عبدالإله صديق : هرمونات ذكورية
سودافاكس ـ الذين زعلو عندما كتبت عن فاشل (سكة ضياع) بوريك أن السوداني عاطفي و (بسيط) ومتواضع في فهم التشابكات الفنية في الاعمال الدرامية لذلك يمكن أن يُساق جماعياً نحو الدهشة لمجرد وجود فتاة حسناء في العمل الدرامي لانه تحركه الغرائز (والهرمونات الذكورية) ماخلق خلل جماعي في التوازن العاطفي فأثر سلباً في (حكمة التقييم وعقلانية الاختيار) ماعلينا سنعود لحقاً لسلخ جِلد (سكة.. ضياع زمن) بمزااج.. هذا الخلل الهرموني وعدم التوازن أمام المراة تجلى بواحاً أمام (المقبورة فنياً) داليا البحيري فقد رأينا الكم الهائل من الحضور (الذكوري) والذي مارس كل أنواع الإنبطاح والإنطراح والإنكشاح بهدف التداني والتقرب زُلفى لمراة خمسينية على أعتاب إعتزال الرجال نهائياً فهي تلعب في الزمن بدل الضائع زي ناس ندى القلعة وإنصاف مدني وأخريات متمسكات بتلابيب الحياة والميكب الأوفر رغم عامل السن يعني بالواضح وبين قوسين وآخر كلام داليا (قطعت رسمي وشعبي ) كده بتهجصو وبتروقوا ؟؟؟..
نحن كشعب طبعاً بننخلع بعواره شديده للقادم من الخارج حتى لو كان الخارجي ده خارج (الشبكة) وده يعني عُقدة (بره) مسيطرة شديد والغريب في الأمر عند خروج ساستنا ومبدعينا يتعامل الخارج معاهم زي تعاملو مع (الخُراجه) وهي (المِد المتعفن تحت الجلد) بقرف وإشمئزاز وتعالي.. داليا البحيري وصلت الخرطوم وتفاجات أنها في (المنامه) بسبب رُاقد الناس الذي فاق رُقاد (تِرك لحميدتي) هذه الايام يعني رُقاد بي مراتبو ورُتبو ومُرَتبو … ياخي قالو ( داليا ) إتحننت من غير محلبيه بي سبب الرجال الكترو المحلبيه في الرُقاد.. غايتو إنتو كان جاتكم (ياسمين صبري) صبركم بيخف وقلبكم بخف ( وشنبر) مكنتكم ذاتو بخف.. ياخي نحن شعب الله الخفيف ولفيف زول زي الكيس النافخو هواء وشايلو.. بمناسبة النفخة ترباس ده (نفختو) ماكضابه عشان مانغلط فيهو.. الصراحة الراجل في السودان (إسم وجسم) يعني نفختو دي نفخة ماسسه من الطفوله (عاافيه ورضاعه كافيه) لانو زول بيحترم العضة وانتو عارفين ترباس ده أقل جوعه ببكي ليكم لانو مناطق الشده مابتقسم معاهو عشان كده طووالي مجخنن وراقد في النقعة البارده جنب صاحبو (كردنه) محل الرطوبه ومفتاح الخزنه تحت الطوبه.. كردنه طبعاً أمس خلع الطاقية وخلع معاها الوقار ولفه عمة البوبار وجماعتو دقو الطار ..
حلف واحد قال شاف أول أمس بيت البكاء مفتوح في مطار الخرطوم الما دولي والبكاء هناك بي (خججي ونففي) والوحوحه فوق وخمة النفس ماتديك الدرب عاد خمة نفس الرجال ما كعبه وترباس قالو كان خامي نفسو وخامي كرشو وعبايتو وعمتو واحد قال لي الظاهر تربسه ده بي خمخمتو دي ماخمه الرماد قبل رمضان عايز يخمو هسي
ردم حيّ
عبدالإله صديق
