حرم والي ولاية الخرطوم: الفريق ما عندو علاقة بالكورة.. وهلالابي ساي بالاسم
ببساطة سودانية وتواضع جم، اجتمعت مجموعة من النسوة من قيادات المؤتمر الوطني وبعض زوجات المسؤولين من الوزراء والولاة، على مائدة رمضانية في حي المطار بمنزل سامية أحمد محمد القيادية بالمؤتمر الوطني..
بعد أن ذهب الظمأ وابتلت العروق والدعوات بثبوت أجر الصيام، كانت الأنظار تبحث عنها من بين رصيفاتها من نساء المسؤولين ربما لكثرة القضايا والموضوعات الشائكة المبذولة على أرض الواقع والفضاء الإسفيري وما تضج به ولاية الخرطوم من أزمات ومشاكل جعلت زوجها (عبد الرحيم محمد حسين) في دائرة الضوء بعد مغادرته وزارة الدفاع وقدومه لمنصب والي الخرطوم، لم تلفها تلك الهالة والحواجز في الوصول إليها بوصفها زوجة والي الخرطوم.. المشاكل والشائعات، رسائل مواقع التواصل الاجتماعي التهكمية، ورسوم الكاريكاتير، وتفاصيل وخبايا شخصية عبد الرحيم محمد حسين، هي التي جعلت الأنظار تبحث عنها لتطرح عليها هذه التساؤلات والشواغل والهموم التي تضج بها الخرطوم، كل تلك المشاغل كانت حاضرة في التساؤلات التي وضعتها (اليوم التالي) أمام حرم الوالي الأستاذة (سارة سيد محمد) في دردشة رمضانية على عجالة، لم تبخل بالإجابات بل جاءت ردودها في بساطة رغم الردود التحفظية المغلفة بدبلوماسية على بعض الأسئلة فإلى إفاداتها:
بطاقة تعريفية
سارة سيد محمد سيد أحمد من مواليد كرمة البلد محسية حرم والي ولاية الخرطوم حاليا عبد الرحيم محمد حسين خريجة كلية التربية جامعة الخرطوم، حاصلة على ماجستير مناهج بجامعة الخرطوم، عملت في قسم تعليم البنات بوزارة التربية والتعليم، وهي آخر محطة لي في العمل تركت بعدها العمل في العام 2012.
البعض يعتبر أن حياة المسؤولين غير عادية كيف رمضان في منزل عبد الرحيم محمد حسين وأسرته؟
حياتنا أكثر من عادية، أنا بدخل مطبخي وبعمل أكلي، وأكل للحرس في البيت وجيراننا يوم عادي ورمضانا عادي زي الناس العاديين.
المائدة الرمضانية والأكلات المفضلة للأسرة وللفريق عبد الرحيم؟
(القراصة بملاح الويكة الحمراء يوميا ما بتتغير 30 يوم رمضان الفول، سلطة الروب، البليلة والبلح)، وعبد الرحيم بحب الحلو مر عشان كدا أنا الآبري بعملوا براي ببداهو من الزريعة والخلطة بتاعتو، ما بعوسو لكن بشرف عليهو، والآبري حقي لا يُعلى عليه..
كيف التعامل مع الجيران والمعارف والأهل وانت زوجة مسؤول كان وزير دفاع والآن والي الخرطوم؟
أنا ذاتي ما اتغيرت نهائي، وأنا ما بحس إنو زوجة زول مسؤول أكتر من زوجة ضابط أنا ما بحس..
علاقة الفريق عبد الرحيم بالمطبخ هل بدخل بساعدك؟
(ضحكت)، ما فاضي وما بنلقاهو في البيت عشان يدخل المطبخ..
علاقة البنات بالمطبخ؟
بساعدني في المطبخ، عندي أربعة بنات وولدين، كلهم اتخرجوا من الجامعات واتزوجوا بنات وأولاد وموجودين معاي في البيت.
بتتسوقوا إنتي والفريق عبد الرحيم عادي في الأسواق والزيارات دون رسميات.
(ضحكت)، الفريق ما فاضي عشان يمشي معاي أي حتة، بمشي براي وأنا أصلا مشياتي للأسواق قليلة ما بطلع من البيت أمشي مشوار.
آخر مرة طلعتوا مع بعض انتي وسعادتو عبد الرحيم كان متين؟
ما بتذكر طلعنا سوا، وأنا ما بطلع لأي مناسبة اجتماعية لأني مريضة عندي (غضروف) مانعني الحركة، لكن عبد الرحيم بمشي لأي زول.
