قصة حدثت في مستشفى الشعب بالخرطوم ستجعلك تبكي

سودافاكس – الخرطوم : نشر أحد الأعضاء بمجموعة “وصف لي ” السودانية على شبكة التواصل الاجتماعي فيسبوك ، نشر قصة حدثت معه بمستشفى الشعب وسط العاصمة السودانية الخرطوم ، واثارت هذه القصة التي تضرب مثالاً لمعنى الاية الكريمة بسورة آل عمران : الَّذِينَ يُنفِقُونَ فِي السَّرَّاءِ وَالضَّرَّاءِ وَالْكَاظِمِينَ الْغَيْظَ وَالْعَافِينَ عَنِ النَّاسِ ۗ وَاللَّهُ يُحِبُّ الْمُحْسِنِينَ (134) صدق الله العظيم .

وقال الشاب في منشوره وهو يسرد تفاصيل القصة التي حدثت معه :

–
دا السودان رغم الأوجاع
..
مرافق أبوي راقد في مستشفي الشعب وانا قاعد مع ابوي في الغرفة الباب دق فتحت الباب لقيت زول غريب ما بعرفو ولا شفتو قبل كدا يبدو من شكلو كدا شاب اربعيني سلم علي سلام حااااار كدا سلام زول قريب وعزيز وكفر لي وسلم علي الوالد وباس يدو وكمية من الدعوات الطيبات بعاجل الشفاء
المهم ابوي يعاين لي وانا اعاين ليهو نظام دا منو ياعامر وانا دا منو يا ابوي
وقبل ما نسألو طلع مبلغ من المال وختاهو في السرير وطلع وابوي بقول دا شنو وبتعمل في شنو وانت منو..؟
وبقي يقول لي ابوي خليها في الله يا ابوي خليها في الله يابا وهو طالع وانا شلت القروش ومشيت وراهو
داير افهم الحاصل وانا ماشي وراهو وبناديهو ما رد علي
شفتو دخل الحوادث بسلم علي العيانين وبطلع كمية من القروش وبختها ليهم وبمشي طوالي ودخل العنابر
بوزع في الدعوات والقروش
انا في اللحظة دي كل القدرت عملتو بكيت بكيت بس والله
بكيت لانو ايقنت انه مهما ضاقت الاحوال ومهما قست القلوب رحمة ربنا واسعة والقلوب الطيبة موجودة
بكيت لانه ايقنت انه الخير في امة محمد الا ان تقوم الساعة
بكيت لانه انا معائش الوضع في المستشفي وعارف في عيانين ما عندهم حق الجرعة وما اكلو طول اليوم
.
بكيت عشان حسيت حجم الفرحة الدخلها الزول دا علي ناس غلابة دموعم ناشفة في خدودم
.
المهم جيت راجع وحكيت لاابوي وعاينت لملامح وشو
ما بقدر اوصف ليكم ردت فعل ابوي كانت شنو
.
المهم بعد داك ابوي قال لي بعد صالح الدعوات للزول دا امشي وشوف زول محتاج اديهو القروش دي واجرو ثابت ان شاءالله .❤
ديل اهلي وديل اولاد البلد بالجد وديل اولاد السودان