يوميات ( علوب )
مرضان سيادتك …!!
الطيب عبد الماجد
زمان في الحلة في ( صيدلية ) كدا فتحت في الشارع
الرئيسي بتاعنا إسمها ( صيدلية رندا )
أوشك الحدث أن يمر مروراً اعتيادياً …
( صيدلية ) وفتحت …؟!
مافي حاجه كدا ملفته يعني
ولم نكن ندري أن محطة توليد حراري وإشعاعي
قد فتحت في الحلة …
الطيب عبد الماجد يكتب: الكأس إسباني
القصة مش ( الصيدلية ) الحكاية ( رندا ) ست الصيدليه 🥰
حاجه كدا ما معقوله ….!!
السماحة العندها أصول ديك …..
الجاب الخبر منووووو ..؟؟
( جعفر )صاحبنا الشليق دا
جانا نفَسو مقطوع قال مشى يجيب دوا لي ( أبو ) من الصيدلية الجديدة دي ..
قال لينا دخلت كدا لقيت ( المُكيّف ) شغال والجو ( صااااقت ) وفي واحد كدا ( برصرص ) ليهو في دوا وواحد تاني بوصِل في سلوك كدا وصوت ( الدربكين ) ( وررررررر ) مدور وريحة الخشب
قال قلتا ليهم ( الصيدلية ) دي شغاله فتحت رسمي ولا لسا شغالين بتشطبو
قالوا ليهو لا شغالة اتفضل ..دي بس حاجات خفيفة كدا
و كورّك للصيدلانية
يا دكتورة ( رندا ) ..في واحد هنا الظاهر داير حاجة
…
وقالت كدا ( رندا )،جات دافرة ……!!
الأسد النتر
آمنت بالله …
الشهادة والعمل الطيب ..
قال نجفة وجات مارقة
مرقة عروس غايتو ..سماحة ذاتا تشفِق …
لابسا ليك العباية البيضا بتاعة الصيادلة ديك وطرحه كدا وبس يعني …مافي أي بهرجة …لكن شهيدي الله قيامة قايمة
راح الخشب وجا اللهب 🔥
وشها ذاتو جديد كدا …..وعااالية البت
قال لينا أنا ذاتي رجعت ورا …
قالت ليهو إتفضل …!! كيف بقدر أخدمك …!!؟
تخدميني …؟؟؟؟؟ 😳😳
قال حسيت رجليني ما شايلاني …
( قلت ليها بي سري أنا الكيف أقدر أخدمك..!!
قال لينا غايتو إتماسكتا كدا غلبني الكلام …
البركة في ( الروشتة ) دي الكلام مكتوب …
قال مديتا ليها كدا ..و أرجِف
لفحتا السمحة وبدت تقرا …
قال وقت العيون دي قفلت على القراية …
كمان دا منظر تاني …!!
( وإذا الرموش على العينين قد نزلت
فمُزن العين على الخدين هطال )
البيت دا حقي ما حق زول ( عربون محبة كدا )
قال إتمنيت ما تنتهي من القراية ..
تاني رفعت …👁️
قال أنا في اللحظة دي نسيت أنا هنا مالي ..!! وداير شنو ذاتو
…
قالت لي الأول والتاني ديل موجودات بس التالت دا للأسف مافي ..
بتحب أديك ليهم ولا تشوف صيدليه تاني تاخدم
مع بعض ..
( مش كلام واضح )
…
قال غلبني الرد إتبكمت كدا لي لحظات
( صحي الجمال سلطان )
قالت لي أها ….!!
قال تاني اتماسكتا …قلت ليها لا لا أدينا بس الموجود
وبي قلبي قلت ليها
( والله لو نص حبة أنا من هنا ما طالع ) …
فعلا جابت لي الدوا …
مسكت القلم قالت ليهو دا حبة تلاته مرات بعد الأكل ..ودا شراب ( مرتين ) صباح ومسا
والتالت دا ( مُسكِن ) عادي بس لازم تشتري النوع دا عشان ما يتعارض مع الأول…
( هو في مُسكِن ) غيرك )
قال لينا دا مش دا عربي واضح قال شافو رياضيات
وما فهم ولا حاجه …قال أنا متابع طريقة الكلام
طريقة الدوا دي راحت لي
( يا حليل أبوي الراجيني )
البت صوتا زي المطرة
قال هي ذاتا زي حست كدا أخدت ليها إبتسامة ☺️
( عارفا روحا المجرمة )
أريتا كان ما ابتسمت …ختتا للموناليزا ستة صفر
(هيااا يا اخوانا ألحقونا في ( وجّنة ) ظهرت في الخد الشمال …😳
( غايتو المبادئ لا تتجزأ )
المهم أدوهو الدوا في الكيس دفع القروش ورجّعت الباقي …
قال دا أحسن باقي يستلمو في حياتو …
اتذكر باقي ( دانقا ) الكمساري بتاع الحافلة
بي يدو الناشفة ديك ..
