بصراحة كده…..
الواحد فكر يشوف ليهو نفرين تلاته كده نعمل لينا حزب أو كيان سياسي وندخل السوق
لأنو حسبتها وارد و منصرف لقيت الحكاية ما مكلِّفة إتنين قدامك يوسعوا الطريق وإتنين عتاولة بي وراك (بودي قارد)
وإنتا ما عليك إلا توسِّع الحلقوم و تتكلّم
نعم
تتكلّم إتكلم في أي موضوع
أبدئ قلقك
وأكِّد على الوقوف مع الجيش
وضرور حصر السلاح في يد القوات النظامية
وإنو الحوار لازم يكون سوداني سوداني
وبعدين ……
الحكاية بتفتح معاك براها
تجيك عربية طايرة من (عمك)
مُش عارف تتعشى مع السيد مالك عقار يدعمك
تزور جبريل يغمت ليك شيك
مُش عارف ولدنا مناوي يرقعك بي (حجر دهب)
الأمور بتمشي
(مااا رئيس حزب وكده)
والشغلة دي كلها رأس مالها صحفي شاطر و (موبايل) لُقطة
العيكورة يكتب : اللجنة العُليا لإمتحانات الشهادة السودانية (الكلام ده صاح)؟
الحاجة الخلتني أفكر الفكرة (الجهنمية) دي هو خبر عبر موقع الحدث السوداني يقول (نصّاً) …
أكد نائب رئيس الحزب الإتحادي الديمقراطي الأصل جعفر الميرغني والقيادي بحزب الأمة القومي عبد الرحمن الصادق المهدي ضرورة دعم الحوار السوداني للتوصل الى سلام عادل وشامل وإنهاء الازمة و بحث الجانبان (خلي بالك بعد ما نفرين بقوا جانبان) !!
وبحث الجانبان خلال اللقاء تطورات الاوضاع السياسية والإقتصادية و سبل تخفيف معاناة المواطنين و(شددا) على حصرية حمل السلاح بيد الجيش السوداني وإندماج جميع القوات تحت قيادته دعماً للإستقرار وسيادة القانون . (إنتهى)
كلام عادي (صاح)؟
وكللنا قلناهو (صاح)؟
الحقيقة يا جماعة بعد قريت الكلام ده و قلبت الصفحة قلت يا ولد والناس ديل أحسن منك في شنو؟
ما أعمل زيهم طالما حكاية كلام نتكلّم ياخ
لا فيهم واحد موظف الحكومة
ولا فيهم واحد قائد كتيبة إستنفار
ولا فيهم واحد صاحب تكيِّة
لا فيهم زول شايل القلم
يا هو الكلام ده
نتكلم يا ياخ
المافي شنو!
عشان كده أصدقائي الصحفيين أدعوكم غداً بإذن الله لموتمر صحفي للعبد لله
و (همِّتكم معانا يا جماعة) غداً سارسل لكم الرابط عبر (الزووم)
وأنا ما بفسر و إنتو ما بتقصِّروا …!
يا جماعة (الورثة)
الورثة دي في الدين بعد يقسموها كل زول بشيل نصيبوا و بمشي يشوف شغلتو
صاح والا أنا غلطان يا جماعة
أنحنا لمتين الجماعة يتوارثوا فينا ….!!
أستغفر الله العظيم
صبري محمد علي العيكورة
