تهاني عوض : هييي عااااد اتحزمن واتلزمن يا المعابتعرفن تطبخن !!

بما انو الواحدة خلصت امتحانات كدي اللنتفشى ونبرد بطني دابني في .. اها اولاً بالتبادي في بنوت كتيرااات من جيلنا دا (جيل الجلكسي والايفون والايباد) توهن فاهمات كلمه (أنثى) دي غلط !!! وحات ابوي زي ما بقلكن كدي!! (زي هنايه ديك الكرهتنا الجامعه )!!
يعني توها الواحده فيهن ما تقعد لها في حته ولا قدام ناس إلا (تنداح) وتتباهى بانها ما بتعرف الجردقه من العطرون !!! وتقول ليك (القرع) مش ياهو (البامبي)؟؟ !!! الكسبره مش ياها زاتها الشمار الاخدر !!! والدوكه دي مش زي الصاج البعملو فيهو البيرقر ( استغفر الله )!!!!
والله انا ما بعرف (‫#‏الطبيخ‬) والملاحات االمتعبه دي .. اصلاً (ماما) براها بتعملا لينا !! (يكيلك الرماد الكال حماد عاد) يؤؤؤؤخ ( طبعا الكلمه دي بتسوي لي وجع نوايض ) .. البصل دا بعمل لي حساسيه في عيوني وريحتو بتقوم لي الجيوب الانفيه يااااي وببوظ لي (اضافري) سغيل خلاث !!! ( عاد يا يمه اخجلي ولا اكريني النخجل ليك انا)!!
انتو عارفين انا بعرف اعمل (البيض) المسلوق والبيض بالطماطم ياااااااااااي ياااااي بعملم رهييبااااااااااااااااااااات (اللهم لا تخوزقنا لا تعولقنا )
اها بس يخواني هسي متل دي ان الواحد جابلو موس ميته وشلخه مطارق وحشاهن ليها بي شطة بطنو بتبرد :
والشي المحيرني ياولاد امي انها بتتباهى بانها ما خابره (كوعه من بوعه ) وفرحااااانه للضرس الاخير قايلاها فلاحه ولا شيتن بنضمو بيهو والوحده تتوهم بانو راح يقولولا ( انتي انثى ورقيقه ومزه) الكلام البلا طعم داك
يختي وقتين ما بتعرفي غير سلق البيض (اتلهي اسكتي ساكت ) والله بلا شتيمه لي امك وتسوي روحك مضحكه وسط الخلايق ويقولو عليك لتخه ودلاهه ساكت ماني شايفه شيتن تاني
ومتل دي البعرسا وقع وماحدا سمى عليهو حيضطر لواحد من خيارين 1- واااشريري عليهو يا قطعو في حشاهو ويقول دا قضاء وقدر وكل شي قسمة وينكرب لاكل الدكان ولا الدليفري وان اشتهالو لي ناس( نعيميه ومفروكه وتقليه وام تكشو وملاح بصاره وملوحه وفسيخ …الخ اليمشي بيت امو كل بعد كم يوم(الفي شنو والمافي شنو ) مش احسن من ما مصارينو ينشفن ولا يجيهو زلالي من اكل (البيض المسلوق)؟!
وان كمان طلع ملحلح ومعلم شغل المطبخ من اولو دا اليكفكف ايدين العراقي والله شديد معاهو (و اللهم لا شماته ) !
الخيار التاني بعد ما تجي الطوبه في المعطوبه ويكتشف انو البت المزه ديك طلعت ما بتفرز القرع من البامبي اياهو الرجعها لي بيت امها متل رجعه الهام بت مريم من (جدة).. يا كافي البلاء قالوا ليك راجلا رجعها من فد شهر بعد العرس .. واشريري عليها وحات الله قالو بي جردل خبيزها السونو ليها خالاتها بنات شيخ محجوب !
انا غايتو الشي الوصلته ليهو انو السبب في دا كلو (الامهات ) يعني ما معقوله البت زي الصبي تقوم من النوم الساعه 9 تجيها الشمس في الحوش تخش تكملو في بطن الاوضه !!(اجي اجي عاد نبقى لي جنس دا )
الام تنضف ولا كان في شغاله تنضف (وستهم نايمه ولا ماسكهالتلفون بتوتسب ولا بتفسبك و ) يكوركو للفطور متل الفي مطعم تاكل وتغسل يدينا وترجع مكان كانت
الام نهار الله ما طال تصاقر المطبخ ولو نضمو معاها بتك وين والله جات من الجامعه تعبانه ودخلته نامت خلوها ترتاح القرايه كتيره (مع انو في الجامعه بتكون خاشه من ام كروش ومارقه في بام مصارين ) وايديها بقن دشنات من قطيع النجيله
الام تسوي الغدا تغسل العده وتمرق الفرش والسنيوره نايمه (علي قول حبوبه شلوفتين وعشره اصابعين ( المغسه راااااااقده ) !