محمد عبد الماجد… المريخ بقى لا رئيس لا حارس!!

وإن طال السفر

· نقول ليهم شنو؟.

· نقول لي شفع الحلة شنو؟.

· وهم عندهم طبع شين.

· يلفحوا (الاسئلة) من الخشم زي (اللقيمات).

· الشافع الجنو لفحو بيبقى ليك في رقبتك.

· يخطف الموبايل.

· يشيل مفتاح العربية.

· يقفل المروحة.

· يسد التلفزيون.

· لفحي شديد.

· ديل نقول ليهم شنو؟.

· نشرحها ليهم كيف؟.

· نقول ليهم المريخ ما عندو قروش.

· عشان كدا ما عندو رئيس.

· ادم سوداكال دق ليكم صدرو قلتوا ما عاوزنو.

· طشفوا ادم سوداكال.

· اها عاد بنبقى على الجرسة دي.

· مشيتوا جبتوا محمد الشيخ مدني (ملحق).

· بي تعيين.

· محمد الشيخ مدني (الضرب) كتر عليه.

· شيء في الجوهرة.

· وشيء في النقعة.

· قام قدم استقالته.

· بقيتوا بدون رئيس.

· قاعدين ساي.

· جمال الوالي فات.

· واوكتاي مشى الدوحة.

· قال لو قعد اكتر من كدا بتفلسو بيه.

· ما عندكم رئيس فهمناها.

· عرفناها.

· قبلناها منكم.

· كمان عاوزين تقعدوا لينا بدون (حارس).

· لا دي كتيرة.

· ناس وليد الشعلة دي بي حارسكم بفرتكوا فيكم.

· عاوزين تقابلوهم كمان في الامارات وبدون حراس.

· بدون جمال سالم.

· انتوا ما عندكم رأس.

· لا رئيس.

· ولا حارس.

· والله دي صعبة عليكم.

· ولا بتبتلع.

· ولا في زول بيقبل بيها.

· دي حالة صعبة شديد.

· والله انا من شفت صلاح نمر بسك الكورة لمن يدخل وراها في الشبكة ، عرفت ليكم طوالي جمال سالم ما بيقعد ليكم.

· كمان الجابرو شنو على ناس صلاح نمر والجس؟.

· احسن يمشى يشوف مستقبلو.

· يشوف قرايتو.

· والله يقعد لي مع ناس صلاح نمر ديل يشقوه مغصة ساكت.

· صلاح نمر قاعد يتفرج في كورة وليد الشعلة وهي تتهادي في شبكة المريخ تقول قاعد يتفرج في بن سبورت.

· لكن زي ما بقولوا الموضوع عندو علاقة بالعادات والتقاليد.

· العرق دساس.

· ونحن اصلا.

· ما عندنا حاجة ساكت.

· تذكروا زمان قلت ليكم نحن أي حاجة عندنا بي نظام.

· تذكروا الكلام داك.

· اها هسع حوبتو جات.

· فاكرننا بنتكلم ساكت.

· انتوا قايلننا بنقطع ليكم في حاجة من رأسنا.

· تذكروا زمان ، ناس المريخ كان عندهم عقدة من هيثم مصطفى.

· أي مريخابي تهبشو يقول ليكم بس مشكلتنا نحن ـ المريخ ما عندو كابتن.

· كان عندهم عقدة من الحتة دي.

· ما عندهم كابتن.

· شوية كدا دخلوا على الغريق.

· بقوا يقولوا ليك : بس نحن ما عندنا صانع العاب.

· والله نحن نلقى لينا صانع العاب..ما في زول يقيف قدامنا.

· أي لاعب يسجلوه يقولوا ليك اللاعب دا زي هيثم مصطفى.

· جابوا ليهم لاعب من بورتسودان اسمو (فيصل هارون).

· ود الشريف كتب عنو 15 صفحة في جريدة الوان.

· بتذكر الكلام دا كويس.

· قالوا فيصل هارون دا زي هيثم مصطفى.

· فيصل موسم ما لعبه في المريخ.

· جابوا شيبة.

· شيبة من بورتسودان برضو.

· قالوا بس شيبة دا الخالق الناطق هيثم مصطفى.

· برضو شيبة ما استمر كتير في المريخ.

· جابوا حمد الشجرة.

· قالوا حمد الشجرة دا متل هيثم مصطفى.

· وحمد الشجرة ما استمر.

