لو متذكر..نضال حسن الحاج
لو متذكر..نضال حسن الحاج
كنت بتفهم رمشة عيني ولغة إحساسي قبل أفكر..
لو متذكر..
كنت رسول الفرحة إذا ما شفت مزاج الريد متعكر..
ولو متذكر..
أنا بي كيفي مرقت وجيتك..
أنا سميتك..
وشلت زيادة ريدي وحني ومن إحساس الروح تميتك..
ولما الناس بتلم لي ذاتا أنا خليت ذاتي ولميتك..
وهسع مالي ولا هميتك..؟
أنا لو عارف كيف عاملتك
سبت الناس والدنيا عشانك
جبت مشاعري وجيت كملتك..
أنا هملت الروح والخاطر.. وقول العالم.. وما هملتك
وأنا عاينت جحودك وبعدك.. ورغم الحاصل إتحملتك..
لو متذكر..
أنا مليت الخوف من بكرة..
وكل ما احتاج الحن يا ظالم
أرجع أدق بيبان الذكرى..
وليييه أنا كل ما احتجت إحساسك
.. ألقى خلايا البوح محتكرة..
تكون أحلامك رهن إشارتك..
ويصبح حلمي مجرد فكرة
لو متذكر..
تاني وحاتك ما بتلقاني..
ما بتحمل قلبي مواجع وظلم حبيب اخترتو وجاني..
العينين الشايلة الفرحة تقسم للعشاق مجاني..
الأحزان ما كانت شايلة قرعة الفرحة بتترجاني
حتى الليل.. والقمر الساهرو بيهو الناس كتير حجاني..
وقلبك يا ما استنى مروقي وياما حرس بابي اترجاني..
وهسع ياني كتلت مشاعري وسميت قلبي الرادك جاني..
هو فعلاً جاني.. خلاص مبسوط؟؟
جاني عشان يوم هرجل حزني رفعت عليو بي جرأة السوط..
وجاني عشان كان بسكت ياما عشان ترتاح جواي.. بسكت ما بجوط
جاني عشان يوم جمع العالم جيتو براهو لقاك مبسوط..
وهسع عادي..
من يوم جيت سكنت دواخلك.. وجوه غناك أعلنت قعادي..
أنا ربيت الروح على كيفك وهسع قادر أواسي فؤادي..
وزي ما في الإحساس سكنتك.. أمرق قسراً عبر مدادي..
وعادي لقيتك.. وهسه مشيت خليتك عاااادي
نضال حسن الحاج
