مصاب وشاهد عيان ينسفان رواية قوش

في بوست نقلا عن صفحته الشخصية بالفيس بوك، في أول الدقائق بلغ حجم الشير والتعليقات بالآلاف*

*تفاصيل موكب ١٧ يناير*
*الزمان : الساعة ٢*
*المكان : بري*
*الإصابة : اليد والرجل*
*المنفذ : جهاز الامن والمخابرات*

*أحمد اسماعيل*

الموضوع بدا من سوق ٤ حوالي الساعة ٢ ظهر عدينا الترس الاول ويادوب المظاهرة بدت من الدرايسة ، كنّا حوالي ٤٠ اول اقل بدا الهتاف حوالي الميدان وداخل الحي حتي تجمع الناس في الميدان مره اخري وكان العدد يتزايد حتي اصبح ٥٠٠ وبعد ذلك الي ١٠٠٠ واخير اكثر من الف ، الهتاف كان من كل مكان بس انا كنت حريص انو ارجع الناس لي موضوع الفاتح ( نحنا مرقنا وماخايفين وين الفاتح عز الدين ) .
الوفود بدت تزيد تاني ودايرين نمشي علي سوق ٤ لكن النظام كان مطوق بري من جميع النواحي فاعلنا عن حريتنا في الميدان .

البمبان اضرب زي الساعه ٢:٤٥ لكن الشفاتة برجعو بي نارو ، كان في رصاص كتير جدا في الهواء لكن الحكومة ما قادرة تخش الميدان ، مكافحة الشغب دخلو من الناحية الشرقية من المسجد وفِي بتاع أمن بتقدم اول ما البمبان ينضرب من الناحية الشمالية عشان حبه حبه يقدر يدخل الميدان ويبدا يضرب من طرف وبعديها التاتشرات تخش لكن الشباب ما رحموهو بالطوب فخاف وجري تاني البمبان كتر شديد واحد من الشباب قال لي انحنا نحاول نشغلهم من الناحية الجنوبية للمسجد عشان يضربوا بمبان هناك ويخفف علي ناس الميدان عشان الزحمة . اتحركنا فعلا حسب الخطة بس فجاءة ظهر عسكري بتاع جهاز أمن ومخابرات من الناحية الشمالي للميدان( الزقاق القبيل ) شايل خرطوش بتاع بلي بتعمر من تحت
وعمر علي الزول القدامي طوالي ، يعني هو علي يدنا الشمال وانحنا متجهين جنوب شرقي للمسجد المهم انا زحيت الزول القدامي واتلفتنا تاني علي المتظاهرين وداك يا الجري ، قام ضرب طلقة وما عارف الطلقة جات وين لكن بعد ٣ ثواني يدي خدرت وفقدت توازن لحدي ما وقعت وجاء زول جري بي بيت ناس وهناك تم الإسعاف الأولي وبقينا في البطلعنا شنو حوالي الساعة ٤ قدرنا نطلع والحمد لله بقينا في كيف نخش المستشفي اتصلت علي اخ وصف لي انو امشي دار العلاج وفِي زول مستنينا هناك لكن لمن مشيت زولو أتأخر علي شديد تاني ضربت لي واحد صحبي قال لي تعال لي مشيت ليهو عمل لي إسعافات أولية برضو وبعد داك دخلت رويال كير علي الساعة ٦ تقريبا دخلتنا بي ١٠ دقائق كانت إعلان وفاة لأول شهيد بالموكب ، الشرطة وجهاز الامن لم يكتفو قامو بإطلاق البمبان خارج حرم المستشفي والرصاص الحي في الهواء . المهم بي جاي جاي عملت صورة الأشعة وطلع في رايش ادوني مسكنات ومشيت البيت علي الساعة ١١ الم شديد جدا ضربت لي قريبي دكتور قال اجيهو طوالي.

مشيت وعملت عملية طلع انو ما رايش طلقتين بتاعت سكسك والحمد لله القصة انتهت علي كده سلامه سلامه .
في احساس بتاع الم بسيط في الرجل لكن قلت احتمال من كمية الحقن الاخدتها ولكن بعد شويه لقيت انو في زي ورم في الرجل فوق من الخلف علي الجنبة اليمين زي ورم اليد ، مشيت ع البنطلون الكنت لابسو يوم بري لقيتو مقدود، العملية بتاعت الرجل ما كانت متعبة لانو الطلقة كانت سطحية والحمد لله . بي كده انا تمام والحمد لله

انا بحكي القصة دي عشان اوريكم انو الناس دي بتفكر كيف وحياة البني آدم بالنسبة ليهم ولا اي حاجة ، وَيَا صلاح قوش الزول الضربني ما بنت شيوعية انا ضربني زول لابس كاكي بتاع جهاز أمن .
حكيت عشان اوري القذارة بتاعت القوات الأمنية لابناء الوطن وفِي مظاهرة سلمية بكتلو ويضربو الناس عادي
حكيت برضو عشان اي زول كان في بري يمشي يعمل صورة أشعة لانو عادي ممكن يكون مضروب وهو ما عارف

وصحي الطلقة ما بتكتل بكتل سكات الزول