دق الدلجة – محمد عبد الماجد – جابوا لينا (مطرة) مع الفطور

من رأسي :

لمن تشوف ليك زول في رمضان راكب ليه (عجلة) نص النهار ، طوالي بيتخيل ليك انو (العجلة) دي فاطرة!!.

من كراسي :

(ولا يحول بيننا وبين السعادة، إلا العفاريت الكامنة فى أعماقنا).

نجيب محفوظ في (أولاد حارتنا)

ناس (التوم ود فتر البحر) …فطورهم بي (مطرتو).
بشوشين ..وطيبين شديد ..وما بتسمع منهم كلمة بتغلط عليك.
قراصتهم بتنزل ليك في البطن زي (الرصيد).
جنبلق تقع جوة.
ما في حاجة بتوقفها.
تتبلع ليك زي (اضغط نجمة وشيل اللغمة).
بسيطين…وما عندهم مشكلة مع زول.
وما شايلين ليهم هم في الدنيا دي.
الناس في البلد دي كدا.
بس ساكت مرات العيشة بتصعب عليهم ..وبغلبهم البسواهو.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
ناس التوم ود فتر البحر (لقمتهم) في الشارع.
وميوتهم تلاقيك ..من على بعد (4) اميال.
ناس كريمين ..(صوانيهم) بتتخابط في الشارع متل (الواو الضكر)..
الصينية لو قعدت فيها (7) شهور ما تقوم منها.
جرادل الموية …تتحاوم بلا عدل.
لو قعدت معاهم في (صينية) …الصحن لو ما بقى زي (مراية) اللوري الهينو ..ما بخلوك تقوم.
الصابونة لو ما كملتها في ايدك من (الغسيل)..ما بفكو (الابريق).
شفعهم اتعلموا الخاصة دي.
سيدة بنت حمد ..زولة (طعّامة) شديد.
ايدها طاعمة.
سلطة الروب بتعملها ليك بـ (19) طعم.
لمن اذان العشاء يأذن ما بتفهم حاجة.
ولا بتعرف شيء.
في حلتنا ..الناس كلهم كدا.
عمر ود زحم الضل …عندو (عراقي) واحد – لكن الزول دا يلاقيك قدام بيتو تحلف تقول خزان الرصيرص مسجل بي اسمو.
ما بفكك لو ما دخلت البيت اكلت ليك (لقمة).
يا زول هي الدنيا فيها شنو؟.
مالك جاري كدا؟.
لاحق شنو؟.
الدنيا طايرة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
امس صبت (مطرة) – قعدنا نفتش لينا في مناسبة.
مناسبة عشان (المطرة) دي.
نحن اصلا ما قاعدين نفوت (المطرة) ساكت.
المطرة صبت ..قلنا يا ربي دي مطرة شنو؟.
العشرة الاواخر.
الخير بسع.
والجو ذاتو اتصلح.
نحمدك يا رب.
لا عاوزين كهربتكم.
لا عاوزين مويتكم.
بنحلها من فوق.
يا ما انت كريم يا رب.
محليج ود الطيب ..فتح تلفونو ..لقى نزل ليه فيه رصيد بـ (100).
محليج ود الطيب استغرب وما عرف الرصيد دا جاهو من وين؟.
الجماعة ديل بقوا يفكوا (ارصدة) ساكت كدا.
مالهم عاوزين يبقوا زي (مصعب عمر).
رمضان كريم!!.
في واحد مننا دائما مستعجل ..قال لي محليج ود الطيب ..(الرصيد) دا جابتو ليك المطرة دي.
مطرة بي (رصيدها)…ما شاءالله وتبارك الله.
شلنا لحفاتنا وطلعنا برة.
قعدنا نستغرب برانا.
استغربنا في الدنيا دي جنس استغراب.
هي الدنيا دي فيها شنو غير (الاستغراب)؟.
الاستغراب وسلطة الروب.
الواحد فينا من يقوم الصباح – لمن تغيب بكون قاعد (مستغرب).
لكن برضو ما قلت لينا (مناسبة) المطرة دي شنو؟.
يكون هدف شيبولا الاول.
احتمال.
الزول دا جاب ليه (هدف)…جمال سالم المسكين عندو (تلاتة جنسيات)..قالوا ليك بعد الهدف دا (جنسية) واحدة ما لقاها.
الرقم الوطني ذاتو طار عليه.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
وكان لي مصعب عمر …والله ناس المريخ ديل ما خلوا لينا فيه شيء.
