بقلم/صبري محمد علي (العيكورة)
(سمح النلايقو ليك يا العشا)
عبارة إعتاد الكوامر من امثالنا على سماعها من الامهات والخالات والحبوبات في زمن غابر عندما تحين مواعيد وجبة ما
و(الملايقة) لاحفادنا من جيل (البيرقر) و(الهوت دوق)
هي (ميكانزم) بسيط جداً يا حبيبي يصاحب استواء اللحم والبصل و (متزامنتن) مع ذر الويكة وإعمال الكُنُش او المُفراكة لتحصل الست على مُلاح (ويكة) مُتجانس القوام وطاااعم
الغريبة وان كانت هذه العملية(الملايقة) تبدو بسيطة لمن يشاهدها ولكنها تعتبر اهم امتحان للفتاة قبل ان تطمئن امها و تسلمها مسؤلية اعداد (الحلة) برمتها
و(يا ويلك يا سعاد) ……
لو حدث ان الويكة (دردمت) منك ذات يوم
فتلك محاضرة قاسية ومؤلمة سيصاحبها تصوير صوت وصورة وسط شماتة اقرانها من الاشقاء داخل المنزل .
محتوى مدفوع
السودان يصدر أول شحنة لحوم مبردة للجزائر
موضوع (الملايقة) …
يعتبر الاعلان النهائي والاخير لاقلاع الصينية . وايضاً تعقبها لمسات ست البيت عندما تزينة ب
(وش المُلاح)
والله يا ابني …
ما تسألني تقول لي (وش كيفن)
لقيناهو كده وحفظونا ليهو كده
اااي اسمو وش الملاح !
طبعاً …..
كلما طالت مدة غليان (الحلة) على نار هادئة و بنظرية اختلاف كثافة السوائل ستتجمع الزيوت اعلى السليقة لتلتقطها كمشة الست بكل هدوء وبمهارة فائقة و تجمعها لتشكل (وش الملاح)
افتكر لغاية هنا ما قصرت معاكم .
طيب …
ناتي لموضوعنا …
ونوجهه مباشرة للسيد الفريق البرهان !
ياخينا .. ياعمنا
الحكاية دي حا (تلايقا) متين؟
الناس دي ما نجضت وصبرها كمل
واقصد بها تشكيل الحكومة !
(لايقا) ياخ ….
واعفي هؤلاء العطالة من الوزراء والولاة
حكومة بخدمات صفرية و رواتب ومخصصات باهظة
(وكمان جابت ليها سمك) !
لا وكمان …..
كل زول جاب خالتو وعقابو وكاسرين رُكب في بورتسودان
نظام نحن اهل الوزير وكده
يا عمك …!
ده على حساب منو الكلام ده ؟
وبعملو في شنو ؟
و خدمونا بي شنو؟
(لايقا) ياخ ….
وفكنا من هذه البلوى
وحتماً (ابو تمام) دقس حين قال
قد يُنعم الله بالبلوى وإن عظمت
ويبتلى الله بعض القوم بالنعم
فنحن بلوتنا في وزرائنا و ولاتنا لا تضاهيها بلوى
والله يا ابو تمام ياخ ….
وما شايفين لينا نعمة خااالص مع
(التلايف ديل)
(٦) شهور و راتب واحد !
معقولة!
إنت متخيل معاي يا سعادتو؟
تفتكر من خرج من الخرطوم بجلابية واحدة
تفتكر كم خيط سيكون قد تبقى له منها ؟
ولن أسألك عن الملابس الداخلية ! افهمها كيف ما شئت
اتحدى …..
جميع وزرائكم يا برهان ان يكون واحد فيهم (فطه وجبة) واحده
ياخي ….
حسوا بمعاناة الشعب و اوجاعة وامراضه وبطلوا
الجرجرة والتسويف !
ياخي قُشهم
قشاهم بلا ياخدهم
استغفر الله العظيم
صحيفة الانتباهة