محمد عبد الماجد: اندرزينهو قالوا قال ليهم جيبوا لي ضفر وسيلا وعلى جعفر وشوال بصل

• انتوا هسع بتكونوا خليتوا ضفر.
• وخليتوا سيلا.
• وخليتوا علي جعفر.
• وقعدتوا تفكروا في (شوال البصل).
• بس دا البهمكم.
• موضوع (البصل) دا بكلمكم عنو بعدين.
• في اخر العمود ..عشان ما احرق ليكم (سيلا) ساكت.
• لازم الواحد يخطط كويس قبل ما يشرع في الموضوع.
• زي حركات ناس السوق.
• وقت تسأل ليك من حاجة…يقولوا ليك سبعة ونص.
• والبائع بدون ما تسألوا يقول ليك :
• و(النص) اهم من السبعة.
• تقول ليهم دا (نص) شنو الاهم من السبعة دا؟.
• براكم بتفسيروا تفسيرات غريبة كدا.
• ولا بسألكم.
• ولا بقول ليكم حاجة.
• فسروا على كيفكم ..بس ما تدخلوني في الموضوع.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء
سوى رؤياكم الغالية).
• بس في حاجات غريبة شديد بتحصل.
• ولا بنقدر نقولها.
• نجي فايتين فيها من فوق لي فوق.
• نشوف اندرزينهو.
• ياما انت كريم يا رب.
• نحن فرحانين بي (علي جعفر).
• فاكرين (علي جعفر) دا اقصى حدود الكرم.
• يدخل ليك على المهاجم بالصفحة تقول بحمّر ليه في (بصلة).
• بفك ليك (الكورة) زي (الرحماتات).
• كرم عجيب.
• وفرحانين بي (الريح علي).
• من سجلوه ما شفناه.
• الريح علي قالوا حق (اورنيك) التسجيل ما جابو.
• سجلوه بالخسارة.
• خسارة رسوم ساكت.
• زول قاعد ساي.
• الريح علي دا مرة شفتوا مع (المنتخب)..دخلتو على المهاجم زي (العزومة).
• بقول ليك (جيب قون).
• زول طيب شديد.
• وفرحانين بي (ضفر).
• ضفر لقى ليك ناس بكري المدينة وتراوري وعبده جابر (كلهم من الهلال) بقى
يجيب في الاقوان.
• البلد خلا.
• فرحانين بالدفاع (المفرتك) دا – قاموا جابوا لينا (سيلا).
• الناقصة تمت.
• في كرم اكتر من كدا.
• سيلا قوموه من (النوم).
• زي الزول البصحوه للعشا.
• يقوم نعسان.
• يضرب ليك في (الفول) لمن الله يغفر ليه – وتاني يوم يقول ليهم مالكم ما
صحيتوني للعشا؟.
• يقعد يغالط ليك في ناس البيت.
• قالوا ليك سيلا لغاية ما وصل مباني الاتحاد العام ما عارف الحاصل شنو؟.
• نعسان.
• ما جايب خبر.
• جابوه (نائم).
• فاكر جايبنو يفحص (الملاريا).
• اصلهم وقت دخلوا بيه مباني الاتحاد ..كان عندو (تسمم).
• افتكر مقر الاتحاد (مركز صحي).
• مامون حميدة لخبط الحاجات كلها.
• دخلك دا في دا.
• طلع المستشفيات برة العاصمة ..وعمل ليه مراكز صحية (حقنة) ما فيها.
• بس لافتات فيها.
• المركز صحي تلقى غير (الغفير) ما فيها زول.
• الغفير عاوز يعمل ليه عملية زايدة.
• مراكز صحية – خسارة غفراء ساكت.
• سيلا دخل مباني الاتحاد العام ما فاهم اي حاجة.
• هو داخل كدا – شاف ليك عمر بخيت طالع.
• قال لي عمر بخيت انت برضو عندك (تسمم).
• ما عندو اي فكرة عن (التسجيلات).
• زول قاعد 6 شهور في الاهلي شندي ..اخر كورة لعبها في الموسم الماضي
..يجيبوه عشان يتسجل في المريخ – عليكم الله ما بتمسكو (خلعة).
• دي خلعة اخطر من (التسمم).
• المريخ بقى يسجل ساي.
• قالوا ليك سيلا لمن ادوه القلم وقالوا ليه وقع في الكشوفات …الصحفيين
قالوا ليه ارفع رأسك عشان الصور.
• الحركة البعملوها ناس مهند كمال ومحمد دفع الله دي.
• سيلا حسب (النعسة) قال ليهم كمان (الفحص) بقى إلّا بالصورة.
• البلد دي مالها بقت غالية كدا.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء
سوى رؤياكم الغالية).
• بس الحصل امس دا كارثة عديل كدا.
