بابكر سلك : فوائد كورونا

في السلك … بابكر سلك

فوائد كورونا
*جائحة كورونا برغم قساوتها علي البشرية
*الا أنها قدمت للبشرية دروسا قيمة
*بالذات للبشرية السودانية
*علمتنا حبست الجائحة ان القرش الابيض ينفع لليوم الاسود
*ونحن شعب ينفق علي الفارغة والمقدودة اكتر ممايصرف علي المهم
*نحنا لاعندنا فقه اولويات عند قرار الشراء
*ولانتخذ خطوات الشراء التي يعرفها علماء الاقتصاد
*ياخ بتلقي ناس بيتهم داير يقع في رسينهم من عدم الصيانة وعدم القروش

*ملاياتهم فقدت ألوانها
*عناقريبهم متكلة بالطوب
*باب شارعهم تجي تفتحو يقفل
*زي باب بار الخواجات
*تجرو يفتح تلزو يفتح
*والفقر ماعيب
*كعب العدم
*لكن ماعيب
*العيب لما تلقي بيت زي ده
*وتكلفة الموبايلات الجواهو تبني البيت لودبيرنق وتسقفو صبة
*يحدث ذلك لان فقه الاولويات عندنا جايط
*البت ابوها تعبان

*ممكن تصر علي لبسة كلفتها تجيب ليها اربعة لبسات
*ياخ الاقتصاديون يقولون ان قرار الشراء يمر بمراحل معينة
*الحوجة للسلعة او الخدمة وضرورتها
*امكانية الحصول عليها باخف تأثير علي الميزانية
*حسن ادارة الاستهلاك واستعمال الخدمة
*نحنا الواحد فينا يكون محتاج سكر
*يقرر تلبية للحاجة شراء كيلو سكر
*يمشي البقالة
*ادينا كيلو سكر
*بتاع الدكان يمشي يوزن السكر
*صاحبنا يتجول ببصره علي الارفف
*العلب الصفراء ديك شنو؟
*بتاع الدكان دون ان يلتفت
*ده سمن نباتي
*اديني علبة عليك الله
*والقزاز الاخدر ده شنو؟
*ده زيت زيتون
*جيب معاك اتنين بالله
*والبسكويت ده بالكريمة؟
*بتاع الدكان
*آي ده بالكريمة والجمبو ده بجوز الهند
*اديني واحد من ده وواحد من ده
*المهم صاحبنا اتخذ عدة قرارات شراء دون دراسة كلفته مليون وخمسين
*واساسا كان جاي يشيل كيلو سكر بتسعين الف(بالقديم)
*فضل ليهو في جيبو عشرين جنية وبكرة ماشي الخرطوم
*مواصلات مايتركبو
*لكن كورونا علمتنا
*زي صاحبنا ده تاني ماببعزق القروش
*لو داير سكر حايشيل نص كيلو ويحتفظ بالقريشات لحظر جديد
*رمي طوبة المثل القائل
*انفق مابالجيب يأتيك مابالغيب
*وغيره بالمثل الجديد
*احفظ مابالجيب يمكن يجيك حجر يا حبيب
*وعلمتنا كورونا ان البكيات ممكن تتم دون رمتله وركلسة وخسائر لاهل الفقيد وميته و عادات غتيتة
*وعلمتنا كورونا انو الاعراس ممكن تتم باقل عدد من الناس واقل كاش
*وعلمتنا كورونا انو الادخار ثقافة نفتقدها نحن
*وعلمتنا كورونا اننا شعب لانتعامل مع الاشياء بحجمها
*فالسوق الشعبي ام درمان لاتجد فيه الكورونا شبرا لتتجول فيه
*وعلمتنا كورونا اننا عايشين بلطف الله بس دون ادني توكل عليه
*بل نتواكل
*واعلمتنا كورونا ان العهد البائد لو قعد شهرين تاني
*مستشفياتنا كان بقت مراكز لاستخراج شهادات الوفاة
*وان الفساد الذي طال المنشئات الطبية هو اعفن انواع الفساد في عهد الفساد
*وعلمتنا كورونا اصدار قانون يحمي الكوادر الطبية ويبطش بمن يعتدي عليها
*ولكنها لم تعلمنا اصدار قانون يحمي الكوادر المريضة ومرافقيها من تعدي الكوادر الطبية اللفظي والناتج عن الاهمال والبرود والشرود والاستفزاز
*فبعض الكوادر الطبية تحتاج لكورسات في فن التعامل مع المرضي والمرافقين
*وعلمتنا كورونا ان البيوت جميلة خلاس
*وان الكثير من الاعطال المنزلية يمكن اصلاحها ببساطة
*وعلمتنا كورونا ان لبيوتنا علينا حق
*وان اسرنا رائعة
*وان اطفالنا يشتاقون الينا
*النصف المليان من كوب كورونا هو ماعلمتنا له كورونا
*فلا تنظروا للنصف الفارغ من كوز كورونا
*شكرا كورونا
*شكرا دكتور اكرم
*شكرا حمدوك
*المهم
*الفرحة لاتسعني وانا اشاهد حملة جمع التوقيعات لاسقاط مجلس المريخ
*فرحتي لان شعب المريخ يمارس في عمل قانوني وحق ديمقراطي
*ويعني ذلك ان المريخ نادي كبير
*اقتنع شعبه بسيادة القانون ولذة الديمقراطية
*ورموا طوبة المفوضية والوزير والتعيين والتدخلات الفوقية
*انه شعب آمن بقدرته علي النهوض بوطنه المريخ
*وبمقدرته علي ادارة شؤونه
*واحزن
*احزن اشد الحزن
*حينما اري شعب المريخ لسسة بفتش عن رأسمالي يقود المريخ
*يعني لسسسة نحنا بعيدين عن وصف النادي الكبير
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*الروووووووب
سلك كهربا
ننساك كيف و الكلب احتار
والي لقاء
سلك

المصدر: الانتباهة أون لاين