زوجك عبد الرحيم علاقتو شنو بالغناء بستمع لي منو أو بدندن بي شنو من الأغاني؟
(ضحكت)، هو فاضي عشان يسمع أغاني؟، ولا بدندن، ولو دندن بدندن بالقرآن، لو لقى وقت بقرأ القرآن، لكن ما فاضي عشان يسمع إذاعة ولا تلفزيون ولا يسمع الغناء.
علاقتو بالقنوات الفضائية والجرايد؟
بتابع القنوات الفضائية وبشاهد الأخبار وبقرا كل الجرايد السياسية، وهو بجيبها وأنا بقرا معاهو الجرايد.
أكثر برامج يتابعها ويحرص عليها عبد الرحيم محمد حسين؟
الأخبار بس، في كل القنوات
أكثر شيء بزهج ويغضب عبد الرحيم، سواء في البيت أو أشياء عامة من خلال العمل؟
شغله كله بزهج، لكن بتضايق لو زول صحاهو من نومو أو قطع ليهو قرايتو في القرآن.
تعليقك شنو على إنو المناصب التي يتقلدها عبد الرحيم محمد حسين هي لأهداف شخصية لمحبة الرئيس البشير له أكثر من أنه كفء لتقلد المنصب؟
أنا بقول البيان بالعمل، عبد الرحيم بثبت وجوده في أي موقع.
كيف كانت ردة فعل الفريق عبد الرحيم بعد أن تم إبعاده من القوات المسلحة إلى منصب والي الخرطوم؟
ما شعر إنو منصب والي الخرطوم فيهو إبعاد ليهو، بس هو كان عايز يكمل مشاريع بداها في وزارة الدفاع عشان كدا ما رضتو إنو يخلي وزارة الدفاع ما حباً في وزارة الدفاع ولا حباً في وظيفة ولا منصب، لكن قال أنا عندي مشاريع لو كملتها بكون أحسن للجيش السوداني، لكن لما شالوهوا من وزارة الدفاع قال أنا جندي في حكومة السودان محل ما يودوني أنا بسد الفرقة وما بقدر أقول لا.
يقال إن سر بقاء عبد الرحيم في التشكيل الجديد حتى بعد مغادرته كرسي وزير الدفاع وذهابه لمنصب والي الخرطوم علاقته بالرئيس ووالدة الرئيس الحاجة هدية؟
أبدا دا ما السبب، علاقتو بالرئيس ووالدته علاقة أخوة وصداقة، وعبد الرحيم ما قاعد في منصب عشان هو صديق الرئيس لكن قاعد في المنصب لأنه هو بثبت وجوده وعلاقته بعمله وكفاءته وأثبت كفاءته في أي موقع ختوهو فيهو ونجح عشان كدا بختوهو في المواقع المختلفة دي لكن ما عشان علاقته بالرئيس ولا والدة الرئيس.
ولاية الخرطوم الآن بتواجه تحديات كثيرة قطوعات في المياه الكهرباء، وتهكم في وسائط التواصل الاجتماعي الواتساب والفيس بوك والكاريكاتير.. كيف يتعامل عبد الرحيم مع هذه الأشياء؟
ما قاعد يشتغل بالمواضيع دي ولا بعاين ليها..
إنتو كأسرة ما بتأثر فيكم الحاجات دي؟ التندر والتهكم على زوجك عبد الرحيم وأولادك ما بزعلوا إنو يقال الكلام دا على والدهم؟
عارفنو كلام فاضي وأي زول في العمل العام معرض للكلام عشان كدا لا أنا ولا أولادي ولا عبد الرحيم بنشتغل بالكلام دا كتير نحن ما بنشتغل بالشائعات والكلام الفاضي، الناس البتطلع الشائعات في الواتساب والفيس بوك ما عندهم موضوع وعدم موضوعية شغالين بالفارغة أحسن ليهم يشتغلوا بي حاجة تنفعهم في دينهم ودنياهم وآخرتهم.
كيف كان شعوركم كأسرة والفريق عبد الرحيم لما طلعت المعلومات عن احتجاز طائرة الرئيس في رحلته إلى جنوب أفريقيا ومنعه من السفر بسبب موضوع المحكمة الجنائية الدولية؟
والله كلنا كنا زعلانين لأنو لو فات الرئيس كنا حنفقد السودان، لو الرئيس ما كان جاء كانت حتكون نهاية للسودان.
