قررت السفر خلاص ضاق بيك الحال، فترت من قطوعات الكهرباء و سخانة الجو والجيب عندك أحلام و طموحات داير تحققها، ياخي نتمنى ليك التوفيق، تمشي و ترجع سالم و كل أحلامك محققة يارب، بس عليك/ي الله اقرأ الكلام المكتوب ده للنهاية.
خلصت كل أجراءات سفرك و جهزت جوازك و حجزت، ركز في التذكرة كويس لو ادوك ليها ورقة في كلام بتلاقي مكتوب بخط اليد ركز فيه كويس ده زمن الحضور للمطار البفتح فيه ميزان رحلتك قبل تلاته ساعات من قيام الطائرة، عندك ساعتين بس وبقفل، الساعة الثالثة ما حقتك عشان ماتقول/ي لسه باقي ساعة، جيت متأخر ما تحنس، ما بدخلوك و بتتأخر وبتدفع غرامة، لأنو ده طيران مربوط بزمن، ما بص سياحي في الميناء البري أو موقف شندي، ما بتسافر لو أتأخرت، عليك الله تعال/ي بدري.
مصر للطيران تعود إلى مطار بورتسودان
وصلت المطار ودع أهلك و أبكي و قالدم و اتصور معاهم برة الصالة، ما تدخلهم معاك جوه، لأنو الصالة للمسافرين بس، ممنوع ممنوع دخول زول غير المسافرين.
وصلت الكاونتر بتلقي شباب و شابات ذي الورد، ما تصر ليهم و تشاكلم، ديل قاعدين عشان يخدموك، بطلبو منك الأوراق و بسألوك كم سؤال، ما تشاكلم ما تصر عليك الله، (الجواز / التاشيرة / الخروج و العوده/ التطعيم / تذكرة العودة في بعض الوجهات) الورق بسألوك منو خلي في شنطة اليد او في جيبك، ما تدفسو تحت الهدوم في الشنطة الكبيرة (وراك ناس دايرين يخلصو، ما تأخرهم في تفتيش ورقك)، ما تشيل معاك سوائل كتيرة زيت و عسل و محاية، الحتة الماشي ليها دي فيها عسل نحل أصلي و زيت سمسم أصل الأصلي و شيوخ يروبو الموية الحاجات دي خليهم لينا هنا نحنا الحارسين ليكم البلد دي.
بتسف ياخي ما تشيلو معاك، لأنو التمباك الهنا في كل كوع تلقي ليك عماري، في بلدان مصنفاه من المواد المخدرة، عشان ما يجيبوك راجع في طيارتك، حلفتك بالله ما تشيلو، خلصت في إجراء تاني الجوازات براجعو جوازك وبختمو ليك المغادرة خلصت بتلقي صف دخول صالة السلامة.
شفت كيف بلدنا دي حلوة، بنودعك برضو بصف، بس خليك واقف هنا لحدي بكره ندخلك السلامة.
طيران بلدنا
