شن الناشط على مواقع التواصل الاجتماعي الشهير بالانصرافي هجوما عنيفا على قيادات الجيش بسبب عدم التحرك و تحرير المناطق من قبضة الدعم السريع قائلا:
أمدرمان ..
كل يوم تدوين ..
السيد اللواء الظافر ماقادر يعمل حاجة استجابة للسادة في القيادة ..
آخر شغل لسلاح المهندسين كان تحرير الاذاعة .. ودا أصلا شغل مخالفة تعليمات من العمل الخاص وفرقة تكساس وفاغنر ..
شغل جامعة أمدرمان واقف .. وعندنا قوة كبيرة جدا من بداية الحرب مافكوا وللا طلقة ..
في قوات خاصة .. تحت قيادة اللواء الحفيان بينهم وبين تحرير سوق ليبيا خطوة واحدة بس ..
واحنا في صباح يوم جديد .. الجيش القاعد في سلاح المهندسين بشرب الشاي والشيشة داخل الدفاعات المنتشرة في حى المهندسين
والتدوين شغال ..
وهناك قناص قاعد في عمارة اكتر من سنة ماف زول قادر يعمل ليهو حاجة ..
لانو الجيش ماعايز يحرك دبابة ينتهى منو ..
كنا علي مشارف تحرير الصالحة .. يعني نهاية الدعم السريع في أمدرمان
لكن مستحيل القيادة تسمح بتدمير المليشيا في أمدرمان ..
سوق ليبيا .. ممنوع الجيش يتقدم
جامعة امدرمان الاسلامية .. ممنوع الجيش يتقدم
قندهار .. ممنوع الجيش يتقدم
لكن القيادة تسمح للمليشا تدون كرري .. القيادة تسمح للمليشا تحاصر شمبات ..
القيادة تسمح للمليشا .. تمنع الدواء عن سكان بري والجريف وناصر
والناس المحاصرة أصلا بتموت بي ملاريا وحمى ..
الجيش .. اذا ماعايز تتحرك اقلع الكاكي وادي سلاحك لي راجل عايز يتحرك يحرر البلد دي من دنس التمرد
الفرقة التالتة شندي ..
عندهم مشكلة في القيادة .. في خلافات
لكن الجيش وقيادة الفرقة متفقين .. انهم مايتحركوا شبر
كل محاولات تحرير المصفى .. مخالفة تعليمات
حتى اليوم لم تقم القوات المسلحة بعملية جادة في تحرير المصفى
برضو منتظرين القيادة .. ابسط مهمة تحرير حجر العسل
ماقادرين يتحركوا لي حجر العسل تفتكر ديل بركزوا بعدين
شايفين العدو متحرك عليهم .. من حجر العسل المعاقيل شندي
ولسة قاعدين .. خلي ليهم الحليفة والطلاق
رحم الله محمد صديق 🇸🇩
نفس القيادة المانعة حركة جيش الكدرو وجيش حطاب
نفس القيادة الماعايزة تحرر مدني .. وللا ترجع السوكي او الدندر
سنار النار .. الناس فاكرة المشكلة في اللواء ربيع .. ربيع اتخارج
وبرضو الجيش واقف في تخوم جبل موية .. طيب السبب شنو الجيش ما حرر جبل موية ..
لانو القيادة بتعرف تصدر امر انسحاب من جبل موية في خمسة دقايق لكن نفس القيادة خمسة شهور ماقادرين يصدروا امر بتحرير جبل موية
جيش العماس ناس القضارف .. دا كان أفضل جيش اسمو جيش الشرقية
اسي كلهم بقوا عماس .. قاعدين ساي
سألنا العماس ماعايز تتحرك لشنو .. قال منتظر الخريف ينتهى
لما الخريف ينتهى أنت مابتقدر ترجى الدعامة .. براك بتمشي للبرهان في جبيت .. تقعد مع أخوانك المنسحبين
العايزه يهزم الدعامة بمشي ليهم .. والعايز بنسحب بنتظرهم في محلو
ياخ قيادات الجيش المنسحبين بقوا اكتر من القيادات الشغالين
حقوا يعملوا ليهم هيئة اركان .. اسمها هيئة الاركان المنسحبة يلعبوا لعبة العسكر والحرامية بدل قاعدين بلا شغلة وللا محكمة
أصلا زمن كانوا شغالين في الجيش .. ماكانوا شغالين
زمن الانتفاضة قرب ياقيادة .. تكتيف الجيش وزيادة الاحباط وتدمير العلاقة بين الجيش والشعب مابتحلكم
الانتفاضة جاية .. زمان كان بنتفض الشعب وبدعموا الجيش
اسي بنتفض الجيش وبدعموا الشعب
ياقيادة .. اجهزوا البل جاكم اقسم بالله ❤️🇸🇩