· مرقوها في بلغاريا جابوا ليهم لاعب اسمه مشاوي ..قالوا مشاوي دا زي هيثم مصطفى.

· ومشاوي ما نفع.

· جابوا فيصل موسى.

· قالوا هيثم مصطفى.

· فيصل موسى مشى الهلال.

· والساقية لسه مدورة.

· في النهاية قنعوا من حكاية زول يشبه هيثم مصطفى.

· انتظروا هيثم مصطفى 17 سنة في الهلال عشان يلعب ليهم موسم في المريخ.

· ويبلوا شوقهم من (التمريرات).

· نحن كلمتنا واحدة.

· وضربتنا الزول ما بقوم بعدها.

· ضربة واحدة.

· شافية وكافية.

· لكن والله الوصيف دا لو لقى ليه ضربة تانية ..بنزل التانية.

· الامارات ذاتها يمكن ما يمشوا ليها.

· يقوموا يزعلوا.

· ناس المريخ مرة كان عندهم ازمة في (الارتكازات).

· ما عندهم ولا ارتكاز.

· الهلال ما خلى ليه ارتكاز في البلد.

· أي ارتكاز سجلو.

· لقط الارتكازات كلها.

· علاءالدين يوسف البيلعب في المريخ ، الهلال قلعه منهم.

· الهلال خلى ليك المريخ بدون ارتكاز.

· قاعد في الصقيعة.

· لمن مامون ابوشيبة زعل – وقال دي ما طريقة دي.

· يعني نلعب ليكم كيف بدون ارتكاز.

· نلعب ليكم وضهرنا كاشف.

· الهلال بقى مغصة كدا في المريخ يلعب بثلاثة ارتكازات.

· لمن ناس المريخ فهمو حاجة.

· ومرة كدا الهلال قبل على حراس المرمى.

· ما خلى ليه حارس مرمى في البلد.

· أي حارس سجلو.

· تتخيلوا في فترة واحدة الهلال كان فيه المعز مججوب وابوبكر الشريف ومحمد آدم حارس الاهلي مدني السابق.

· واكرم الهادي سليم تحت السن.

· كلهم جابهم الهلال.

· الحراس الثلاثة الاوائل كانو بيلبعوا في المنتخب.

· ناس المريخ رأسهم قطع.

· قال نحن نعمل شنو؟.

· نتصرف كيف؟.

· وتاني مامون ابوشيبة قال ناس الهلال قاصدنها.

· قاصدين يخلونا بدون حارس.

· قطعوا رأسنا.

· اها يا ابوشيبة القصد الجد جد ..حصل السنة دي.

· ناس الهلال عندهم يونس الطيب انهى الموسم كافضل حارس في الساحة.

· وعندهم جمعة جينارو.

· وعندهم الموهبة والفلتة محمد النور ابوجا.

· تعرف ناس الهلال عملوا شنو؟.

· جابوا جمال سالم.

· تاني.

· عشان نقفل المجموع.

· وننتهي من الحتة دي.

· ونفكر في حاجة تانية.

· نشوف لينا موضوع تاني.

· جمال سالم ضربة مركبة.

· او ضربة مزدوجة.

· اول شيء الهلال محتاج ليه.

· عندنا حارسين فقط.

· يعني التسجيل تسجيل فني.

· ما تحسبوه شغل اداري بس.

· وجمال سالم تتوفر فيه كل الشروط التى يطلبها الهلال.

· لاعب صغير في السن.

· وعنده خبرات كبيرة.

· ولاعب منتخب.

· وافضل ميزة في جمال سالم والتى سوف نتحدث عنها لاحقا ان لاعب صاحب شخصية.

· لاعب عندو شخصية في الملعب.

· واللاعب العندو شخصية عملة نادرة.

· البطولات تحقق بمثلهم.

· وعشان نقرب ليكم الحكاية ..نقول ليكم اهم ميزة في فارس عبدالله لاعب الهلال الحالي انو عندو شخصية في الملعب.

· وجمال سالم هسع عندو شخصية قوية في الملعب.

· وحارس المرمى قبل أي شيء (شخصية).

· عنده هيبة في المرمى.

· وفوق هذا كله – جمال سالم متأقلم على الاجواء في السودان وعارف الدوري السوداني.

· ولا اظن ان هناك خلاف حول جمال سالم (فنيا).

· يكفى ان المريخ قدم افضل مواسمه الافريقية سنة 2015 ووصل للمربع الذهبي بفضله.

