سودافاكس ـ الكترابة شغالة في منطقة الخليج والصواريخ تتطاير فوق رؤوسنا زي بعوض سنار، ززززز، بوووم، وقد ظللت اتعرض هنا للاتهام تارة بأني خاين وغدار وبفكر في الموضوع داك متناسيا عشرة الأيام الما بصح ننساها كأنه ما حبينا وعشناها أحلى غرام، وتارة بأنني عامل فيها ود فقرا وتخليت عن تراث أجدادي وباريت الشيخ ود كتكوت البيقلب الكستر صعوت، المهم الأعمار بيد الله وعاوز اسمع منكم كلام حلو عني، وأنا حي (ويا ريت يكون شعر او حكمة، بس ما زي القالوه الحَمَر في ود كتكوت (يا حليل الفكي الجاب ليكم العرقي)، بل زي ما قلته أنا عن نفسي:
أنا كباس درايز ام حبر، وقلبي صميم من حجر، وأنا دود الوعر.
ساطور الرجال ودابي الجبال، أنا الوافر الشنقول، وجبل الداير المـــــا بنطلع لزول… أنا الشافو خلو/ انا الطبخو دفقو/ انا الصعب المتكل بي الشِعب/ أنا أب جضوم الحرر الخرطوم، من الضب والبعشوم والسمبرية ام قدوم، أنا الديك ال نقد الجداد الممعوط، وغطى جرحها بالسعوط ،أنا الكيك وما في ولية تقول لي سيك ميك/ انا التُكل الوقع في سِتو، وبخت البديني بِتو
جعفر عباس
