محمد الطيب الأمين: العين في التراب !!

* معروف سلفاً أن كل شئ يتم بإرادة الله ولا شئ يتم دون إرادة الخالق العزيز ..
* ولذلك من البديهيات أن تقدم كلمة (إن شاء الله) قبل كل عمل مستقبلي تنوي القيام به ..
* أي عمل مستقبلي حتى ولو كان بعد ساعة فهو يدخل في إطار (القادم) وبالتالي هو (مستقبل) ..
* ولعل كثير منا يستخدم كلمة (إن شاء الله) وهو يقصد بها معنى آخر ..
* عند البعض أصبحت كلمة (إن شاء الله) تعني (عدم الإيفاء بالوعد) ..
* يقول ليك إن شاء الله بجي أفطر معاك .. وهو يكون عارف إنو ما جاي ..
* يقول ليك : يوم السبت بجيك ونمشي لفلان نشيل معاهو الفاتحة .. وهو يكون عارف يوم السبت ده بالذات هو عندو مواعيد مع خطيبتو وما ح يجيك ..
* الحاجة دي جعلت كثير من الناس لما تقول ليهم (إن شاء الله) بيقولوا ليك (معناها ما جاي وبتغشنا) ..
* بذات القدر فان من أكثر الكلمات إستهلاكاً كلمة (القادم أحلى) ..
* كلمة تبدو عليها ملامح التفاؤل ولكنها عندنا في السودان تبدو كلمة لا معنى لها إذا إنزلناها على أرض الواقع ..
* نحن في الهلال في كل عام نقول (القادم أحلى)..
* كل سنة بنقول كده ..
* وفي كل سنة بنكتشف إنو (الماضي هو الأحلى) ..
* لاحظ الآن منذ إستلام الكاردينال لسلطة الهلال ستجد أن في كل موسم يقول الهلالاب : (القادم أحلى) ..
* القادم أحلى قلناها قبل أربع سنوات والآن نحن في اسوأ حالاتنا على الاطلاق ..
* ما في قادم أحلى ولا حاجة ..
* ما في أسوأ من أن يتأهل المغربي والمصري (برالمة افريقيا) على حساب الهلال (سنير افريقيا) ..
* بل الأسوأ أن الهلال تذيل المجموعة ..
* والأصعب أن الهلال فشل في تحقيق أي فوز في المجموعات ..
* بل خسر داخل أرضه ..
* يحدث هذا والبعض يحدثنا عن (58) مباراة محلية لم يخسرها الهلال ..
* أها شنو يعني ؟؟
* يعني ده إنجاز بيرفع الهلال درجات ؟؟
* قول مليون مباراة لم يخسر الهلال محلياً .. يعني ده طموحنا ؟؟
* هو ذاتو محلياً في منو عشان نفرح بالانجازات المحلية ؟
* من الله خلقنا عرفنا إنو الهلال الأول في السودان في كل شئ والمريخ التاني ..
* الجديد شنو يعني ؟؟
* الحقيقة أن صورة الهلال إهتزت في افريقيا والوطن العربي ..
* وأصبحنا نتضايق من تعليقات (المعلقين) عن الهلال ..
* معلق مباراتنا أمام المغربي قال بالحرف : (لم يتبقى من الهلال إلا الاسم والألوان) ..
* ومعلق مباراة المصري قال في معناها إن الهلال سيئ وهش ومتذيل للمجموعة حتى أن الموزمبيقي أفضل منه ..
* هذا هو الهلال الذي تغزل فيه عصام الشوالي وحذر منه الترجي ..
* القصة ما قصة (مكاواة) ومقارنة بين الكاردينال وغيره من الرؤساء ..
* القصة قصة هلال ماشي يختفي ..
* الموضوع أكبر من النقاش الدائر الآن ..
* هلال أصبح كبيراً في المباني وأصبح صغيراً من حيث المعاني والمستوى الفني ..
* وحكاية القادم أحلى لن تصلح حال الهلال ..
* وحكاية دي ما أول هزيمة للهلال ، ودي ما أول مرة الهلال يطير ، دي حديث إنهزامي يثبت أن الرئيس الحالي لا يملك ما يقدمه ..
* لشنو تقارن نفسك برؤساء فشلوا ؟؟
* لشنو ما تكون أحسن منهم ؟؟
* لما نقول الهلال خسر والهلال كعب لشنو الناس بتقول الهلال خسر من مازيمبي وخسر من الوداد ؟؟
* ليه الكاردينال ما يرفع رأس الهلال ويشتغل صاح ويبقى أفضل من الرؤساء الفاشلين على حد قول إعلامه ؟؟
* ليه الكاردينال ما يكون إيجابي ويحقق ما فشله فيه الآخرون خصوصاً وهو (القوة المالية الضاربة) ؟؟
* بهذه الطريقة سيفقد الهلال حتى مكانته المحلية إعتباراً من الموسم القادم ..
* رئيس النادي قال في لقاء تلفزيوني وبالحرف الواحد : (عايز أعترف ليكم بحاجة كل المحترفين الدخلوا كشف الهلال أنا ما سجلتهم لكن السنة دي المحترفين مسؤوليتي الشخصية ومحترف ما جابوهو في التلفزيون ما بدخل كشف الهلال) ..
* طيب الحصل شنو ؟
* الحصل إنو شطب مكسيم وشيبولا وجاب تلاتة (على مسؤوليته) وشطب منهم اتنين و(واحد) ينتظر على الرصيف الآن ..
* خرج الهلال من الكونفدرالية (مدنقر رأسو) ودي الحقيقة التي يجب أن يعلمها الكاردينال ..
* خرج الهلال والعين مكسورة ..
* الهلال لما خسر من مازيمبي والوداد والترجي ما كان كده والله العظيم ..
* عشان ما تغش نفسك يا ريس ..
* الهلال ما كان كده ..
* القادم أحلى مقولة تحتاج لخدمة وعمل ..
* القادم أحلى مقولة تحتاج لبيئة نضيفة وفريق خالي من السماسرة والمنتفعين ..
* القادم أحلى مقولة تحتاج لرئيس يسمع الكلام الببكي مش الغزل وكسير التلج ..
* القادم أحلى مقولة تحتاج لمقومات وللأسف هذه المقومات غير متوفرة عند هذا المجلس ..
* ولذلك نقولها بكل واقعية (القادم أسوأ) ..
* ونركب صافنات ونجيبة (هلالابية) واصلو الزول بيموت والذكرى تفضل حية ..
* و…و…
* الله في ..

المصدر : باج نيوز