داليا الياس تكتب : أكتر من كده ياربى يعملوا شنو الحرامية ديل عشان الشرطة تتحرك

بقلم : داليا الياس
تحياتى ومودتى للجميع…
على خلفية تفاقم معدل سرقة السيارات والحيرة البقت ملازمانا…
نحن فى جبرة حى الشهيد طه الماحى بقينا يوووومى بنسمع بى كسر عربية….
أول أمبارح مثلاً فى ليلة واااحدة وفى منطقة معينة قريبة كمان القسم إتكسر قزاز ٥ عربات! …واتسرقت لساتك عربيتين!…. ومرايات عربيتين برضو!!
أكتر من كده ياربى يعملوا شنو الحرامية ديل عشان الشرطة تتحرك وتفكر وتخطط لى كمين ولا تعمل دوريات حراسة ؟!
القصة ما قصة بلاغات يتحركوا فيها عشان يقبضوا الجناه…. يا ناس الشرطة القاعدين هنا حقوا يكون فى تخطيط إستباقى…مسح للبيانات وإستفادة من المعلومات وتشغيل امخاخ!….ماتنتظروا الجريمة لامن تقع ياخ.
نحن ذاتنا بقينا ما زى زمان….مافى شباب بيحركوا مناوبات فى الأحياء ….و إن كانوامعذورين أكيد كل زول فى همو….بس فى حاجات المسئولية فيها بتكون جماعية.
وأعتقد محتاجين نهتم أكتر بقصة تركيب إنذرات واى زول عندو قراش يحرص عليهو ولو بيشيل عربية تانية يتكرم على واحد من جيرانو.
بالجد الموضوع خطييييير وكبير ومنتشر .
وماااااتخلوا أى حاجة قيمة فى العربية مهما كانت بسيطة.
قد يكون كلامى ده معروف ومافيهو جديد…بس المؤكد إنو القروب ده مؤثر وفيهو كل الفئات المعنية بالكلام ده من قيادات وقوات نظامية ولجان مجتمعية ومنظمات مجتمع مدنى وحتى الحرامية البقوا بيشبهونا ومننا وفينا للاسف!!
وربنا يحفظ الجميع

وكفروا لى بالمرة