هل هي شبكة احتيال بين موظفين من زين وبنك الخرطوم ؟
فجاة تتقفل شريحتك وتتفاجأ ان قروشك بالبنك اتسحبت ؟
قصة مأساة ضحية الاحتيال
كتب محمد دفع الله أحمد
Mohammed Dafaalla Hamid
عندي خالي يوم الوقفه شريحتو قفلت لا اتصال لا استقبال بكل بساطه افتكر المشكله من التلفون مشي الصيانه لقى بتاع الصيانه قال ليهو شريحتك اتحرقت! امشي طلعها والدنيا كانت عيد والمكاتب مقفله!
المهم حاول يفتح حساب بنكك عن طريق الواي فاي عشان عندو التزامات لقى التطبيق قافل وتم تغير كلمه السر ! وهنا لازم تحس بالرعب انو انت مخترق من كل الجوانب كلمه سرك في السهله معلوماتك في السهله شقى عمرك بضيع قدامك! حاولنا نتصل بي بنك الخرطوم عشان حسينا بالخطر طبعا انت سيد الحساب إذا عايز تعمل تغيير كلمه سر أو تحاول تقفل حسابك عشان تمنع الاحتيال ممكن تقعد ساعات في الانتظار والاسئله اما اذا في زول احتالك وسرق شريحتك يقدر يغير كلمه السر في ثواني!
الدوله للأسف قاعده في السهله والنظم المصرفيه ما آمنه وفي عصابات في كل الانظمه دي بتاكل أموال الناس بالباطل.
عادي في البلد دي ممكن تعب سنين وشقي وشغل في البلد دي زول يشيلو في نص ساعه بي فهلوه وصعلقه وقله أدب في دوله ما بتحترم المواطن.
نحن يا ساده للأسف شالو قروشنا حمره عين وطلعو شريحتنا وعملو بدل فاقد وغيرو كلمه السر وشالو القروش ونحن بنتكلم مع موظف الكول سنتر عشان يقفل الحساب بكل برود بقول لينا الا تتصل من نفس الرقم!
يا شاب انا شريحتي اتحرقت!
يوم الاتنين اول ايام الشغل بعد انتهاء عطله العيد مشينا البنك إذ بنا نتفأجا انو اتسحب مبلغ 20 مليون و 300 الف ج
(20 مليار بالقديم) ودخلنا في دوامه الإجراءات القانونية العقيمه وانت ما معروف قروشك مشت وين.
عندنا اسئله منطقيه بنطرحها ع شركه زين كيف الشريحه طلعت بدون إثبات شخصيه؟ مزوره؟ حدد لي الموظف القام بالعملية وشغل الكاميرات وريني الزول الزورها؟.
سؤال لبنك الخرطوم كيف للمحتال بي كلمه سري القديمه لو افترضنا انو عرف كل بياناتي كلمه السر القديمه عرفها كيف؟
كلمه السر انساها الكفوميشن نمبر عرفها من وين؟ كل انساها قدر يغير كلمه السر بسرعه كيف؟
المهم نحن بنحكي القصه دي ونحن بدينا إجراءات قانونيه نحاول نرجع حقنا عايزين نحذر الناس عشان ما يحصل ليهم نفس الحصل لينا وفي نفس الوقت يساعدونا ننشر القصه احتمال تلاقي مسؤل يحلها.
وان شاء الله ما يحصل مكروه لي انسان
البنك بنك الخرطوم
شركه الاتصالات زين
العصابه
المهم نحن ما ح نتهم زول أو جهه حاليا بس احب اطمن كل الأطراف انو نحن ح نصل معاكم لي أعلي درجات التقاضي حتى لو على جثثنا.
محمد هاشم الحكيم
