في حادثة مفجعة اهتزت لها مواقع التواصل الاجتماعي بالسودان ، روت تفاصيلها شقيقة المجني عليه “محمد المجتبى عبد الجبار” وهو طالب سوداني يدرس بالهند ، لقى حتفه على يد صديقه السوداني ، هزت هذه الحادثة مواقع التواصل الاجتماعي واليكم القصة كما روتها شقيقة المجني عليه Shimaa Abdalgbar بأحد اشهر قروبات الفيسبوك السودانين ” جلاكسي الخير ”
شيماء عبد الجبار :
عارفين يعني شنو تصحى من نومك ع صوت ناس البيت ببكو، تجري وانت بترجف ياربي منو المات ياربي الحاصل شنو، وانت بتجري بتخت ألف زول في راسك ياربي امي ولا ياربي ابوي ياربي الخالة ولا ياربي الخال ياربي العمه ولا ياربي العم،تجري تعاين تلاقي امك واختك قاعدين يبكو، يمة قولي لي الحاصل شنو، اختي قولي لي في شنو مالكم بتبكو، اخونا مات ياشيماء محمد مات، المات منو؟ محمد منو؟قولي ياالاء قولي ياامي ابوي مالك ساكت، ابوي الحاصل شنو المات منو، عارفين يعني شنو ابوك يمسك تلفونو ويتصل تاني ويقول ليهم شوفو يمكن دايخ يمكن في غيبوبه،طيب جيبو الجثمان حندفن في السودان،دا منو ياابوي داا اخوك ياشيماء اخوك مات، كيفن يموت كان بتكلم معاي حسي شوف تلفوني شوفو رسائلو شوف اخر ظهور كيف يايمة يموت شوفو اخر ظهور حسي كان بتكلم معانا، اسكتو يابنات واسمعو كويس اخوكم مطعون طعنو زميلو في السكن طعنو صحبو،اخوكم مات شهيد يابناتي ربنا يصبرنا، كيف مات كيف مطعون اخوي ماليهو في المشكال ماسك دربو ماسك نفسو كيفن يفارقنا.. الحمد لله شهيد يااخوي
#الحمد #لله #القصة #كالاتي :
اخوي مات مطعون في الهند زي رامي بس اخوي مات مطعون من صحبو،اخوي اسمو محمد والولد الطعنو اسمو علاء الدين ماركوني، علاء دا كان عامل حادث والغرامة قروش كتيرة، واخوي اداهو قروش عشان يطلع من المشكلة دي كدين، اصاحبهم في السكن اتفقو يطلعو علاء من السكن عشان مابدفع قروش السكن، اخوي ماوافقهم وقال ليهم كيف تطلعو سوداني من نصنا عشان قروش، بقى يدفع ليهو حق السكن كدين لحدي مايلقى قروش ويرجعها ليهو ،الولد رفض يرجع لاخوي قروشو، اخوي اتصل بأهلو هنا اتصل بأخو الولد اسمو مجاهد، وماصدقو وقال ليهو انت واحد كذاب. بعد دا كلوو لمن اخوي طالب بقروشو قال ليهو ماعندك قروش عندي وطعنو بالسكين والطعنه صادفت ااقلب،وتاني طعنو في معصمو، وبعد دا اخوي شال منو السكين ومارداها ليهو بل رماها في الارض، ووقع وهو بحاول يطلع منو، وفي الاسعاف مات. الحمد لله شهيد يااخوي
#كسرة
الموت حق، وموت الشباب كتر شديد راجعو نفسكم وارجعو لربكم الحمد لله…
#اتقي_شر_من_احسنت_اليه
#محمد_المجتبى_عبد_الجبار_الله_يرحمك_ويعوض_شبابك_الجنة
