مسافر عبر الطيران؟..اقرأ هذه النصائح (2)
مصطفي ساردية
توقفنا في المقال السابق في صف الجوازات ومنها بتدخل إلى صالة السلامة الجوية.
تزكر انك سفير لبلدك في الدولة الماشي ليها وأنت بتمثل بلدك لازم تكون لابس كويس ونضيف ومهندم ماتجي وسخان ولاملابسك مكرفسة في اختراع اسمو مكوة حتي اذا وصلت المطار متاخر وأضطريت تبيت في المطار ماتسافر بملابسك الكنت بايت بيها غيرها قبل تدخل الصالة .
مسافر عبر الطيران؟..اقرأ هذه النصائح المهمة جدا (1)
قبل الدخول إلى صالة السلامة الجوية المنطقة المعقمة بلاقيك تفتيش الجمارك لمراجعة الشنطة الشايلا معاك إلى داخل الطائرة (وتاني بزكرك ماتشيل فيها زيت ولا عسل ولا محاية ولا أرياح) وبتم سؤالك عن المبلغ الذي بحوزتك من العملات الأجنبية ويجب أن لا يتعدى المبلغ 5 آلاف دولار أو ما يعادلها من العملات الأخرى (درهم / ريال / يورو/ …الخ) وأن لا يتعدى الذهب 150 جرام ذهب مشغول.
خلصت تفتيش الجمارك بتدخل إلى صالة السلامة وهنا المنطقة الأخيرة قبل صعودك إلى الطائرة دخلت تاني ماتطلع نهاااااائى عليك الله ماتطلع لانو لو طلعت حاتمرّ بالأجراءات الفوق دي تاني من أول وجديد وحاتتأخر وتأخر الطائرة كلها وأمكن ماينتظروك وتضيع عليك الرحلة.
دخلت السلامه في آخر إجراء وهو ختم الخروج ومنو إلى الباصات الحاتوصلك إلى الطائرة.
ماتتدافسو في الباصات لانو ده ماموقف مواصلات الاستاد ومافي أزمة في الباصات اطلعو بنظام يتملى البعدو بكون واقف.
طلعتو البص نزلتو على سلم الطائرة اتأكد أنو نزلت شنطتك الشايله في يدك ومن أوراقك وجوازك وموبايلك إنو معاك ماتنسي حاجة وأنت داخل على الطائرة.
وماتجري على السلم مقعدك مافي زول بقعد فيه المقاعد بعدد الناس كل زول عندو مقعد ماتجري وماتتدافسو في السلم مافي زول حايقيف شماعة كلكم بتقعدو.
ونخليكم هنا في باب الطائرة لحدي بكره ندخلكم الطائرة.
فتكم بعافية ونتلاقى بكرة.
