تهاني عوض : بمناسبة اجازة المغتربين والمهاجرين: للبنات وبس..ممنوع دخول أبو شنب !

أخواتي العزيزات..طبعا اليومين ديل عودة المغتربين والمهاجرين بمناسبة الاجازة السنوية وصيام رمضان مع الأهل والأحباب في أرض الوطن ..طبعا في الغالب تكون في مناسبات افراح افراح وليالي ملاح وأعراس وخطوبة وفركشة خطوبة وشواكيش وبكاء ودموع وحاجات تانية حامياني ! اها عايزة أقول ليك كلام ختيهو حلقة في أضانك ..لو عندك حبيب أو خطيب أو ارتباط مع زول بطئ وما شادي حيلو في إكمال المواضيع وتحقيق حلم الزفاف أحسن من هسي تضغطي عليهو عشان يحدد موقفو ويعمل خطوة جادة في الاتجاه الصحيح ، ولو شعرتي بيهو لسع بنظر وبتفلسف وبماشي في برنامج (التبريرات) داك فأحسن شئ تشوفي ليك سبب لي (شكلة) وزعل ، وقولي ليهو بالواضح كدا (أنا حاسة إننا محتاجين نبعد عن بعض شوية ، عشان نقيّم العلاقة) وركزي في كلمة (شوية) دي عشان لو (الموضوع) باظ ما تكوني دقستي وتجي تقولي تهاني قالت وضيعتني اريتا بالساحق والماحق والبلاء المتلاحق!! بعدين جيبي ليكي ورقة وقلم وخشي قوقل واعرفي مواعيد رحلات الطيران القادمة إلى الخرطوم ..وركزي على الخطوط (القطرية) وطيران (الخليج) ، و(الخطوط السعودية) ، وطيران (الامارات) .. أوعاك من ناس خطوط طيران (ناس) و(سماء دبي) و(العربية) ديل يا إما مفلسين أو بخيلين أو ناشفين (كو) !!وأخير منهم بتاع ركشة مضمون ولا بتاع طيران (ناس) مجهجه .. أما ناس البحر ديل ناس معايش وبجوا خامين جنس خم ..شئ شنط وشئ مواد غذائية وشئ عفش ، وشئ تلاجات وشاشات وتلفزيونات وغسالات وموكيت وسراميك وعدة مطبخ ودولايب وأثاثات منزلية وكنب وكراسي .. ديل مدبرين وعارفين بعملوا في شنو .. ناس معيشة وتدبير وتجهيزات بالقطاعي .. ديل أخير من ناس الشنط المليانة (دلاقين) وبجوا بعد كل تلاتة سنين !