• كارثة شنو؟.
• كارثة سيول وفيضانات.
• مالكم انتوا؟.
• اطلع من هنا.
• الطريف في الامر (اندرزينهو) قالوا ليك في (سوسة) شغال (تقاطيع)
وتفاصيل …حاجة اصلو ما بتتخيلوه.
• بنزل ليك في البرامج برنامج برنامج.
• الكوكي خلى اهلو – وحرس الزول دا ..قاعد يتفرج في (اندرزينهو) بعمل في شنو؟.
• اندرزينهو قالوا ليك اول حاجة طلبها في سوسة قالوا قال ليهم جيبوا لي
ضفر وسيلا وعلي جعفر وشوال بصل في تونس.
• قالوا ليه يا زول انت جنيت ..الخبّرك بالجماعة ديل شنو؟.
• قال ليهم سمعتوا بيهم.
• الفضيحة ما بتندس.
• شكلو كدا اندرزينهو جاء من البرازيل مخصوص عشان الموضوع دا.
• وواضح كدا ان موضوع (سيلا) الذي ظهر في اخر الدقائق ما واقع ليه في رأسو.
• وشكلو برضو موضوع (السيستم) ما مقتنع بيه.
• سيستم شنو؟.
• انا اول مرة اشوف لي (سيستم) زي الدكان يقفل ويفتح على كيفو.
• قالوا السيستم رفض (الياسو).
• سيستمكم عينة..بفهمها ليكم وهي طايرة.
• حتى (السيستم) ما بقدر يقول حاجة لي جمال الوالي.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء
سوى رؤياكم الغالية).
• بس امس بالغتو معانا.
• يا زول امس حصل شنو؟.
• خلوها في سركم بس.
• خلونا في اندرزينهو احسن.
• احسن ليكم.
• واحسن لينا.
• اندرزينهو قلنا ليه علي جعفر عرفناه.
• وضفر عرفناه.
• وسيلا ذاتو عرفناه.
• شوال البصل كمان لي شنو؟.
• اندرزينهو قال لينا عشان يقطوه.
• سيلا ذنبو شنو؟.
• الزول دا جديد يا اندرزينهو ..ما بقى للبصل.
• ما تبالغ يا اندرزينهو عاوزهم يقطعوا ليهم شوال بصل.
• دي حقارة منكم.
• يعني الجماعة ديل يجوكم من السودان ويصلوا لي سوسة عشان يقطعوا ليهم (شوال بصل).
• اندرزينهو قال ليهم انا عندي فهم في الموضوع دا.
• تجيبوا لي (البصل) قبل (سيلا).
• غايتو يا سيلا ..بتعمل ليك في حاجات اصلو ما مفهومة.
• كنت مرتاح وبالك رايق في الاهلي شندي.
• الجماعة ديل استقلوا انك نائم ..جابوك نعسان وسجلوك في المريخ.
• لو كنت ما نعسان عمليتك دي ما بتعملها.
• راجيك (بصل) تقيل.
• سيلا وقت فتح ..قال ليهم يا جماعة انا كتفى مفكوك ..مخلوع عديل كدا.
• قالوا ليه بي كفتك المخلوع دا احسن لينا من علي جعفر.
• انت يا علي جعفر الناس ديل شايلنها معاكم عديل كدا.
• لكن عشان تبقى فاهم.
• عشان تبقى عارف.
• اندرزينهو قالوا نظريتو في الحياة بتتمثل في انو بجيب (المدافع) وبخليه
يقطع البصل.
• بعدين ما فارقة معاهو كتير.
• المدافع دا يكون ضفر.
• يكون الريح علي.
• يكون علي جعفر.
• يكون (سيلا).
• اصلو ما فارقة معاهو في شيء.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء
سوى رؤياكم الغالية).
• بس بالغتو معانا عديل كدا.
• أها الخريف بجيكم ح تقولوا شنو؟.
• عشان حركاتكم دي بتجيكم المطر.
• تستاهلوا.
• ح تقولوا الخريف جاكم مع رمضان – عشان كدا اتلخبطو.
• بي طريقتكم.
• شوفوا ليكم صرفة.
• نحن فترنا من الكلام الكتير.
• ………..
و
• مباريات اعداد الهلال ما متلفزة.
• القناة التى سوف تتلفز مباريات الهلال ح تكسب دهب.
• اول مباراة للهلال في الممتاز يوم 20 يونيو.
• امام الاهلي شندي.
• الجمهور على موعد من الابداع والروعة.
• ووليد الشعلة.
• يا جماعة ما تنسوا جوليام.
• كمان الزول دا بجيب في اقوان عجيبة.
• ما بطلع ساي.
• ……….
• السيدة (ل)..ما في حاجة نقولها الليلة ..احسن نسكت.
• وقرّض على كدا