أنت كزوجة وزير دفاع سابق والآن والي الخرطوم، المناصب أدتكم شنو وأخذت منكم شنو؟
المناصب ما أدتنا أي حاجة وأخذت مننا كل شيء، أخذت مننا الراحة والاستقرار والبيت البكون الأب موجود فيهو في كل لحظة ويشارك أسرته في كل حاجة دا كله ما لقيناهو، أنا الستة سنوات الأولى من ثورة الإنقاذ، السنة الأولى كنت بشوفوا من الأسبوع للأسبوع ساعات بس، وبعدها خمس سنوات بنشوفوا لما يجي يبدل ملابسه، نحن كنا ساكنين في وادي سيدنا نشوفو يوم الجمعة ساعات..
علاقة أولادك بالسياسة شنو؟ منو البشبه عبد الرحيم فيهم سياسيا؟
ما عندهم أي علاقة بالسياسة كل زول مشغول بي عمله ما في زول مهموم بالسياسة زي أبوهم.
علاقة عبد الرحيم بكرة القدم ولأي فريق ينتمي؟
ما عندو علاقة بالكورة خالص، لكن بشجع الهلال رغم إنو ما بعرف عنه أي حاجة هلالابي ساي بالاسم.
بترطني إنتي والفريق عبد الرحيم؟
أيوا بنرطن من صغار نحن اتربينا في الشمالية.
اللغة البتتعاملوا بيها في البيت شنو العربي ولا الرطانة؟
أنا برطن وعبد الرحيم برطن، نحن اتعلمنا العربي في المدرسة أنا وعبد الرحيم، طوالي كلامنا في البيت رطانة، ما بنتكلم بالعربي خالص حتى الونسة بالرطانة، أولادنا بفهموا شوية لكن ما بتكلموا.
سر الرطانة شنو في الكلام في البيت؟
الرطانة بتساعدنا أحيانا لو ما عايزين زول ما يفهمنا أو حتى عايزين نقول حاجة أولادنا ما يفهموها بنرطن مع بعض، الأسرار كلها بنقولها أنا وعبد الرحيم بالرطانة.
علاقتك شنو بالذهب خاصة إنو ظهرت صور في مواقع التواصل إنو واحدة من بنات عبد الرحيم محمد حسين جابوا ليها ذهب بالمليارات وظهرت صور الذهب في المواقع والواتساب؟
بناتي ما قاعدين يحبوا الإكسسوارت ولا الذهب، الصور دي كلها مفبركة علينا نحن ما عندنا حاجات زي دي.
الصورة الظهرت في الواتساب دي ما بتك وبت عبد الرحيم؟
أبدا دي ما بتي..
كيف بتتعاملوا مع الأخبار والصور والكلام المتداول في وسائط التواصل الاجتماعي عن عبد الرحيم محمد حسين وأسرته وامتلاكهم ثروة.
بتصلنا وما قاعدين نهتم بيها بنفتكر أن أي زول في العمل العام مستهدف وممكن يقولوا فيهو أي كلام، إذا الرسول (صلى الله عليه وسلم) ما سلم من الكلام والأذى نحن ولا حاجة، ما بنتضايق لأنو عارفين دا كلام فارغ..
كيف بتعامل سعادة الفريق مع الكلام البجي في مواقع التواصل الاجتماعي ما بزعل أو يتضايق منو؟
ما بزعل ولا بشتغل بيهو لأنو عارف أي زول في العمل العام معرض للكلام.
كيف كان لقاءكم أول مرة إنتي وعبد الرحيم محمد حسين وتفاصيل زواجكم كيف كانت؟
عرسنا كان في الشمالية والطقوس كانت عادية هو قريبي قرابة من بعيد شوية..
زواج بناتك وأولادك بقولوا إنو كان فيهو نوع من الترف والبذخ؟
البقولوا الكلام دا كذابين نحن أعراس بناتنا كانت أكتر من عادية..
علاقة علياء بنت الفريق عبد الرحيم شنو بي مجموعة صيدليات علياء؟
صيدليات علياء حقت الجيش الناس قالوا إنها حقت عبد الرحيم وسماها بي اسم بتو، ولما اتزوجت بنتي سموها علياء عبد الرحيم محمد حسين وجابوا مرة لابسة دهب وفكوها في الواتساب وقالوا دي بت عبد الرحيم، أنا المرة الكبيرة ما برضى ألبس الدهب الظهر في الصور، وبتي اسمها عابدة وليس علياء، راقية ومهندسة ما بترضى تلبس دهب زي دا، دي شائعات ونحن ما شغالين بيها
اليوم التالي
