تهاني: مافي زول جابرك على متابعة (أغاني وأغاني) ..عندك 1000 قناة شوف البترضيك

منتهى الانصرافية!
مما بدأ رمضان دا وبدأت برامجه العجيبة في الفضائيات السودانية ، الناس ما عندها شغلة ومافي شئ شاغلها غير برنامج (أغاني وأغاني) .. وتحول المشاهدون السودانيون (بقدرة قادر) إلى محللين ، ومؤرخين ، وخبراء موضة ، وخبراء ملابس ، وخبراء اصوات ونوتات موسيقية ، وتلحين وتوزيع ، ومخارج حروف ، ومش كدا وبس!! كمان حولوا النقد الفني الغنائي لنقد (شخصي) !! سابوا الأغنية ومسكوا في (الفنان) وطريقة لبسو ..وطريقة قعدتو !! يلا اديكم نماذج من (النقد الفني والاجتماعي المنتشر في الفيسبوك): عليكم الله (طه سليمان) دا صاحي ؟ ما بالغ ؟ شوفوهو لابس شنو؟ وعاينو لشعرو؟ هو ذاتو ما بيعرف يغني ..بجعر ساااي ! اهسي دا غناء ليك يا حسين الصادق؟ البنطلون دا ما قصيروني كدا ؟ مالك شاحدو ولا دا حق اخوك الصغير؟! السر قدور دا خرف ولا شنو ؟!!! ياخي البت دي غناية خلاص!! ياخي فلان داك مفروض تاني ما يجيبوهو يغني!! ياخي دا (أشتر) والتقول بالع ليهو (صفيحة رملة) وحلان شديد في الغنية ديك!!! هييي شوفو (عصام) مالو منطط عيونو كدا التقول خلعو (بعاتي) … قدور دا فكت منو وحقو يمشي يشوف ليهو مصلاية وسبحة ويشوف آخرتو !!!! الليلة فلان داك غايتو عذب الاغنية دي عذاب وبهدلها بهدلة خلى سيدها يتقلب في قبرو!!!!!!!!!!!!!

وجهة نظري الخاصة :
يا شباب خلوا الخلق للخالق.. انتو مش بتحبوا (الحرية)؟! خلاص احترموا حرية و(حقوق الآخرين) في اختيار ملابسهم وطريقة تسريحة شعرهم؟ واحترموا ذوقهم في اختيار ألوان ملابسهم ! الفن دا يا شباب للترفيه والتسرية عن النفس.. ما للغم والنبذ والنكد والانتقادات البلا طعم دي .. !
وبعدين اصلا إذا البرنامج‬ ما عاجبك .. ولا عاجبك لبس الفنانين.. ولا التلحين ..ولا الأداء ..ولا الأصوات.. ولا حتى قعدة الفنانين.. خلاص أمسك الريموت كنترول دا وامشي فتش ليك حاجة تعجبك وتستمتع بيها ومافي أي زول جابرك على متابعة (أغاني وأغاني) ..عندك 1000 قناة شوف البترضيك وبتبسطك وما تجي تخش الفيس دا تكرهنا بالانتقادات والانطباعات السلبية والتنظير الما عندو طعم دا ! ويا ريت الناس تبتعد عن (الشخصنة) وتنتقد (نقد موضوعي وبناء) وما تقعد تسيئ للآخرين بقصد أو (دون) قصد ..

تهاني عوض