أما دكاترة مواهيم صحي..
دكتور يوناني استشاري بتاع انف واذن وحنجرة في مستشفى كبير، تسنيم بتي شغالة معاهو مترجمة فورية، وعلى حس كده قامت شكرتو لي شكر تقيل. سألت عنه ناس تانيين قالوا ايوه زول شاطر.
انا عندي (أححححااام) كده في حلقي أبت تروح كلو كلو.. قمت اتخمخمت مشيت ليهو كايس شي يروح لي العشراقة الزفت دي. الخواجة فحص واداني ٣ انواع ادوية.. شي بلع شي غرغرة شي زفت.
شلتهم ومشيت.. افتح علب الأدوية اقرا الروشتات.. ويصيبني سهم الله..
روشتات الأدوية دي ورقات من هنا للكلاكلة.. الورقة طويلة والكتابة دوقاقة كيف كيف ما تعرف.. ومطوية مطوية مطوية بقت مربعة سغيرونة بس المحاية، والكلام كله تحذيرات وأووعك وحاسب وأهاااا و و.. عواليق جد تجيب الوهمات والمرض حتى لو ما عندك.
اتهجمت ولاوزت جد لمن العشراقة المعفنة راحت. لكن زعلت زعل من هذا الخواجة الخنشور ده.
جدعت الأدوية راجعات في كيسهم. تاني يوم وصلت تسنيم المستشفي ونزلت معاها، هي شايله هم وشابكاني تحنيس: يا بابا اصلا بتتكتب المحاذير دي.. أي دوا كده.. ونقنقنقنق.
أأأأه.. مااااافي، حنبكة بس.. ولازم أقابل العنبلوق الإقريقي ده يعني لازم أقابلو.
تووش خشيت ليهو وفتحت فيهو إنقليزي الزعل أبو لستك.. رشيتو ليك وهو مطير عيونو. تسنيم واقفة بعيد تضحك ومرات تقبل كده.. أأأه ووووين.. فشيت كواريكي فيهو في دقيقتين وانا واقف.. وختمتها:
مي؟.. مي لايك زيس؟.. واي زيس يوو قيف مي؟ آآآآ؟ زيس يوو هامولتيتينق مي لايك زيس؟؟ ماي إيق؟؟.. واط ظا هيل ماي إيق ضظظ؟؟.. دام يوو كواجه.
روووو خبتت الباب وطلعت.
….
أنا، الخواجة التيتل يديني دوا مكتوب في روشتتو:
قد يضعف ويبطيء عملية الأيض؟..
الجاب أيضي في حلقي شنو؟
ـ عماد عبدالله