أوعاك تختي في بالك ود جيرانكم الكنتي (مكجناهو) ورفضتيهو زمان داك ..حتى لو سافر دبي أو كان مقيم في الدوحة ..دا كان جا واتقدم ليك بكون زعلان ولسع متذكر أيام (الفلس) و(العطالة) وبكون خاتيها ليك وعايز (ينتقم) ويرد الاعتبار (لنفسو) .. وحتى لو اتقدم ليك ووافقتي بذكرك بــ(الماضي) القديم ويقول ليك: إنتي مادية زمان انا مش اتقدمت ليكم وطردتوني طردة (الكلب)؟!!! أها كمان أوعاك ﺗﺨﺘﻲ ﻓﻲ ﺑﺎﻟﻚ ﻭﺩ (ﻋﻤﻚ) أو ود (خالك) ﺍﻟﻔﻲ ﺍﻟﺴﻌﻮﺩﻳﺔ، ﻛﺎﻥ ﺩﺍﻳﺮﻙﻛﺎﻥ ﻛﻠﻤﻚ ﻣﻦ ﺯﻣﺎﺍﺍﺍﻥ ..ﻣﺎ ﻛﻨﺘﻲ ﻟﻲ ﻫﺴﻲ ﺑﺎﻳﺮﺓ، ﻭﻛﺎﻥ ﺍﻟﻠﻪ ﺃﺭﺍﺩ ..ﻭوقام قريبك داك ﻓﻜﺮ ﻓﻴﻚ ﺣﺎﺗﻠﻘﻲ ﻣﻨﺎﻓﺴﺔ (ﺷﺮﺳﺔ) ﻣﻦ ﺑﻨﺎﺕ ﺃﻫﻠﻚ ﻭﺑﻨﺎﺕ ﺍﻟﺠﻴﺮﺍﻥ، ﻭﻛﺎﻥ ﺣﺼﻞ ﻭﻋﺪﻳﺘﻲ ﻣﻦ ﺩﻭﺭﻱ ﺍﻟﻤﺠﻤﻮﻋﺎﺕ ﺩﻩ ﻭﻭﺻﻠﺘﻲ ﺍﻟﻨﻬﺎﺋﻲ ﻭعرستيهو ﺃﻭﻝ ﺷﻜﻠﺔ ﺑﻴﻨﺎﺗﻜﻢ ﺣﺎﻳﺬﻛﺮﻙ ﺑﻲ ﻣﺎﺿﻴﻚ ﺍﻟﻬﻮ ﻋﺎﺭﻓﻮ ﻭﺣﺎﻓﻈﻮ، ﺍﻟﻌﺒﻲ ﻓﻲ ﺍﻟﻤﻀﻤﻮﻥ ، ﺍﻟﻐﺮﻳﺐ ﻻ ﻋﺎﺭﻑ ﻟﻮﻧﻚ ﺍﻷﺳﻤﺮ ﺍﻟﻔﺴﺨﺘﻴﻬﻮ ﺑﺎﻟﻜﺮﻳﻢ ﻭﻻ ﺷﺎﻓﻚ ﺑﺎﻟﺘﻮﺏ ﻭﺍﻟﺴﻔﻨﺠﺔ ﺍﻟﺨﺪﺭﺓ ﻣﻨﺘﻈﺮﺓ ﺳﻴﺪ ﺍﻟﻠﺒﻦ ﺑﻲ ﺍﻟﺒﺴﺘﻠﺔ !
ثالثا: ﺃﺑﻌﺪﻱ ﻣﻦ ﻧﺎﺱ ﺃﻣﺮﻳﻜﺎ ﻭﺃﺧﺘﻴﻬﻢ غادي غادي، ﺃﻭﻋﻰ ﺗﺘﻐﺸﻲ ﻓﻴﻬﻢ، ﺍﻟﻮﺍﺣﺪ ﻣﻨﻬﻢ ﺗﺸﻮﻓﻴﻬﻮ ﻗﺎﺷﺮ ﺗﻘﻮﻟﻲ ﺷﻐﺎﻝ ﻣﻊ (ﺃﻭﺑﺎﻣﺎ) ﺫﺍﺗﻮ، ﻓﻲ ﺍﻵﺧﺮ ﻳﻄﻠﻊ ﺑﻐﺴﻞ ﻋﺪﺓ ﻓﻲ ﻣﻄﻌﻢ
ﻭﺩﺍﻳﺮ ﻳﺴﻮﻗﻚ ﺗﺮﻏﻲ ﻟﻴﻬﻮ ﺍﻟﺼﺎﺑﻮﻥ ، ﻭﺑﻬﺪﻟﺔ ﺍﻹﻧﺠﻠﻴﺰﻱ ﻣﺎﺍﺍﺑﺘﻘﺪﺭﻱ ﻋﻠﻴﻬﺎ ﺑﺘﺤﺮﺟﻚ ﻣﻊ ﺍﻟﺨﻮﺍﺟﺎﺕ ﺳﺎﻱ!! .
رابعا: ﺃﺑﻌﺪﻱ ﻣﻦ ﺍﻟﺒﻴﺠﻲ ﺷﺎﻳﻞ ﺷﻨﻂ ﻛﺘﻴﺮﺓ ﺩﺍﻙ، ﻣﺎﺍﺍﺍ ﺗﻔﺮﺣﻲ ساي وﺗﻘﻮﻟﻲ ﺩﺍ ﻣﻘﺮﺵ ﺟﺎﻱ ﻣﻠﻴﺎﻥ ﻫﺪﺍﻳﺎ، ﺍﻟﺰﻱ ﺩﺍ ﺗﻠﻘﻲ ﺃﻣﻮ ﻧﺠﺎﺍﺍﺍﺿﺔ جنس نجاض ﻭ ﺃﺧﻮﺍﺗﻮ ﺷﻴﺎﻻﺕ ﺣﺎﻝ ﻭﻃﻠﺒﺎﺗﻬﻢ ﻛﺘﻴﺮﺓ، ﻟﻤﻦ ﺗﻌﺮﺳﻴﻬﻮ ﺍﻟﺤﺒﺔ ﺩﻱ ﻣﺎ ﺑﺘﻠﻘﻴﻬﺎ ﻣﻨﻮ، ﻛﻠﻬﺎ ﻟﻲ ﺃﻫﻠﻮ .
