بابكر سلك : لو في السليم بحتار سليم
في السلك
بابكر سلك
لو في السليم بحتار سليم
*انتهينا من شبكة دونو كوكو
*فينا من فرح
*وفينا من قال اخخخخخ
*وقبل مايجف مداد السداد
*ظهرت مشكلة داسيلفا
*من نفس الزول
*سليم التونسي الجزائري
*البرازيلي يطالب بحقوق له امام الفيفا عن طريق سليم
*وسليم يعلم اننا لسنا في السليم
*مجرد جنينة تفتقد للبواب
*ودائما مخالصات لاعبينا تشوبها عيوب إجرائية تكلف النادي الكثير
*زي كواسي وزي كوكو
*ما اتعلمنا من التجارب السابقة لان الفهم عندنا دوما هو كومي وكومك
*ناتي بالمبررات لكومنا عندما يخطئ
*ونرمي الكيمان الاخري بما ليس فيها حتي لو اجادت نبخس تلك الاجادة ونصف اجادتها بالخطأ الفاحش
*الحب والميل القلبي يملكه الله ونحترم ذلك
*ما باليد حيلة
*لكن نفترض في الحب ان يكون للكيان
*وان كان لك شيخ
*فأجعل محبتك مثل محبة اهلنا الصوفيه
*يحبون مشائخهم حبا جما
*وكي لايجرفهم ذلك الحب عن الحق المعبود
*الواحد فيهم يقول ليك بحب شيخي في الله
*يبقي حقو نحن شيوخنا في المريخ
*عشان ماتلهينا تلك المحبة والهوي الجامح عن ذكر الكيان
*ايها الناس
*جيبني نايب رئيس
*دي عبارة زول جاري خلف صالح الكيان ولا عبارة زول يلهث خلف مصالحه الخاصة!!!!!!!!
*من يسعي لحل اشكالية الكيان لايسعي خلف مناصب اطلاقا
*زي ديل الفيهم ما اتعرفت لانها معروفه من بدري
*المهم
*متي يدار المريخ بل كل انديتنا بالاحترافيه اللازمة التي تحافظ علي الحقوق؟؟؟؟
*بالتأكيد لما نتخلي من قصة زولي وزولك وكومي وكومك وبوكلني وبوكلنك
*لذا علينا بالصبر الي ان نجعل محبتنا للمريخ او في اسوا الفروض محبة في المريخ
*ايها الناس
*الانقسامات والكيمان جعلت الجمهور في شتات
*وبعضنا يحتار يبحث عن بوصلة العودة لمريخ واحد
*ولكنه يتوه بين اصحاب الاجندة في كل الكيمان
*ولانملك الا ان نسأل الله ان يؤلف بين القلوب من جديد ويبذر فيها حب في المريخ
*اخاف ان يسألني احدكم
*قلت لي داير الكوبري من جدة لي وين؟؟؟
*شخصيا بستغرب من زول يحتاج لشيخ يتوسط له لحب الزعيم
*المهم
*دعوة علي اسد للأخ قدالة قائمة طبعا حتي غصبا عن علي اسد زاتو
*فان كان للاخ قدالة مايقدمه للمريخ
*فابواب الكيان وقلبه يفردون اجنحتهم له بالاحضان
*وان لم يكن له مايقدمه لمريخه
*فمريخيته تؤهله للترحاب به وقتما شرف
*ايها الناس
*تعازينا للكابتن نميري احمد سعيد في وفاة والده
*وتعازينا للحبيب ايمن عدار في رحيل والده
*جعلهما الله في جنات النعيم
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*الحياة صعبت علينا
*والغلاء حير جيوبنا
*وبقليل من الرقابة الميدانية
*بتنزل اسعار اكلنا وشرابنا ودوانا وحبوبنا
سلك كهربا
ننساك كيف والكلب قال حرية سلام وعدالة برضو بتنضف الخور وتخلي الكرور قبلو علي جانبي الخور!!!!!!
والي لقاء
سلك
المصدر: الانتباهة أون لاين