الجماعة ديل ..فكوا (اسامة ونسى) وقبلوا على (مصعب عمر).
قطعوا مصعب عمر قطيع.
حقارات بس.
دي ما عندي ليها اي تفسير تاني غير (حقارات).
مرة حضرت لي (فيلم هندي).
زمن الافلام الهندية البتكون ترجمتها ما واضحة.
قعدت احضر في الفيلم الهندي.
ما فهمت فيه اي حاجة.
وما قادر اقول ما فهمت شيء.
كتمت ليك الموضوع في قلبي.
لمن الكهربة قطعت ..اتبسط ليك ..ولقيت لي مخرج…قلت الحمدلله جات منكم.
قلت في نفسي والله فيلم زي دا خسارة الكهربة ما تقطع فيه.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
والمطرة شغالة…
ونحن طلعنا بي ملامحنا القديمة ديك.
ناس (غبش) كدا.
الشقاوة ظاهرة في عيونا.
شايلين (سفنجاتنا) في ايدينا.
وقمصانا (زرارة) واحدة ما فيها.
لونها (رمادي) ما عشان طبعها كدا.
ابدا ..لونها (رمادي) من الشمس.
الشمس قلبت لونها.
مع ذلك فرحانين بيها.
بنمشي بيها الحفلة يوم الخميس …وما بنقبل فيها كلمة.
اتقرحت.
واتشرطت.
وبرضو مبسوطين بيها.
فيها (دفيق) بتاع (بلح).
وحبر.
وزيت اسود.
مع ذلك وقت ننزل بيها في (الحفلة) ما بنسأل في اي (عريس).
بنمشي البحر.
مرات نمشي عشرة ..نرجع تسعة.
عادي الكلام دا بيحصل.
بيكون فينا واحد غرق.
البحر كلو يوم بشيل مننا واحد.
مع ذلك البحر (حياتنا) وما بنعيش بدونو.
بنحبو.
وبنكتب ليه في (الجوابات) الغرامية.
بيكسر لينا اليوم.
زمان ..يومنا في رمضان بنكملو في (البحر).
لا كهربة.
ولا مكيفات.
ولا حتى (مراوح).
بنمشي (البحر) – نقعد يومنا كلو.
لمن تقرب تمغرب بنمشي البيت.
بقولوا لينا يا اولاد كنتوا وين؟.
بنقول ليهم كان عندنا مذاكرة في المدرسة.
الحاج كان بقوم يعاين لينا ..بقول لينا مالها (المذاكرة) دي خلتكم (غبش) كدا؟.
بنقول ليه يا حاج كنا بنذاكر في (حوض النيل).
الحاج بفهم الموضوع.
لكن بتعجبو (المخارجة).
بقول لينا اعملوا حسابكم من (المذاكرة) دي – يوم داك (غرقوا) فيها (11) طالب.
نحن نسكت.
وما نعرف نمشي وين؟.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
امس اتقاسمنا (المطرة).
طلعنا بيها (الشارع).
المطرة زي بتشبهك وقت تعملي خطين تحت الجواب.
لمن تعملي فيها ما عارفة حاجة.
عشان كدا ..قعدنا (نستغرب) ليكم.
في واحد من اعمامكم الكبار ديك ..قال لينا يا جماعة ما تقعدوا تستغربوا لي هنا.
قلنا ليه نحن لو ما استغربنا هنا ..بنستغرب وين يعني؟.
الكهربة قاطعة.
والموية (طين).
ورشوشة (مطرة) ساكت …قفلت شوارع الخرطوم.
غايتو السنة دي – الله يستر عليكم من (الخريف).
والي الخرطوم مركز مع والي المريخ.
الله يستر من (الخريف).
استعدادات الولاية للخريف كلها عملوها في لجنة تسيير المريخ.
جايبين ليكم (26) عضو ..عشان يفرتكم ليكم (سادومبا).
والله سادومبا يوم المباراة لو لقى (المطرة) دي ..كان لغاية الآن يا ناس المريخ بتحسبوا في الاهداف الدخلت مرمى جمال الوالي.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………….

و

علي جعفر (الاصابة) شافتو.
علي جفر ..مرقتو اصابتو.
هسع الكلام البقولوه في مصعب عمر دا ..لو كان علي جعفر مشارك ..كلو كان قالوه فيه.
في عالم محظوظة.
……….
السيدة (ل) – لمن تغيبي بتحضري بي كل حنان.
وقرّط على كدا.