خامسا: أﺳﻤﻌﻲ ﻛﻼﻣﻲ ﻭﺃﺑﻌﺪﻱ ﻣﻦ ﻧﺎﺱ ﺃﻭﺭﻭﺑﺎ وخاصة اوربا (الشرقية) ﺍﻟﻮﺍﺣﺪ ﻣﻨﻬﻢ ﻳﺠﻲ ﻫﻨﺎ ﻳﻌﻤﻞ ﻓﻴﻬﺎ (ﺳﻔﻴﺮ) ﻭﻫﻮ ﻫﻨﺎﻙ ﻛﺎﻥ ﻛﺎﺑﻲ ﺍﻟﺰﻭﻏﺔ ﻭﺳﺎﻳﻖ ﻟﻴﻬﻮ ﺗﺎﻛﺴﻲ أو يكون عايش على (الاعانات بتاعت اللاجئين) .. ﻭﺃﻭﺭﺑﺎ ﺫﺍﺍﺍﺗﺎ ﻣﺎﻋﻨﺪﻫﺎ ﻋﻤﺎﺭ . و ﺃﻭﻝ ﻣﺎ ﺗﻘﺒﻀﻲ ﻓﻲ ﻭﺍﺣﺪ ﺍﺳﺄﻟﻴﻬﻮ ﺇﺟﺎﺯﺗﻚ ﻛﻢ؟ ﻛﺎﻥ ﻃﻠﻌﺖ ﺃﻛﺘﺮ ﻣﻦ ﺷﻬﺮ ﺷﻴﻠﻲ ﺳﻔﻨﺠﺎﺗﻚ ﻭﺃﺟﺮﻱ ﻣﻨﻮ، وأوعاك من ﺍﻟﻨﻮﻉ ﺍﻟﺒﻴﻘﻌﺪ ﻫﻨﺎ 6 ﺷﻬﻮﺭ ﻭﻳﺴﺎﻓﺮ 6 ﺷﻬﻮﺭ، ﺗﻌﺮﺳﻴﻬﻮ ﻳﺮﻣﻴﻚ ﻫﻨﺎ ﺇﻗﺎﻣﺔ ﻣﺎ ﺑﻴﻄﻠﻌﻬﺎ ﻟﻴﻚ .. وكل شهرين ونص يرسل 200 $$$، ﻗﻌﺎﺩ ﻟﻲ ﻗﻌﺎﺩ ﺃﻗﻌﺪﻱ ﻓﻲ ﺑﻴﺖ ﺃﺑﻮﻙ .
سادسا: ﺭﺟﺎﻝ ﺍﻟﻨﺴﻮﺍﻥ ﺃﺧﺘﻴﻴﻴﻴﻬﻢ، ﻣﺎﻟﻚ ﻭﻣﺎﻝ ﺍﻟﻔﻀﻠﺔ ﻭﺍﻟﻀﺮﺓ .
سابعا: ﺭﻛﺰﻱ ﻋﻠﻰ ﻣﻮﺩﻳﻞ ﺍﻟﻤﻮﺑﺎﻳﻞ ﻭﺷﻜﻞ ﺍﻟﺠﺰﻣﺔ .. وموديل العربية .. ديل ﺑﻌﻜﺴﻮ ﺍﻟﻮﺍﻗﻊ ﻛﺘﻴﺮ .. ﻭﺍﻟﺘﺰﻣﻲ ﺇﻧﺘﻲ ﻛﻤﺎﻥ ﺑﺎﻟﺤﺸﻤﺔ ﻭﺍﻟﻮﻗﺎﺭ .. ﻛﻠﻬﻢ ﺷﺒﻌﺎﻧﻴﻦ ﻓﻲ ﺍﻟﺤﻨﻜﺸﻪ ﻭﺍﻟﻤﻮﺿﺎﺕ ﻭﺍﻟﻮﺍﺣﺪ ﺑﻴﻘﻮﻝ ﺑﺲ ﺩﺍﻳﺮ ﻟﻲ ﺑﺖ ﺑﻠﺪ (ﺑﺴﻴﻄﺔ) ﻭﻣﺴﺘﻮﺭﺓ وتكون (طباااخة) وبتعرف تسوي الويكة والعصيدة بالتقلية ، وملاح الويكاب والقراصة بي الدمعة (الحزينة).. أﻟﻌﺒﻲ ﺍﻟﺪﻭﺭ بامتياز ، وكان في طريقة أول ما يجي رسلوا ليهم صينية مدنكلة ، وخلي صاحبتك اللي هي أختو تقول ليهم (فلانة) دي خترية وطباااخة شديد ويدها (طااااعمة ) ..

تهاني عوض