تهاني عوض : لو داير تظهر .. ألبس أصفر!
سودافاكس – الخرطوم : في ناس كدا لا يعجبها العجب ولا الصيام في رجب.. دائماً بحبوا المعاكسة والمشاكسة والعناد.. تقول ليهو: دا سكر ..يقول ليك دا ملح !! تقول ليهو الليلة الثلاثاء..يقول ليك في امريكا الليلة الاتنين وفي بريتوريا (جنوب افريقيا) الليلة الاربعاء !! تقول ليهو اكتب صاح عشان اقدر افهم كتابتك..يقول ليك اللغة ما مهمة المهمة الفكرة والاحساس .. طيب يا بروتس فكرتك واحساسك ديل الناس يعرفوهم كيف ؟ بالشم؟ ولا بالنظر ؟ ما لازم الواحد يقرأ ما تكتبه عشان يفهمك ويفهم احساسك وشعورك او فكرتك او موقفك او الرسالة العايز توصلها للناس!! ولييه الناس بتكابر وما بتعترف بالخطأ ؟! ياخ ما عيب انك تغلط..لكن العيب انك ما تعترف بغلطك وتصر على الغلط لمجرد انك عايز تحافظ على (منظرك) قدام نفسك او لمجرد انك عايز تعاند وتشاكس وتصر على الغلط او لمجرد حب الظهور ولفت النظر ..ياخ لو عايز تظهر ما ضروري تلبس اصفر..ممكن تظهر لو عندك فهم وفكر . وصدق من قال: تكلم حتى أعرفك.
سودافاكس
تهاني عوض
