وئام كمال الدين – تاني ما تطول غيابك

وئام كمال الدين
تاني ما تطول غيابك

تاني ما تطول غيابك
يا جميل عذبنا بعدك
ونحنا ما بنحمل عذابك

إنت ما عارف فراقك
هو البيزود في عذابنا
ولا ما عارف الغلاوة
المنها بيكتر عتابنا
الغريب الشوق يجنن
قال يواسينا ف مصابنا
كل ما زول دق بابنا
نفرح ونقول الله جابك

الحنين الفينا ولع
ما بيطفيهو انتظار
زاد منانا نشوف ونسمع
الفراقو علينا نار
و أصلو لا منك بنقنع
لا بنستجدي اعتذار
نحن كل منانا ترجع
وبي محنة نقول حبابك

مرة قبل تفوت ديارنا
قلت نحن الفي قليبك
ريدنا سادي الباب عليهو
وغيرنا ما بصبح حبيبك
نحن لسه علي وعودنا
وفي رجا الأشواق تجيبك
لا عيون حساد تصيبك
لا تطول في اغترابك

الغرام شايلنو ظاهر
في ابتساماتنا وعيونا
و انفعالات المشاعر
شوقنا إحساسنا و شجوننا
والسؤال الديمة داير
والبيساور في ظنوننا
ياخي كيف حالك بدوننا
ولسه سادي علينا بابك

تاني ما تطول غيابك
يا حنين عذبنا بعدك
ونحنا ما بنحمل عذابك