ستار يا ليل …!!
الطيب عبد الماجد
في فصل كدا في طالب رفع يدو قال للأستاذ
إنو فقد ( ساعتو ) في الفصل وقال هو متأكد إنها كانت معاهو …
الأستاذ إرتبك كدا والجو العام إتوتر والطلبة بقو يعاينو لي بعض ..وسرت حالة من الهدوء الحذِر 😥
المهم الأستاذ قال خلاص مافي مشكله إن شاء الله خير يفتشو الفصل كلو إقرارا لمبدأ العدالة ونشوف الساعة دي مشت وين …
الفصل كلو وقِف على ( حيلو ) وقالو ما في زول يتحرك أو يعمل أي حركة …لحدي ما نشوف …والجو إتكهرب كدا
طبعاً في اللحظة دي دقات زولك السرق الساعة
قد لامست السقف لكن مافي طريقة خلاص وقع المحظور
المهم ( قفلو ) الفصل عليهم وجابو مراقبين كدا عشان الزول ( السرقا ) دا ماذا ما بتصرف أي تصرف
وقالو خلاص يطلعوهم ( خمسة خمسة ) يودوهم مكتب الأستاذ دا يفتشونهم🚶🏾♂️🚶🏽🚶🏾♂️🚶🏽🚶🏾♂️
فعلا وصل الوفد الأول ( وفد المقدمة ) وقفوهم ليك
صف ( وشهم ) على الحيطة 🕴️🕴️🕴️🕴️🕴️
بس في حاجه غريبة حصلت … 🤔
الأستاذ قال يغطو ليهم ( عيونم ) بي شريط كدا كلهم الخمسة ..وقد حدث
وبدا يدخِل يدو في جيوبم بحثا عن الساعة المفقوده
واستمرت عملية البحث والتحري كل مجموعة تمشي وتجي التانية ..!!
( كاس العالم بس )
المهم جات مجموعة كدا أها ديل زولك كان في نصهم
المعلم ذاااتو الجازف الساعة دي ..😎
ومافي أي طريقة كان يتصرف فيها الناس كلها بتعاين لي بعض
زولك استسلم وجهّز نفسو للفضيحة وعرف إنو دا آخر يوم في حياتو العاديه وسيتحول بعدها الى ( لص ) تلاحقه اللعنات وخلاص مستقبلو ضاع وستظل هذه القصة تلاحقو
الى يوم يبعثون
المهم حاول يتماسك كدا وقد ضاقت به الوسيعة
يجرجر في رجلينو في طريقة للمقصلة 😢
فعلا الأستاذ بفتش فيهم لقى الساعة في جيب الود دا
قام سحبا براااحة كدا ختاها في ( جيبو ) قال ليهم خلاص إتفضلو أمشو
لكن المفاجأة إنو ما وقّف التفتيش لحدي ما فتش
الفصل كلو …
جا راجع الفصل قال ليهم الحمد لله لقينا ( الساعة )
وقال ليهم لقيناها في محل الوضو …
الود السرقا حصل ليهو ذهول كدا 😳داير يطير من الفرح 😇
والود السرقو ساعتو إستلم ساعتو وقال خلاص إمكن نسى
( العقل مرات لو حاصرتو بي حاجة صارمة كدا بستسلم )
الأستاذ حجب أي معلومات تفيد القضية وقُيدت الواقعة ضد مجهول وانتهى هذا اليوم العصيب
تلِف السنوات وتدور فجأة كدا الأستاذ دا وبعد سنين ٍ عددا
لقى زول واقف كدا سلم عليهو بي إسمو
وقال ليهو اتذكرتني يا أستاذ ..!؟؟
أنا واحد من تلاميذك …
الأستاذ سلم عليهو قال ليهو والله المسافة طالت لكن
حبابك أهلاً وسهلاً
الزول دا قال للاستاذ بتتذكر زمان كان في واحد سرقو ساعتو في الفصل وانت فتشت الفصل كلو ..
بتتذكر يا أستاذ …!!
