أحمد دندش:المستشار القانوني للفنانين راقد في المستشفيات بيعاني و يتألم براهو بدون ما (السادة النجوم) يحسوا بيهو
سودافاكس ـ كتب الإعلامي و مقدم البرامج السوداني أحمد دندش على حسابه الخاص بفيسبوك منشورا سرد فيه الحالة الصحية للأستاذ نادر محمود المستشار القانوني لأغلب الفنانين و المؤسسات الإعلامية في السودان.
و طرح دندش قضية غياب الفنانين و الوسط الفني من مساعدته بالرغم من أنه طريح الفراش و على عاتقه مبالغ طائلة نظير تلقي العلاج حيث قال:
“الاستاذ نادر محمود…اشهر محامي داخل الوسط الفني…تقريباً ماسك منصب مستشار قانوني لاغلب الفنانين وعدد من المؤسسات الاعلامية…وقدر في سنوات مضت يطلع بعضهم من كوارث حقيقية ويحافظ على نجوميتهم و(اكل عيشهم).
نادر ليهو قرابة ال٣ شهور راقد في المستشفيات من امراض قاسية شديد…لدرجة انو بقى يخضع لغسيل كلي وحالياً اتقررت ليهو عملية جراحية كبيرة.
المؤسف في الموضوع انو (الجوقه) الكبيييييرة الكانت حواليها من النجوم والمشاهير لما (كان بي صحتو)…الليلة اختفت تماماً…والراجل بيعاني وبيتألم براهو بدون ما (السادة النجوم) ديل يحسوا بيهو.
اوجع ليكم قلبكم…؟
فنانة كبيرة زارتو وقالت وهي مارقه: (لو احتجتوا لي حاجة كلموني)…يعني يااستاذة زول راقد في مستشفى مصاريفها (قيامتها قايمة) يكلموك تاني يقولوا ليك شنو.؟.
ياخ دي هينه…واحد فنان شاب لما عرف بمرض نادر قال ليهم: (انا عندي ورق قضية عندو)..!!
قبل كل حاجة يا(نجوم السجم والرماد) لازم تفهموا انو الراجل البتكلم ليكم عنو دا راجل عفيف ونضيف ونفسو عزيزة…يعني مامستني منكم شئ…لانو اساساً (فاقد الشئ لايعطيه)…بس على الاقل كان تردوا ليهو ولو بعض ديونو المتلتله الكتيييييرة العليكم واهمها…(ديون الخوة).
ربنا يرفعك ياحبيب ويواليك بالصحة والعافية وترجع لاولادك واصحابك واهلك واخوانك (الجد) بالسلامة…آمييين.
