محمد الطيب الأمين: هو ومعاهو (نفق عفراء) أولاد دفعة

سودافاكس- الخرطوم : * في السوق هنالك مجموعة من التجار يطلقون عليهم اسم (الشامل) .
* (الشامل) زي (الريموت بتاع التلفزيون) .
* في ريموت بشتغل مع أي جهاز ..
* اسمو الشامل .
* بشغل أي جهاز ما عندو مشكلة .
* بيشغل الدانسات .
* والتوشيبا .
* والناشونال .
* و ال اتش دي .
* ريموت (جوكي) ما عندو (قشة مرة) .
* بنفس الفهم ده في تجار زي الريموت ..
* بتاجروا في كل حاجة .
* بصل .
* عنب .
* طماطم .
* منشات عربيات .
* زيت سمسم .
* خرفان في عيد الأضحى .
* قصب سكر .
* ركشات .
* سكر .
* بنزين .
* دقيق .
* عجوة محس .
* سيوترات .
* بخشوا في أي حاجة .
* حسب الموسم .
* وديل بصراحة خاربين السوق .
* يشتروا البنزين أيام ما في أزمة ويبيعوهو أيام الأزمة .
* يكون شغالين في البنزين والدنيا صيف ويخزنوا (سيوترات البرد) .
* يجي البرد يشتغلوا في السيوترات ويخزنوا في مكيفات الصيف .
* وهكذا .
* ديل هم الطلعوا الأسعار السماء .
* تسأل من (السيوتر) تلقاهو أغلى من البطانية .
* تسأل من البطانية تلقاها أغلى من النظر .
* ديل بيدخلوا السوق عشان يبقوا أثرياء من موسم واحد .
* الواحد من (سيوترات الشتاء) بس عايز يركب ليهو برادو .
* من تجارة (التلج في رمضان) عايز يركب ليهو توسان .
* ما بيهمهم المواطن .
* ولا عندهم شغلة بظروفنا الاقتصادية القاسية جداً .
* عادي .. تاجر بلح تلقاهو الأيام دي شغال سيوترات .
* بتاع مصنع تلج تلقاهو شغال بطاطين .
* وبما أن ذلك كذلك فنحن ننقل فكرة هؤلاء التجار لناس المريخ .
* المريخ يفترض يستثمر في روحو .
* يستثمر في زمنو .
* يلعبوا التمهيدي، ويطيروا من التمهيدي يقوموا يأجروا الإستاد .
* أول ما تطيروا من التمهيدي أجروا الإستاد .
* في إحدى ولايات السودان القريبة قالوا في اتحاد كرة قدم فرعي .
* الاتحاد ده لما يجي فصل الخريف بيزرعوا الإستاد (فول سوداني) .
* والله صحي .
* بعد الحصاد بيرجع إستاد عادي .
* يحشوا الفول ويستأنفوا الدوري .
* في أمان الله .
* هسه إستاد المريخ ده السمسم بينجح فيهو .
* أرضية إستاد المريخ بتنجح في السمسم.
* سمسم أو فاصوليا .
* ممكن سنة تزرعوا سمسم وسنة فاصوليا وسنة بامية .
* لأنو بالمنطق كده ما ممكن فريق يطير من الشهر الأول في الموسم ويقعد ينتظر سبعة أشهر عشان يشارك في الموسم الجديد ويطير برضو من الشهر الأول .
* لازم تستفيدوا من الزمن ده .
* دي ستة أشهر كاملة .
* ما ضيعوا زمن .
* الكورة دي ما عندكم فيها قسمة .
* هسه لو من يومكم الطرتو من التمهيدي لو زرعتوا نجيلتكم الوهمية دي، لو زرعتوها (بصل) كان أموركم وضحت .
* على الأقل تجددوا عقودات اللاعبين المنتهية .
* والزراعة فيها قروش .
* ما عارف أنتو بتصبروا كده كيف .
* معقولة فريق يطير من الشهر الأول ويقعد ينتظر ستة أشهر عشان يشارك (صحبة راكب) ويطير تاني من جديد؟
* نصيحتي ليكم استثمروا هذا الإستاد الحكومي .
* إستادكم ده من أغلى (ذكريات حكومة الإنقاذ) .
* إستادكم و(نفق عفراء) أولاد دفعة .
* عملتهم الحكومة السابقة ومعاهم طريق الصادرات (أم درمان بارا الأبيض) .
* وإستادكم ونفق عفراء وطريق الصادرات كلهم مواسير .
* وأصلاً الحكومة السابقة ما عملت حاجة نافعة .
* تشوف شوارع الخرطوم الأيام دي تحلف تقول البلد دي ما سكانين فيها بشر.
* الشارع عامل زي (طبق البيض) .
* حفر ودقداق وسجم ورماد .
* المهم .
* استثمروا في الإستاد، في موسم الأعياد اعملوهو محل مناسبات .
* افتحوا للحفلات الجماهيرية .
* المسرح القومي بيدخل الشيء الفلاني .
* افتحوا الإستاد حدائق.
* زي حدائق (حبيبي مفلس) .
* اسمها حدائق (أبوي بشوفني) واسم الدلع (حبيبي مفلس) واسم الشهرة (حبيبتي ما بتستاهل) .
* التفكير سبب النجاح .
* طيروا من التمهيدي وشغلوا الإستاد والعبوا الدوري المحلي في دار الرياضة وإستاد الخرطوم .
* كده كده نجيلة إستادكم لا تصلح لكرة القدم .
* وكده كده أنتو بتشاركوا في تمهيدي الأبطال بفضل الهلال .
* عندي ليكم مقترح .
* نظبط ليكم نجيلتكم ونشيل رمضان عجب والتش .
* هكذا بقترح .
* وأي زول طبعاً حر في (مقترحاتو).
* وتبكو بس.. عين قطرة وعين مس .
* ونركب صافنات ونجيبه (مزارعية) وأصلو الزول بيموت والذكرى تفضل حية.
* و..و..
* وجينا نخت أيادينا الخضراء فوقك يا …… (إستاد الحكومة).

نقلا عن : باج نيوز