والقروش من ( الكرفيس ) حصل ليها ( إختناق )
( يطقطق ) فينا التقول عريس …
وقت يقول ليك أرح يا …إنت الهناك دا …
تحلف تقول قاضي ..!!
غايتو أي زول في البلد دي يلقى ليهو فينا ( فرَقة ) صغيره كدا ..بتفسح فينا …
المهم ( جعفر ) شال كيسو واتفكفك
وجا جاري حكى لينا القصة دي …
في اللحظة دي نحنا تحسسنا كل أمراضنا حتى نشد الرِحال للصيدلية دي
ان شاءالله ( بندول )
معانا ( طارق ) دا متابع القصة دي بكل حواسو
قال يا اخوانا أنا أستأذن مواعد ناس البيت ديل
عندهم مشوار …!!
( دا بكون ركب الظبط على ( الصيدلية ) دغري )
المهم يازول بالفعل تحولت ( صيدلية رندا )
إلى ( مزار سياحي )
حتى بنات الحلة عرفو القصة والكلام كتِر عن
( رندا السمحة )
وناس ( فلقصة ) بدو يعملو على التقليل من وقع الصدمة ..
( نوع ناس ( رندا )ديل بخلقو مقارنات كدا ما في ليها داعي )
قالو هي سمحة مافي كلام لكن دمها تقيل 😳
هههههههههههه …. لا ياخ
غايتو ( رندا ) لو دمها تقيل … إنتوا خام ( برنت )
قال تقيل قال ….
والله ( رندا ) هي ذاتا أولى خطوات العلاج
واصبحنا نتردد على الصيدليه بي سبب وبدون سبب
( الوقاية خير من العلاج )
المهم عندنا ود حلتنا ( أسعد ) دا جاي من أمريكا
وبفتش لي في عروس …
دعونا الله في سِرنا إنو مايمشي جهة البت دي …
( أصلو السودان دا أي حاجه سمحة ما بتستمر
ما عرفناها ( عين ) ولا في زول عامل ليهو عمل
ولا القصة شنو ذاتا ) ….
لحدي ما جاتنا إشارة إنو فعلاً ( رندا ) دخلت في
ال ( shortlisted) ..ونحنا دخلنا في اغماءة
( مشاعر ) قالت لي ..
( ضحى ) أخت ( أسعد ) دي جابت سيرتا وقالت ليها ( رندا ) سماحة البنات أريتا مرت أسعد )
نوع الكلام الزي دا ما بطمن
أول ما البنات يعترفو بي بت أعرف إنها قدّت السلِك ومرقت بي هناك
( رندا يا دولة )
المهم الشباب ناقشوا القصة دي قالو ناس ( أسعد ) ديل بقصدو شنو يعني ..!؟؟
دايرين ( أمريكا والسودان ) مع بعض ..
دي أنانية بس ما أكتر…
( غايتو جنس حسادة )
قالو ( صيدلية رندا ) دي من أحسن الحاجات الحصلت في الحلة مؤخراً …
نحن كنا قبل فترة كدا عملنا لينا ( حديقة ) جنب الميدان …تسمع حديقة تقول ( اوزون )
( نجيلة وتلاته شجرات ) كلاب الحلة افتكروها عملناها ليهم العطالى بقو يشخرو بدل يهوهوو
وكنا شايفين دا أعظم إنجاز لحدي ما جات
( البت الحديقة ) دي شخصياً …حطمت الرقم القياسي ..وليه يا الوِزة مابيه تعومي
المهم دعينا إنو ( أسعد ) دا يخش بي حمد ويمرق بي خوحلي لحدي ما يسافر ويخلي الحكومة دي من غير تشكيل ..