قال ليهو بالحيل بتذكرا شديد الحادثة دي
خير ..!؟؟
الود قال ليهو أنا الزول اللقيت الساعة في جيبو
الاستاذ أصابه الذهول
قال ليهو وأنا والله يا أستاذ مدين ليك بي حياتي دي كلها
ولو في زول عندو فضُل على في الدنيا دي غير ربنا وأبوي وأمي ياكا إنت دا …. يا أستاذ
واكيد إنت متذكرني وباسو في راسو
الأستاذ إندهش كدا وشكرو على هذا الوفاء وقال ليهو
أنا أول مره أعرف إنو دا إنت وما كنت عايز أعرف
أنا اليوم داك يا إبني ( غتيت ) عيونكم كلكم لو بتتذكر
لكن الما بتعرفو إنت ولا كل الفصل
إنو أنا ذاتي ( غتيت ) عيوني معاكم اليوم داك
ولو بتتذكر مظبوط بعد ماتقيفو على الحيطة كنت ببدل
مواقعكم وأنا مغمض
ما كنت عايز أعرف دا منو فيكم ( السّرق ) الساعة دي عشان ما أتصدم في واحد فيكم إنتوا زي أولادي وعشان ودا الأهم ما أدمّر مستقبلو ….
فبكى الرجل ….!!
وحاول حتى أن يقبّل قدمي أستاذه رفعو وقال ليهو استغفر الله ..اكيد الوكت داك كنتو صغار والشيطان لعب بيك
( تاني جبر بي خاطرو ) 😍
وكاد أن يكون رسولا
قال لي و إنت وين هسا …!؟؟
قال ليهو والله يا أستاذ أنا شغال ( محاسب ) في شركة بتصدِق …ومن اليوم داك انا بخاف ( البِحاسب )
شكراً ليك كتير ونعم الأستاذ والوالد والمربي
واتقالدو مع بعض وافترقا على أمل ( دعاء )
أها يا الناس البتشيل حال الناس وتتتبع ( عوراتم )،
المسألة دي كعبة شديد والله ….بأمانة كدا
وعواقبها ( كارثية )
على الفاعل و ( الضحية )
ياخ الستر دا أعظم منو مافي ..ومن أعظم الحاجات عند الله ويكافئ عليه بشكل مباشر
اتخيل أقل مكافأة في الحاجة دي إنو ربنا ( بسترك ) إنت دا ذاااااتك …!!
عليك الله في في أحسن من كدا …!!
تخيل إنك في ستر ( الستار ) داير شنو تاني في الدنبا
أنت في حماية الجبار …
( أوا هناك أقوى )
مش مرات بقول ليك الزول دا ( رصيدو من الستر انتهي )
أيوااااااا …. إنت قايل البكمِل الرصيد شنو …؟؟
بس ياها ( المكالمات ) البتعملا في فضح الناس دي وعدم سترتها
والمكالمات دي طبعا بقصد بيها كل أشكال شيل الحال وفضح الأسرار وبكل الوسائل …إن شاءالله ونسة أو حتى لو ( هِزار )
أول ما يقول ليك ( ليس لديك الرصيد الكافي )
أعرف إنو قطرك ( صفّر ) ….!!
واستعد للعاصفة
لأنو لما ترفع الستر عن الناس ربنا طوالي برفع حمايتو عنك ولو بعد حين …وتفقد ( السُترة ) الكانت معاك ومغتياك
وا ( فليلك )
فقد تم سحب دعم السماء وسِترها وانكشفت على الأرض وضُرِها
قااااعد في ( السّهلة ) ساااكت وبلا حصانة …
ومن ستر مسلماً ستره الله في الدنيا والآخرة
ياخ الله ذاتو الخلقك إسمو ( الستار ) إنت كيف ما تستر !!؟🤔
ماهو ربنا دا عارف أي حاجه جوة وبرة وساتر عليها
تجي إنت ترفعا …!!؟؟ 😳
يازووووول 😳
الكلام دا صعب شديد
إنت منو !؟؟؟؟
( في زول بخسر ربنا )
أنا والله لا داعية ولا مرشد ولا واعظ ولا أحسن من أي زول
لكن الدنيا دي أي زول فينا عندو معاصي وذنوب صغُرت أو كبيرة
الفرق الوحيييد بينك وبين غيرك ياهو ((( ستر الله دا ))) بس تاني مافي أي حاجه عشان الشغالين في القصة الحزينة دي ما يحسو بي عظمة
وأنا ما سرقت أنا بس جيت أعاين 😊🙌
و الناس بالناس
والريدة بين الناس صلة 💞
