(إحذر).. أحدث طرق “الإحتيال” في شوارع الخرطوم.. تحدث في وضح النهار..!

رصد محرر سودافاكس تحذيراً أطلقه أحد رواد موقع فيسبوك نشره على صفحة (احترس.. امامك كشة) واسعة الإنتشار، حذّر فيه من بعض الاساليب المستحدثة للإحتيال في الشوارع السودانية حيث كتب قائلاً:

(بعد إذن الأدمن
يا ناس اعملو حسابكم اليومين دي في ظاهرة جديدة في السرقة يلاقيك واحد لابس نضيف وقاشر ويقول ليك الشارع ده قدام مقفول وفيهو مظاهرات !!!(استغلال للوضع الحاصل في البلد والحقيقة ماف اي مظاهرات ) المهم وببدا يكذب ويوصف ليك ناس الشرطة ضربو الناس ويقرب منك ويشرح ليك كيف كان الضرب ويشلتك في اللحظة دي بشغلك وبشيل منك اي حاجة قريبة قروش موبايل .. بدون ما تحس بيهو وفي بتاع موتر متفق معاهو الحرامي بكون قريب من المكان بركب معاهو الحرامي وبجرو طوالي ، الحاجة دي حصلت بالنهار وفي شارع رئيسي !!!

الخلاصة :
– الناس تعمل حسابا في الشارع (اتلفت كويس وأقرا الشارع)
– ما تشيل معاك الموبايل الإ لضرورة ملحة
– ما تستعمل الجوال في الشارع (أو استعملو بحذر)
– ما تخلي زول غريب يقرب منك او يلمسك لأي سبب من الأسباب
– ما أي زول تسمع كلامو وتصدقو)

الخرطوم_ سودافاكس