامك تقول قاعد معاك في مكتب الاستقبال.
· والـلـه لو ما بتخاف من كلام الناس – ويقولوا الزول دا مخلوع ساكت ..تفتح ليه الصالون – وتشغل ليه المروحة.
· الزول واضح قدامك في الشاشة.
· وظهرت تقنية(HD) الصورة بقت زي (التحلية).
· مع الحاجات دي كلها.
· صورة بتلمع من الكامب نو او من ملعب الامارات في لندن.
· عصام الشوالي او رؤوف خليف.
· حافظ الدراجي او سوار الدهب.
· الرشيد بدوي عبيد برضو بتقدم.
· برضو في صوتو ..الكورة زي القدامك.
· مازال الرشيد بدوي عبيد يربح رهان الاستماع للاذاعة.
· تخلي التلفزيونات دي كلها ..بي استديوهاتها التحليلية ..وتمشي تقعد للرشيد.
· الزول البجامل ناس بي ان ..بقفل صوت التلفزيون ..ويشغل صوت الاذاعة.
· هذا هو الرشيد بدوي عبيد ..بنافس في التلفزيون منذ ان كان بالاريل (ابيض واسود) الى ان وصل الى مرحلة الديجتال والصورة الاكثر نقاء من الواقع.
· مازال بكل هذه المعطيات ..الرشيد بدوي عبيد ..يتقدم ..حيث الصوت (الوردي) الجميل.
· هو (وردي) المعلقين.
· يطربنا (تعليقا) – كما يطربنا (محمد وردي) تماما.
· ما في زول بلحقو في الوصف والتحليل والنقل.
· بقدم ليك وصف المباراة مع التحليل.
· القون قبل ما يجي بـ (5) دقائق بكلمك عنو.
· التغيير بحدثك بيه قبل ربع ساعة.
· الرشيد بدوي عبيد ..كنت قد وعدت بالكتابة عنه ..والكتابة مثل (القدر) لا تملك تواقيتها.
· تفرض ميعادها وحدها ..وتأتي في زمانها دون ان يكون لك سلطة عليها.
· غير ان ما سطره الزميل عوض الجيد كباشي امس ..وهو يتحدث عن حالات تعاني كثيرا في القاهرة ..اشعرني بالتقصير.
· نحن كلنا مقصرين.
· واولنا بالتأكيد الدولة.
· الرشيد بدوي عبيد ..اصيب في مباراة (رسمية) في مباراة المريخ وعزام ..وتعرض للمرض وهو في مهمة رسمية..ولم نتوقف عنده التوقف الذي يستحقه.
· لا الدولة ولا الوزارة ..اعطت الرشيد ما يستحق ..او قدرت هذا الذي قدمه للوطن.
· المجتمع الرياضي نفسه ..عليه ان يتحرك نحو الرشيد بدوي عبيد.
· لا نريد ان نحدد اسماء ..او نسأل ..لأن الخيرين كثر ..وهم دائما في الموعد.
· سفارة السودان في القاهرة بقيادة سفير عرف بالرياضة ..عليها ان تتولى امر الرشيد ..وان تمنحه الدعم المعنوي قبل الدعم المالي.
· قد يكون الرشيد غير محتاج ..لكن الوسط الرياضي والدولة محتاجة لأن ترد الدين الذي عليها.
· …..
· ملحوظة : الـلـهم اشفي الرشيد بدوي عبيد ..وارجعه معافىً سالما لوطنه.
هوامش
· الزميل عوض الجيد الكباشي ..هو الآخر في محنة مع زوجته المريضة في القاهرة ..مع ذلك عوض الجيد كان افضل مننا وهو يتذكر محن الآخرين.
· ذكر عوض الجيد ..ان الرشيد بدوي عبيد ..في القاهرة منذ ثلاثة شهور ..و قد اجريت له ثلاث عمليات.
· يا ريت الدولة والوزارة والمجتمع الرياضي يشكّل وفدا للسفر للقاهرة لمتابعة هذه الحالات.
· في القاهرة ايضا ابن الحصاحيصا الطيب مبارك ..والذي يعاني ايضا من المرض ويتعرض للكثير من الرهق والتعب في القاهرة.
· وهناك مشجع الهلال وأحد ابنائه احمد شيبة ..مستشفيا في القاهرة.
· في الخرطوم هناك وجع آخر.
· يعاني الزميل عادل فضل هو الآخر من المرض.
· عادل احد الاسماء الاعلامية الرياضية اللامعة ..عرف بطيب الاخلاق وحسنها.
· وكان سباقا للخير.
· اين منه نحن الآن.
· ما حدثونا عن عادل إلّا حدثونا عن الخير.
· وما كلمونا عنه – إلّا كلمونا عن الفضل.
· ويبقى عماد عبدالمطلب ..اجمل ما اعطتنا الشاشات…حيث الشهامة والعفة والنبوغ.
· شاب يتدفق طموحا وموهبة وخير.
· نسأل لهم الشفاء جميعا.
· جميعهم باذن الـلـه قادرون على تجاوز المحنة.
· ادعوا لهم.
· ليتنا نحن نقدر نتجاوز محنتنا تلك ..ونقدم شيئا لمن يستحق منّا الكثير.
· اما الدولة والوزارة والمجتمع الرياضي ..فان الواجب يحتم عليه التحرك.
· سوف نعود ان شاءالـلـه تفصيلا …لهذه الحالات.
· ………..
· عاجل : ونواصل…
