يا مورودة – نضال حسن الحاج

يا مورودة
نضال حسن الحاج
********
هيا مورودة
مالك والبرِد صباحي نارك في العضام موقودة
والقُدرة القبيل شايلاكي كيفن
قبَّلت مهدودة
والأدَّا الشرف بنوتو لي شن
صبحك موؤودة
والناس مالا هسع جايطة ما دام
تمت المعدودة
والضل مالو صدَّ وفرَّ وانتِ مشلوِطة ومغرودة
ما تنجمي يا مورودة والشم ما بتوفي عهودا
الكلية التصفي الجمرة كيف
ما تنقلب مهرودة
والليل والصهيل والقمرة ديل جت
حولقن لي عودة
والخلق الممحَّنة راجية من قلبك تلم
واقوده يا مورودة
يا ملكة خزينة الفرحة مردومة السنابل الجافة
وحارياك البيوت مبروكة ما بتتلقى
خيرك كافة
الحمى البتهري الجتَّة منك
شايلة نارا ولافة
والبحر المسجَّم وجعه راجيك
والقدم في الحافة
يا مورودة.
حولين والمطر ما سال
خريفين والجداول فاضية
والطين انقلب صلصال
حولين والبلاد مشتهية مَدَّة
إيده لي تربال
وعارفين من وقوع أبريَّا
ما شاف القمر شبال
هي حولين إلا من قبال
عرفناك في المحق بتمدي
حارينك وكت ننذل تمسحي روح
شقانا وتدِّي
عارفنك تهدِّي الدنيا لكن
مستحيل تنهدِّي
والدرب البنسلكو ليكي غيرك
لي صَليح ما بودي
يا مورودة
تاريك والدموع تريانة بتلاقي
المصايب باشة
تاريك ماكلة نارك
وحايمة لا عندك كبير
لا باشا
تاريك ديمة تدي الشكرة ضلك
ومن وجايعك كاشة
يا النجمة المحل لاقيتا فرَّت
من عيونك طاشة
يا مورودة
لامتين يعني كلْما الدنيا تتكفت تكوني
خدودا
كيفن والظروف جبارة شايلة قصاد
وشيها ملودة
والخوف البصاقر الجتة بتخافو الهوايد ودودا
مالك فاردة ليهو وشيكي لا سيف لا درع لا خودة
يا مورودة
******