والظاهر ( النجيهة ) دي ذاتا ( كتمت ) الموضوع
فعلاً ( أسعد) سافر دون التوصل لاتفاق
ولا كمان حصل تفاهمات قابله للتطور …ماعارفين والله ؛
( اللهم أجعلو خير )
المهم ( أسعد ) سافر غايتو وخلى لينا ( المزار السياحي ) دا واحد من معالم الحلة البارزة
بقينا ( فُرش الأسنان ) بنشتريها من هناك
كان لينا مراد نقول ليها جيبي صلصة وبهارات
عشان دكان ( يس ) دا ذاتو نعمل ليهو ( الغاء للصداقة )
كل مره بطلع لينا دفتر المديونيات زي الكرت الأحمر
غايتو كل ما اتذكر إني مكتوب بي اسم ( أمجد ) أحمد ربنا
لاقدر الله الدكان دا كان ( اتشفشف ) والدفتر دا وجد طريقة للميديا …يانا اللحِقنا ناس ( الروزا ) ديلاك
ونغني ما نسيناك …
و ( رندا ) كل يوم سماحتا زايدا ….ونحن حمتنا زايدة
مرات مع الطرحة بتخلي ليها شعرتين كدا قدام يتحاومن
الظاهر ديل بفكوهن يطاردونا …
وهي ذاتا لطيفة كدا البت والكلام براااحة الرايقة وما مضايقة وتعاملا مع الناس لطيف
واثقة من روحا ( البُرج )
فناس الحلة ارتاحو ليها كدا ….!!
ونحنا حبيناها عديل ….!!
أها أنا يوم كدا ( زهجان ) قلت النمشي الصيدليه دي
أرفع معنوياتي دي شوية واجي ….
فعلا دخلت ما لقيتا …قلت أكيد بتكون جوه
لقيت لي واحد واقف زي القدر
قال لي إتفضل عايز حاجه ؟؟؟
( دا جا من وين دا كمان ) …
قربتا أقول ليهو ( رندا ) وين ..!!؟
قلت لي عندكم ( بخاخ أزمة) ..؟؟
اتوقعت طوالي يقول لي مافي
بتصدقوا طلع ( في )
….
غايتو السودان ذاتو شغال معانا عكس هسا لو دايرنو
جد جد أصلو ما كان إتلقى ….
هسا دا اقول لي شنو ….!!؟؟
قلت لي صناعة وين …
قال دا انجليزي أصلي
قلت لا لا نحن دايرين الاردنى
قال لي دا أحسن..
قربت اقول لى ( بُخو ) إنت …
طوالي اتخارجت …
إنت ذاتك جذور ( أزمة )
( ياربي ( رندا ) مالا ماجات إن شاءالله خير )
حتى جاءنا الخبر اليقين ….أو الحزين الحقيقة
( رندا غايبه بتستعد لي خطوبتها الأسبوع الجاي ؛
( لا حول ولاقوة إلا بالله )
خبر وقع علينا كالصاعقة وإزددنا يقيناً إنو مافي حاجه سمحة بتستمر في البلد دي
باريتا لو ماجات وخلتنا مع ناس ( مودة ) و( صفا )
و ( تقوى ) في التعايش السلمي دا ..
أها بقينا نسأل العريس منو إمعانا في جلد الذات
تخيلو طلع ( أسعد ) بتاع امريكا
( الله لاكسّبك يا بعيد )
شالنو رجلينو الطوال ديل من أمريكا قطع ( الأطلسي ) وظفر بذات البين
نحن البت مننا ( قطعة زلط )ما لقينا غير دوا القُحة والاسبرين..
والله فعلا لكل من إسمه نصيب …
مش ( سعد ) …( أسعد) كمان ….
الله قادر ..
معناها ( صبري ) صاحبنا دا ( حيتخلل )
غايتو أسعد شحد الله والله أدا …ونحن لينا الله وقعاد الضللة
دا خلاص مزق فاتورة الدواء ….!!!
جاتو العافيه شخصياً
الله يسعدهم ( غايتو ما من جوه شديد )
المهم حاولنا نتأقلم مع الوضع …!!
بقينا نجي عابرين في ( برج ايفل ) دا نعاين من بعيد ونلوك القرض
لحدي ما يوم كدا ( مشاعر ) جاتني قالت لي بتصدق
( رندا ) السمحة ديك …رندا ياخ بتاعة الصيدلية
مسكينة دايرة تذكرني ليها ….
ونحن ( حلقانا ) حافظنها
قلت ليها مالا …خير
قالت لي بتصدِق فسخت خطوبتا
قالت ما بتمشي أمريكا اهلها براهم ….
( أول مره تجيب خبر سمح البت دي )
عملت فيها ما مهتم …وانا أوليني اهتمامك
طوالي رسلت عشره ( واتسات ) للأخوان في القروب أبلغهم بتطورات الاوضاع والمستجدات الراهنة
( القلوب دي اتفجرت في التعليقات )
😍💓💓♥️
دا تعليق ( يوسف ) صاحبنا
) يوسف دا اكتر واحد مسكين في الحلة دي )
شوفو التعليق
💃💃💃
( مروق ) شديد يوسف …طلع ممكون وصابر
ودا رد منتصر
🔥🔥🔥
( ود الحاجه ) كتب
الله اكبر …
تخلف تقول فتحنا القدس
مُنذر قال
جاء الحق وزهق الباطل
منذر دا لو في حفلة بورينا البجي منو والما بجي منو
شدة ما منقطا
المهم احتفالية ضخمة على شنو ما عارف …!!
