محمد الطيب الأمين: عندك طبنجة ما معناها أنا حرامي !!

سودافاكس- الخرطوم : * الصورة التي لخصت موكب (21) أكتوبر، أمس، كانت لمجموعة من الشباب تقدموا نحو (ترس الشرطة) بشارع القصر فقابلهم الضابط من خلف السياج .
* أحد الشباب قام بتلاوة مطالب الموكب ثم سلم المذكرة للضابط .
* الضابط تعامل بطريقة مميزة مع الشباب وتحدث معهم وهو في كامل الابتسام .
* هذا المنظر يثبت جداً أن التحوُّل الذي حدث بعد سقوط البشير كبير وكبير جداً.
* القانون هو القانون.
* ولكن نظام البشير كان ينفذ قانون لا علاقة له بالقانون.
* الشرطة التي كانت في خدمة الشعب لم تكن تعرف التعامل مع الشعب .
* العلاقة كانت عدائية تصل مرحلة الكراهية.
* كانت الشرطة تتعامل مع كل مواطن باعتباره (حرامي وقليل أدب).
* استمدوا صلاحياتهم من نظام فاسد لا يعرف القانون.
* ظلت الشرطة والأجهزة الأمنية وطوال عهد الإنقاذ تستخدم العنف والقوة بكل أشكالها دون رحمة أو ضمير.
* ولذلك محبة الشعب للجيش كانت أكبر وأعمق.
* نعم، الجيش مهامه تختلف عن مهام الشرطة وأجهزة الأمن ولكن هذا لا يبرر أن يكون رجل الشرطة عدائي.
* الآن جهاز الشرطة يتعافى ويعود لتطبيق القانون.
* القانون الذي يحرم إطلاق الرصاص ويمنع البمبان إلا في حالات نادرة تتعلق بالشغب.
* الموت الذي يستسهله رجال الأمن والشرطة زمنه قد ولى وراح.
* وأي روح سودانية غالية وغالية جداً.
* ولذلك من يقتل من غير وجه حق نحكم عليه بالإعدام.
* بالإعدام لو كان بتاع شرطة أو أمن أو مباحث أو خلاف ذلك.
* طالما في قانون يبقى ما من حقك تعذبني أو تضربني.
* اقبضني ونمشي القسم لو ثبتت عليَّ التهمة أكيد ح انجلد أو اتسجن لكن بالقانون.
* ده القانون بيقول كده.
* في شنو عشان تعذب ليك زول لحدي الموت؟
* عمل شنو يعني؟
* حرامي؟ طيب أوكي اقبضو ووديهو القسم ويتقدم لمحاكمة ويتحاكم ويتجلد ويتسجن بالقانون.
* ما عندك حق تعذب ليك زول سواءً أكان حرامي أو ما حرامي.
* ده القانون الذي يجب أن يكون.
* المتهم يركب عربة الشرطة بدون ضرب ويمشي القسم بدون ضرب.
* حتى الحرامي ما عندك حق تقتلو .
* أجهزة الأمن والمخابرات في العالم تطوَّرت ولم تعد تستخدم أساليب التعذيب المفرط حتى مع المعتقلين السياسيين.
* وأهم من ده كلو، كده نفرض إنك عذبت زول وضربتو ضرب عشوائي، أها داير تصل لشنو يعني؟
* ما هو ده ما قانون.
* طيب دايرنا نقول إنك راجل يعني؟
* الكترة بتغلب الشجاعة ودي ما رجالة ولا فلاحة.
* وربنا قاعد.
* والموت ما بعفيك عشان أنت لابس كاكي ولا عشان عندك طبنجة.
* قدام هناك بتقول لربنا شنو؟
* بتقول ليهو شنو عليك الله؟
* هسه زي القتلوا أستاذ أحمد الخير ديل بيقولوا لربنا شنو؟
* ح تقولوا ليهو : (نحن عذبناهو وكتلناهو عشان البشير يقعد)؟
* ولا بتقولوا ليهو كتلناهو عشان نحن ناس أمن وعندنا طبنجات؟
* موضوع الأمن ده هناك ما عندو قيمة عند الله.
* ده شغل دنيا لا قيمة له.
* طبنجتك دي ما بتقدر ترفعها لملك الموت.
* ولا بتخش بيها القبر عشان تهدد بيها (نكير).
* بطاقتك دي ما بتخش معاك (ود اللحد) عشان تطلعها (لمنكر) وتقول ليهو أنا أمن ولا شرطة.
* نحن أولاد بلد واحدة لشنو الكراهية والتعذيب؟
* الشرطة والأجهزة الأمنية الآن بدأت تتعافى وتعود لتطبق القانون.
* نقول هذا ونشدد على أهمية هيبة رجل القانون.
* مؤكد أننا نريد أن يحتفظ رجل القانون بهيبته ومكانته.
* الدولة ما بتمشي بدون قانون.
* وبعض الشباب الذين يتحرشون برجال الأمن والشرطة لا نشجعهم على ذلك.
* الهيبة مطلوبة، والهيبة هذه يفرضها رجل الأمن بالشخصية الحاسمة والعادلة وليس بالقتل والتعذيب.
* شخصيتك بتفرضها بالانضباط والقانون والعدل.
* تكون عندك كاريزما وتبعد من الحاجات البتقلل من هيبتك ومكانتك.
* خليك جادي لا تقبل الرشاوى ولا تسعى خلف البلاغات الكيدية.
* من مصلحتنا في السودان يكون عندنا رجل شرطة مشرِّف وعزيز علينا.
* رجل شرطة نفتخر به لا نسخر منه ولا نخاف منه.
* هيبتنا من هيبتكم وكلنا مع بعض ح نبني السودان الجديد .
* ونركب صافنات ونجيبه (سودانية) وأصلو الزول بيموت والذكرى تفضل حية ..
* و..و..
* وحنبنيهو.

باج نيوز