جهاد حسين : معمر موسى “تمو بيه شغل”
كتب الاعلامي والناشط جهاد حسين الهندي ، رداً على حادثة اعتقال الناشط الاسلامي معمر موسى الذي اعتقل بالخرطوم اليوم عقب خروجه في مظاهرات تندد بالحكومة وتطالب باسقاطها مستخدمين شعارات ” بالصوت بالصورة حمدوك طلع ماسورة ” وشعار ” الجيش جيشنا ونحن اهله بنستاهله “.
وقال جهاد حسين :
حرية التعبير دا حائط الصد بتاع الناس كلهم ودائما بنقول لي معمر اعمل الانت عايزو ولما تكون غلطان بنغلطك بس ما بنزايد عليك ما مضى الكلام فترة طويلة معمر اتحالف مع افراد النظام القديم القالو فيهو مالم يقله مالك في الخمر قبل كدا واعتقلو وشوهو صورتو في الجامعات، معمر مافي زول قبل الحادثة دي بعتبر اتهامو بانو ينتمي للنظام القديم حاجة جادة إلا بعد العملو دا.
نقطة اخيرة مافي مقارنة بين معمر والشواني لانو الاخير دا ما بقدر زول يقول ليهو ارح نهتف ونرفع صور رموز النظام السابق ونقوض المرحلة الانتقالية لصالحنا بي شعارات هم لو ما الثورة ما كانو بعرفو ليها حاجة.
معمر وهو طالع من التحقيق او المعتقل الاستقبلوهو معظمم كواد التنظيم الطلابي للوطني وبالفيديو على راسهم همام علي مصطفى عضو الامانة السياسية لطلاب الوطني وكوادر عنف اخرى بنعرفا كويس، كل الحصل انو معمر تمو بيهو شغل وهو الزول الشايف كل الناس تمو بيهم شغل.
الحصل دا هو الفرق الجوهري بين معمر الناقد لقوى الحرية والتغيير والداعي لمواقف نقدية بتخصو وبين معمر اللي طلعو على ضهرو ناس النظام السابق وحملوهو أجندتم وبرنامجم حتى ضاع وانتهى ودي حاجة مؤسفة جدا وديل كلهم لو رجعو معمر اول زول ببلوهو.
