تجربتي الخاصة مع بنك الخرطوم

صفحة تجربتي على الفيسبوك ، تهتم بنشر تجارب العملاء مع مقدمي الخدمات في السودان

بداية ، خلينا كلنا نتفق انو بنك الخرطوم البنك صاحب اكبر قاعدة بتاعت مستخدمين.

طيب ، السرعة في تلقي الخدمات عبر الفروع طبعاً تجربة سيئة جداً بالنسبة لي لانو مشيت بدري ولقيت صف وورقة والناس تسجل اسماءها قبل اصلاً الفرع يفتح والناس تقعد نتنظر بره ( ناس كبار وسيدات ) حيلهم ما شايلهم زاتو ..

وبالنسبة لمرونة الإجراءات الصراحة عقيمة جداً ، إبتداً من الحركة الغياظة بتاعت انهم يقولو ليك “لازم تمشي الفرع الفتحت فيهو الحساب” وانتهاءاً بي انو في الكول سنتر ما بنقدر نفيدك الا تراجع الفرع وفيما بينهما حاجات كتيرة ومنها طبعاً لما تمشي الفرع يقولو ليك لا لا لازم تتصل بينا في الكول سنتر.

طيب بالنسبة للتطبيق : تجربة سيئة لانو انا بهمني الإستقرارية بتاعت الخدمة اكتر من اي شئ تاني ، يعني تنوع الخدمات مثلاً ما مهم بالنسبة لي بقدر ما انو انا لما اقعد واكل لي في مطعم لما اجي طالع الاقي التطبيق واقف وما اقدر ادفع للكاشير واقعد انتظر وابقى رهينة “لحين التطبيق يتكرم ويشتغل” .

سرعة تنفيذ العمليات دي ما اعتقد في زول بعارضني فيها ، انو الحاجات بتأخذ وقت خرافي ، انا شخصياً استلمت البطاقة البنكية بعد 3 شهور ، ولما زهجت منها وبقيت مستخدم بطاقة “المحفظة الالكترونية” وكمان عندك حاجة تانية اللي هي الكول سنتر يعني ع الأقل بنتنظر 10 دقائق وما مسموح لي موظفين الكول سنتر انهم يخدموك مرتين خلال اليوم فيما يتعلق بتطبيق بنكك وفوق ليها بقولو ليك رسلنا ليك رسالة والرسالة مدتها 60 دقيقة وهي ما بتصل خلال الستين دقيقة دي زاتها ، في كل التطبيقات بتكون الرسالة مدتها “دقيقتين كحد اقصى” ، قصدي التطبيقات المحلية ، خليك من التطبيقات العالمية البتجيك الرسالة قبل ما تطلب زاتو

— من هنا بقول ليهم انو اذا في مشكلة في الProvieder في حاجة اسمها Twillo ممكن يشيلو منهم باقات بتاعت رسائل وبتصل بسرعة خرافية او ممكن تشوفو Mazin Host Sudan .

بالنسبة لي تنوع الخدمات البنكية فالبنك عندو عدد كبير من الخدمات الممكن تفيد معظم شرائح المجتمع .

بالنسبة للودائع الإستثمارية انا تجربتي ما كانت ظابطة ، جربتها بي مبالغ بسيطة كذا مرة وكانت بتخسر معاي مع التضخم الحاصل بلاقي نفسي انو قروشي بدلاً عن تكسب خسررت

دي كانت تجربتي مع بنك الخرطوم

يلا انتو كمان احكو لينا تجاربكم الشخصية