محمد عبد الماجد : جهزتوا اي شيء باقى ليكم (موية رمضان) بس

اربعة مريخاب قاعدين (يرجفوا) ليهم في (ركن)…واحد فيهم قال ليهم والله السنة القادمة لو جبتوا ليكم (120) لجنة استئنافات ما بتمرقوا من الهلال.
الموضوع دا كبر شديد.
الهلال في الموسم الجديد (نار) عديل كدا.
الهلالاب القرعة (بسمت) ليهم.
قالوا ليك في واحد كان بغني في (الزهور بسمت لينا) – هلالابي ثبتو ليك ناصية وقال ليه زهور شنو؟…قول (القرعة بسمت لينا).
الهلالاب السنة دي شغالين بالورقة والقلم ود البدري سمين.
المريخاب بحكوا فيما بينهم كدا.
واحد فيهم قال :
ديل جابوا ليهم مدرب فرنسي ..المباراة لو انتهت 5 / صفر لصالح فريقه بيعتبرها تعادل.
قالوا ليك (كافالي) وقع العقد مع الكاردينال فيه شرط جزائي بيقول ان المباراة التى يفوز فيها الهلال اقل من خمسة ما فيها (حافز) للاعبين.
ولا يعتبر فيها الهلال فائز.
اقل من خمسة اديناكم ليها يا ناس لجنة الاستئنافات.
حلال عليكم.
المريخاب التلاتة طيروا عيونهم متل (جوز الحمام) وقت يكون في حلة ضيقة.
ما عرفوا يعملوا شنو؟.
يتصرفوا كيف في (البرد) دا.
واحد فيهم قام نافش ريشو متل (16) في جدول اتنين – قال ليهم احسن حاجة تجيبوا لينا (سمير فضل) دا حارس مرمي…رئيس لجنة استئنافات ما بمرقنا مع ناس اعلام الهلال دا.
اسامة عطا المنان بدل البعمل فيه دا احسن يلعب رأس حربة صريح …يلعب هو بكري المدينة.
اسامة عطا المنان احسن لينا (عنكبة).
الحاجات البعمل فيها في المكاتب خلوه يعملها لينا جوة الملعب.
نحن فترنا من (المراوح) الشغالة.
المراوح الشغالة هسع الجابها شنو؟.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
المريخاب الاربعة دخل عليهم مريخابي خامس شايل ليه (دومة) بيكد فيها.
الدومة دليل القرفة.
زول قرفان يعني.
والدنيا دي مسخت ليه.
المريخابي الخامس ..قال ليهم انتوا عارفين ناس الهلال حسموا موضوع المدرب ووقعوا عقدهم ..ومحي الدين عبدالتام لسه بيفاضل بين الخيارات.
تقول عاوز يفتح ليهم مطعم.
هو الزول دا عاوز يجيب ليه مدير فني وإلّا عاوز يفتح ليه مطعم.
زي العندو مشكلة في (البصل).
واحد من الشفوت البعرفهم براي …قال المريخ بعد جمال الوالي ح يعاني في (الاطراف).
زول شفت تاني قال ليهم (اطراف) شنو؟…يمين المريخ بعد جمال الوالي في (البصل) يعاني.
قالوا ليك محي الدين عبدالتام شايل تلفوناته وبيضرب من تلفونات ثابتة مع وكلاء اللاعبين..عاوز ليه مدرب جديد.
طريقتك دي يا عبدالتام (محسن سيد) ما بتجيبو ليك.
الفلس كعب.
بعمل اكتر من كدا.
واحد من المريخاب ..قال يا جماعة نحن ما عندنا حل غير ننسف الموسم زي الموسم الفات.
الحل (الوك).
الوك دا جابو اسامة عطا المنان مخصوص عشان ينسف الموسم.
وعشان ما في وزول يسألو في الحسابات.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
مريخابي عندو صلعة ولابس ليه نضارة …قعد يرجف براهو.
رجفتو ما رجفة سقط.
كمان نحن رجفة السقط ما بنعرفها.
رجفة خوف عديل كدا.
المريخابي عمل ليه فاصل بتاع (رجفة)..وكب ليك الجرسة في ركن (ناصية) – قال ليهم والله الهلال السنة دي جاب ليه لاعب اسمو (ولاءالدين)..حارس المرمي يوزعو ليك كوم …كوم.
غايتو جمال سالم بي (فلهمتو) دي احسن يشوف ليه عصارة زيت.
ولاءالدين لا بعرف ليك جمال سالم لا بعرف ليك سالم جمال.
كلهم عندو اكرم الهادي سليم.
