وعدتك بالمطر و الليل – نضال حسن الحاج (فيديو)

وعدتك بالمطر و الليل
نضال حسن الحاج(فيديو)

وعدتك بالمطر والليل تراها أتفاوتت مُدُني
ونزف غيم المواجع سيل
رجيتك تهدي موج الريد تكفت إندفاع النيل
ولا ساسق عليك غناي ولا وعد انتظاري مُقَيِل

وناديك هـيا فتر الغنا المكتوب على الأعماق
وغنيتك شلت عيونك السمحات علي تعب المسافة غيوم
ولوليتك قِنعت من القمر وكتين علي طليت
وحجيتك بحجي اليومي فرحانابو قافيات الكتابة قصيد
واحجي الما بي يسأل وين عشان فاتحالو الف وريد
واحجي فرح سنين عمري ملاذ ايامي صدق الريد

وناديتك ولا فرقت معاي مدنك عشان جوايا كت محسوس
ووين ما هرجل التعبير بكورك فيهو يلا جلوس
ايا الساكن جواي مرتاح علي زمن الوجع ممغوص
تخاف كيفن من الايام إذا كنت في حشاي مدسوس

وسُقتَ القمرة وريتا أنا وشفع هواي مارقين
فما تنشري فينا نفس اخير لينا نمشي مستورين
وغالطني الضلام فيني وحلف انو انتظارك شين
وتاتيت الصبح بالدس عشان أنا وانت متفقين

وجيتك والشمس وقفت تتاوق لينا بالرقراق
وجيتك ما براي ابدا! معاي صدر البُعاد الضاق
معاي مليون قصيدة حلم وكميات من الاشواق
معاي جيش الوجع مفرود وصبراً مر ولا بنطاق

دحين فتق دهاق وامرق بجيلك فيني واتحداك
اذا كبرت قواك جواي فما تتحدي ريدي كفاك

جواي مليون غرام مكمون
بدسدس فيهو من يوم داك الي حين ينتهي الطوفان
وأفج موج الحزن وألقاك وأوريك ياما يا إنسان
بعاني القاسيه واترجاك … اذا موعود معاي بي بُن
علي شرف اندماجي معاك جَبَنتك تغلي فوق النار
وتشرب بِِـكري فيني جواك

وعدتك بالمطر والليل وتاتيتك علي الإحساس
وما ناديت معاك بشر لأنك انت كل الناس
وإذا ذاكرتي ما بتنساك إذاً ما فيدة الكراس
معاك ما احتجت لي بُن لأنك أنت كيف الراس
وكيف بحتاج معاك لي بن اذا كت انت كيف الراس

https://youtu.be/ZGMSlXDfsSU