وئام كمال الدين-شيطان الكلمة (فيديو)

وئام كمال الدين
شيطان الكلمة

شيطان الكلمة الإتلبس لسنات الحال القولا نفاق..
واللهفة المن بدري اتهبشت بالمس الصابا من الأشواق….
خلو الدمعات الشاشا خفيف تغلب لققاطا من الدفاق…..

و يا دنيا قدر ما أجري عليك القاكي بتتلقيني محن…..
وأنا لي في زارك ديمة وطن…..
في حوبتك أنا بتجنن جن واتعولق في زارك عولاق……

و أنا … كل ما أرفع راسي واقوم
تردمني مصايبك يمة هموم…..
واتشابى علي طاقات اليوم ما أصلو الشوق جواي تاوااااق….

بيتاوق لي حاضرنا الني…..
مرات القاهو بتاوق لي……
وينسسل من جواي الضي كان يوم اجتاح الضي رقراق…..

ويللوم زمنا جار بالحيل…..
وإتذكر زمن المليون ميل…..
يا زمن الحسرة الملت النيل……
أنا شن سويت شان كل ما اقول أملاكا وصال تكبسني فراق……

وأنا لامن بعت الحس والصوت كت لين وبلعق في جروحي……
وما كت قايلني ببيع روحي……
أنا بعت السم قبال بوحي…….
وخابرين طباخ السم ضواق…..

وأنا ضقت الذل كشحت دموم…….
ونزلت عليك في الزار محموم……
ترميني و أقوم ترميني و أقوم ……..

ماالدم الساند الجوف اتراق…..
والحن المالي الطين ما حاق……..
حرفي الممسوس غبى وما فاق
وشيطان الكلمة الإتلبس لسنات الحال القولا نفاق
واللهفة المن بدري اتهبشت بالمس الصابا من الأشواق
خلو الدمعات الشاشا خفيف تغلب لققاطا من الدفاق