المريخابي بتاع الدومة قال ليهم لو بقت على ولاءالدين براهو هينة ..ديل عندهم محترف اسمو شيخ موكورو ..بنزل ليك الكشافات الاربعة في حركة واحدة.
وبفتح بي غادي.
ما بتفهم منو اي شيء.
واحد من المريخاب قال ليهم يا جماعة مالكم عاوزين تقوّمو على (المصران).
مالكم علي؟.
والله نحن الحاجات دي بقينا ولا بنستحملها.
ولا عندنا ليها اعصاب.
عليكم الله ما تشفقونا ساكت.
فيهم واحد كان ساكت ما قال اي شيء ..فجأة اتنفض ..وقال ليهم انتوا لو شفتوا (عطرون) تقولوا شنو؟.
عطرون دا علي جعفر بالنسبة ليه (بيكيه).
يا زول عطرون شنو؟.
الزول دا الكورنر عادي جدا يسجل منو (هدف عكسي).
عليكم الله لو ما ساي – هسع (عطرون) دا ضابط معسكر بجيبو المريخ.
بعدين الموسم الجديد ما فيه ضربات جزاء.
ولا فيه حالات طرد.
ولا فيه طلعوا لينا الشرطة.
الحاجات دي كلها كانت زمان – زمن جمال الوالي.
ضربات جزاء مع اسامة ونسي ما تحلموا بيها.
ولا تعشموا.
ما عندكم تاني اي طريقة.
لا طلب فحص.
ولا اعادة مباراة.
الحاجات دي فاتت – ما تحلموا بيها.
المريخابي ابو دومة – تاني قام وهاج ليك ..وقال والله يا جماعة انا ما خايف من ولاءالدين.
ولا خايف من ابوعاقلة.
ولا موكورو.
ولا خايف من عودة هيثم مصطفى.
الحاجات دي كلها انا ما خايف منها.
المريخاب الاربعة قالوا ليه طمنتنا في (البرد) دا والله يا ود الناس؟..طيب انت خايف من شنو وقت ما خايف من ديل كلهم.
المريخابي ابو دومة قال ليهم خايف من (الطابق الرابع).
الهلالاب ديل لو عملوا ليهم طابق رابع – الرئاسة ذاتها ممكن يحولها استاد الهلال.
ديل بي طابق واحد ..ما قعدونا في البلد.
وقت يعملوا ليهم اربعة طوابق ..يعملوا شنو؟.
يمين الهلالاب ديل لو ظهر ليهم (الطابق الرابع) – تاني شارع (العرضة) ساكت ما بتجوا فايتين فيه.
عرضة شنو؟.
يمين لو عندكم تمرين في استاد المريخ مع استاد الهلال ابو اربعة طوابق دا ..إلّا تتمرنوا بالدس.
وين تاني تقدروا تولعوا ليكم (كشافات) في استادكم مع كشافات استاد الهلال الجديدة.
الغريبة ..بعد الطوابق الاربعة دي – ناس الهلال جهزوا اي حاجة.
تسجيلاتهم ما فيها اي مشكلة.
النائب العام اصدر قرار ازالة للدكاكين.
الجهاز الفني اكتمل بي هيثم مصطفى.
اي حاجة انتهوا منها.
معسكرهم ذاتو اتحدد.
السفر قالوا ليك يوم الجمعة.
والعودة اتحددت.
ديل الفريق الرديف ..عينوا ليه مدربه.
يعني تاني ما عندهم اي مشكلة.
الهلالاب مع (المولد) دا – ما فاضل ليهم شيء غير (موية رمضان).
عملوا اي حاجة – وناس المريخ الى الآن بفتشوا في المدرب.
مرة يقولوا ليك فاروق جبرة.
ومرة لوك.
ومرة حسام البدري.
دا شنو البتعملوا فيه دا؟.
انتوا الموسم الجديد دا ح تشاركوا في (الدورة المدرسية).
شغلكم دا …في الممتاز ما بقعدكم.
بعدين تاني حركات لجنة الاستئنافات دي ما بتمشي ليها على زول.
شوفوا ليكم (حيلة) جديدة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………

و

الهلال الزي الجديد ومعدات الموسم برضو استلمها.
ما في حاجة ناقصة.
باقى موية رمضان بس.
ما عندنا اي مشكلة.
المريخ ما عندو قروش بقى يعسكر في القاهرة مع الاهلي شندي.
الموسم القادم ح يعسكر في اسمرا مع ناس الاهلي الخرطوم.
القاهرة ذاتها ما بتلقوها.
………….
السيدة (ل) – ما تسمعي الكلام دا ما في (شوق) بقتل ليه زول – إلّا (شوق) مسمم.
وقرّط على كدا.

المصدر: صحيفة الرأي العام