اي واحد مننا كان مشي إتقدم للبت دي
بدو ( حُقنة ) 💉 بس وبجي راجع
( ليس لديك الرصيد الكافي نرجو اعادة المحاولة لاحقاً)
ويا هادي الدنيا�ما فارقة ( روضة ) من ( رندا ) �ما فارقة
تدينا ( حبوب ) 💊💊�وما فارقة
نديها ( قلوب ) 💕�وما فارقا
بس عندنا قناعة إنو زي ( رندا ) دي بزورو فيها بتديك دفعة معنويه كدا وشوية أمل في الحياة
مش قالو الصحة للجميع
( وببكي وبنوه وبصيّح للشوفتن بتريّح )
( أول مره اعرف ( بادي ) لما يغنيها بكورك مالو )
المهم ( رندا ) حرة طليقة ودا في حد ذاتو إحساس بالأمل ..
تاني رجعنا بقينا نجيب ( البندول ) من هناك ونشوف
الغزالة
كمان جابت ليها موضة جديدة في الصيدليه
كاتبين قياس الضغط مجاناً
يازول كفكفنا وجينا
نحن قايلنها بتقيسو هي
طلع بقيسو الطويل المعاها دا طوالي لعبنا معاهو ضاغط
هو نحن جايين ننزلو تجي ترفعو إنت
المهم يازول ( صيدليه رندا ) وسطنا ومرضان سيادتك
والأمور طيبة رندا دي كان أدتك اي دوا يعالجك
هو العلاج دا ما دوا …العلاج نفسيات
لكن جا الأقوى مننا ومن أسعد وما لم يكن في خيالنا
قامت الحرب واتشتت الرصاص
إتفرتقت الصيدلية ونحنا والحلة كلها ..
الغريبة أنا مشيت الصيدلية دي قبل الحرب بي كم يوم
والدنيا كانت رمضان مشيت بعد التراويح
وكنت عيان جد جد حاسي لي بي نزلة كدا
طبعا بقينا نعرفها وتعرفنا وهي ذاتا ذوق وأخلاق مع السماحة دي …
المهم أدتني حبوب كدا
قالت لي ترتاح بس النزلة دي عايزه راحه وعصاير
🍹🥤
غايتو وقت قالت عصاير دي حسيت بيها مرتي
قربت أقول ليها تاتي اعملي لي العصير حتى تمشي الصيدليه …!!
غايتو جنيت وقلتا هو …
قلت لي ( مشاعر ) حاسي لي بي مبادي نزلة كدا
قالت لي أقع ( القرض )
( دا الفرق بين النوارس والغربان )
المهم اتذكرت القصة دي كلها كنا بتشوف فيديو في قروب الحلة بتاعنا جايبين فيهو حلتنا بعد الحرب
اها لما جابو شارع الظلط
بقينا مركزين نشوف الصيدلية أكتر من بيوتنا
والكاميرا ماشه ونحن متابعين بكل قلوبنا
فعلاً ظهرت اللافته قربنا نصفق
اللافتة ذا ( مطفقة ومنتهية ) كلمة صيدلية ذاتا ما ظاهرة
لكن إسم ( رندا ) ظااااهر
🥰😍
قلوبنا قالت فححححححح
وصفقنا 👏👏
( حاملة الطائرات دي ما توقفا حرب )
أنا المرضتا وما بنفع علاجي لو ما أشوفك يا راحة علاجي
ما منحنا الأمل من جديد وطربنا أيامنا القبيل
والسماحة المالية حلتنا وتدفق
ياحليلك يا رندا حرب وسلام شغالة
طالما اللافتة دي موجودة
معناها بنرجع …..!!
نتعافى في وطن جميل وناسو حلوين يتبادلو
الأماني ويتهادوا الحب
💕
ياربي ( رندا ) دي هسا وين ….!!!؟؟
أوعى بس أبو السعود دا يكون جا تاني …
الامريكان ديل بتاعين استراتيجيات ما بتضمنم
نتلاقي إن شاءالله في ساعة خير قدام ( صيدلية رندا )
وفيك علاج طبيبي
وبالأمل صبرتو قلبي وعشت في دنيا الأماني ….!!🌹🙌
