في وقت متاخر من مساء الاربعاء، استنجدت فتاة بقروب احترس امامك كشة عقب شجار و اساءات حدثت لهم من قبل سائق ترحال تعدى عليهم بالفاظ و باليد.
وكتبت صفاء حمد
Tirhal خدماتكم سيئه وشغلكم مابروفشنال وشبكتكم كعبه واليوم اتعرضنا لي اعتداء من قبل واحد من السواقين المعاكم وتم الاتصال بالشركه كذا مره بدون رد .. حنفتح بلاغ في الشركه وحنقاضيكم بالقانون عشان تعينو ناس اسوياء عقليا.. والموضوع حيبقي رأي عام عشان تعرفو تحترمو زباينكم
الحصل كالاتي.. طلبنا مشوار مفتوح من حته لي التانيه.. وصلنا الجهه المقصوده وطلبنا معرفة الحساب عشان ندفع.. الكابتن علق بي انو الشبكه معلقه ما دايره تشتغل معاو.. طيب يا كابتن ممكن تتصل بي ناس ترحال توريهم انو الشبكه معلقه ومادايره تجيب قيمة المشوار.. قال لا انتووو تتصلو بيهم ما انا.. قلنا ليو انو نحن ماعارفين رقمهم كم بس عندنا معلومه انو الكباتن عندهم اتصال مخصوص للمشاكل الزي دي.. رفض يتصل تماما وقال لينا اتصلو انتو .. قلنار ليو طيب تدينا رقمهم قال لينا (بتركبو ترحال سااااااااي انتو وماعارفين رقمو) .. يا مولانا اختصر الموضوع وادينا الرقم عشان نتواصل معاهم رفض.. قوقلنا الرقم واتصلنا كذا مره وماف رد
قلنا ليو طيب انهي المشوار وحنستني لحدي ما الشبكه تجمع لانو كدي حندفع قروش كتيره ونحن اولردي وصلنا لينا اكتر من 20دقيقه .. قال (تدفعو ولا علي كيفكم.. عندكم اب مشكله امشو الشركه تحلها ليكم دي ما مشكلتي)
كيف يعني ما مشكلتك ونمشي الشركه وانت رافض تتصل عليهم بي الاتصال المخصص للكباتن ورافض تنهي المشوار وسبحان الله الشبكه عندنا شغاله وانت بس المصر انو الشبكه كعبه..
بعد نص ساعه من التعامل السئ قرر انو ينهي المشوار مع انو قال الشبكه ما شغاله!!! وقال لينا مبلغ كبير .. قلنا ليو ياخ نحن وصلنا لينا زمن وانت عارف انو المبلغ دا اكتر من حق المشوار .. كان ردو الاتي ( انتو معفنين وصعاليق وعاملين مفتحين وطالبين مشوار مفتوح عشان تجي القروش بسيطه ) هنا قاطعناو وقلنا ليو انو زول مامحترم ونحن حنديك القروش بس( ماعافينها ليك) واثناء مابنحسب في القروش مسك يد صحبتي وجرا القروش لحدي ماعمل علامه في يدها وبقي يهدد انو هو في الامن وانو حيعمل لينا ويترك لينا وتاني لو نركب ترحال يبقي هو ما فلان وتهديدات بالصوره دي..
هنا اتلمو مع الجوطه الناس الموجودين في الشارع وجو سألوهو الحاصل شنو.. رد علي الاولاد في الشارع بالفاظ سيئه وبقي بكورك وبتجاري وبقول لو رجال تعالو اضربوني وقصص كدا حقت زول ما طبيعي.. طبعا لانو الاولاد فجاه نبذهم بدون سبب دخلو معاو في اساءات وضرب وناس بقت تحجز لحدي ما جري وركب العربيه ..
صاحب المكان الوصلناو موثق الحدث الحصل بالكاميرات.. والناس الجو اتكلمو معاو قالو حيشهدو بالتصرفات الاتصرفها معاهم دي وبالاساءات حقتو ليهم ولينا..
اتصلنا بي ترحال كتير عشان نشتكي ونعرف التصرف القانوني حسب سياسات شركتهم شنو ماف اي رد
زي دا خطر يكون سايق ناس ومسئول من ارواحهم ويعكس صوره سلبيه عن الشركه بالطريقه دي
عموما نحن ما حنخليك وحنواصل في اجراءاتنا القانونيه عشان تاني الزول يحترم باب الرزق الربنا فاتحو ليو ويحترم زباينو البتعامل معاهم
المصدر: https://www.facebook.com/groups/764001197004392/permalink/4486565231414618/
