…قول النصيحة…
أستاذنا كامل عبد الماجد
وأسّة أكتب عن شنو ؟ :
قلت أكتب فيكي كلمة
إلا أكتب عن شنو !؟
وِانتي يا الغالية الحبيبة
في الوجود زيِّك منو !!؟
أسه أكتب عن رحيلك
ولا عن دافق حنانك
لما نشتاق لى مقيلك !؟
ولا عن دنيانا بعدك
وما فضل فيها المثيلِك !؟
واشكو لى مين في غيابك وانتي كنتي البشتكيلك
واسّه أكتب عن شنو ؟
أسّه أكتب عن بعادك
ولّا عن صادق ودادك
ولا أمشي علي المقابر
وفيها أتمدد قصادك !؟
عشتي همك كلو نعلو
ونسمو واتحقق مرادك
واسه أكتب عن شنو ؟
أسّه أكتب عن حنانك
يا الحبيبة العالي شانك
ولا عن بيتنا التصدع
وكان مكمل في زمانك
كنتي أمنا باسطة حضنك
ونحن راضيين باحتضانك
واسه أكتب عن شنو ؟
أسّه أكتب عن عذابك وانتي في المرض الأصابك
ولا عن آلاف أتوكي
وانتي صامدة وفاتحة بابك !؟
ولّا عن حسرة رحيلك
ولا عن فاجعة مصابك !؟
ولا أكتب عن شنو ؟
اسه أكتب عن شنو ؟
عن فراقك يا سكينة ؟ وبيهو سلمنا ورضينا .
كنتي دنيانا وملاذنا ..وكنتي واحتنا الحنينة
وكنتي كلْما الدنيا تقسو والنواكب تعترينا
كنتي للأنفس أريجا وكنتي للأرواح سكينة
وأسه أكتب عن شنو ؟
كامل عبد الماجد
التيار