· يعني ما يطلع زول يغالطنا في مستوى جمال سالم.

· يمكن جمال سالم تراجع مستواه هذا الموسم عشان ما قاعدين تصرفوا ليه حقوقه.

· والمحترف وقت ما يلقى قروش مستواه بتراجع.

· وجمال سالم في هذا الموسم بيقعد في يوغندا 3 شهور وفي السودان اسبوع.

· يعني تراجع مستواه الفني مقدور عليه.

· ح تشوفوه في الهلال بيعمل شنو؟.

· وعشان ما تقولوا نحن بنتكلم ساكت ..شهدنا لجمال سالم وقلنا انه اللاعب الوحيد الذي يستحق ينتقل للهلال.

· وعشان تبقوا عارفين اخلينا ليه خانة قبل 6 شهور.

· في معزة اكتر من كدا.

· 6 شهور ونحن بنلعب بي حارسين.

· وانتوا ما عاوزين تفهموا.

· الضربة الثانية في تسجيل جمال سالم في الهلال تتمثل في ان الهلال بتسجيله للحارس اليوغندي سوف يجعل المريخ يلعب الموسم القادم بحارسين فقط.

· ما في ليكم طريقة تسجلوا أي حارس مرمى هذا الموسم.

· لا في هذه التسجيلات.

· ولا في التسجيلات القادمة.

· رأسهم ح يقطع.

· والمريخ عنده بطولة عربية.

· وبطولة افريقية.

· والدوري الممتاز.

· وكاس السودان.

· كل هذه البطولات سوف يلعبها المريخ بمنجد النيل وعصام عبدالرحيم.

· يعني الضربة من الكاردينال المرة دي ضربة معلم.

· زي ضربة شيبوب.

· ضربة صاح.

· والله يكمل ويكلل ان شاءالله كل الخطوات بنجاح تام.

· ……….

· ملحوظة : ولسه راجيين الكتير.

هوامش

· امس قدم المنتخب الوطني مباراة كبيرة امام السنغال.

· واظن ان فكر الكرواتي وضح بشكل كبير.

· يا ريت تخلو المدرب يشتغل.

· واضح انو عارف بيعمل في شنو؟.

· الانتقادات والهجوم والتدخل في عمل المدرب لن نجنى منه غير الخراب.

· أي مدرب خلوه يشتغل.

· وما تقعدوا تنظروا ليه.

· الخسائر التى تحدث في الكورة السودانية بسبب التنظير والهجوم الدائم على المدرب.

· امس قدم ولاءالدين مباراة كبيرة ..واثبت ان رهان المدرب عليه لم يكن من فراغ.

· ما في زول كان بيتخيل ولاءالدين يقدم هذا المستوى.

· ابوعاقلة قدم اجمل مباراة اشهده له.

· مباراة تفوق بها ابوعاقلة على كل نجوم المنتخب السنغالي.

· كذلك اجاد امير كمال وسمؤال.

· حقيقة المنتخب السوداني قدم مباراة كبيرة.

· واظن ان ارضية الملعب كانت خصم على المنتخب السوداني.

· لو كانت المباراة في استاد الهلال لحقق وليد الشعلة واخوانه الانتصار.

· وليد الشعلة في كل يوم يثبت فيه انه المهاجم الاول في البلد.

· مهاجم واعي وراكز وتقيل.

· ننتظر ان يكمل مجلس الهلال التعاقد مع سليم لاعب الامل عطبرة.

· ومع منتصر عثمان.

· الهلال سوف يكون حاجة تانية.

· وننتظر محترفين على مستوى.

· صرف النظر عن ابكر سليمان قرار جيد.

· وكذلك من كونتاك طالما كان هناك حديث عن عمره.

· ما عاوزين لاعب ساكت.

· وما عاوزين لاعب كبير.

· سليم ومنتصر.

· ومنتصر وسليم.

· وامشوا الامارات على كدا.

· ح تعملوا عمائل.

· اعادة قيد نزار حامد وصهيب الثعلب طبعا اجمل شيء.

· وان شاءالله الافراح تستمر.

· والافراح تدوم.

· ولسه.

· الهلال لو عاوز يحقق بطولة خارجية عاوز اضافات قوية.

· محليا ما عندنا مشكلة.

· وحراسة المرمى اتحلت ازمتها بشكل نهائي.

· وفي الانتظار.

· وابقوا على سفر.