«عملوا كمين مخصوص».. مصري يشكر مرور السعودية بعد إعادة متعلقاته
أشاد شاب مصري بدور المرور السعودي، في إعادة متعلقاته الشخصية التي فقدها خلال أحد تنقلاته.
كتب الشاب، الذي يُدعى محمد شعبان، عبر حسابه الشخصي بـ«فيسبوك»: «أنا في الرياض بقالي كام يوم.. قلت أروح أعمل عمرة صد رد.. المهم روحت والحمد الله تمت على خير.. وأنا راجع في الأتوبيس وقبل الرياض بـ٤ ساعات مثلًا نزلنا ريست».
أضاف: «كلت وصليت وراجع الاتوبيس ملقتهوش.. مشي ونسيني وعاوز أقولك بقي إن كل حاجة كانت في الاتوبيس.. فلوسي والباسبور والشنط واللابتوب وكل حاجة، وأنا لواحدي في وسط الصحرا حرفيًا في بلد معرفهاش.. السواق مش بيرد والشركة بكلمهم مش بيردوا».
أردف «شعبان»: «يشاء القدر يطلعلي سواق تريلا من تحت الارض يمني، يقولي: (شكل الأتوبيس سابك.. اركب نلحقه).. ركبت التريلا وجرينا وراه .. وبحاول كل ده أكلم الشركة والمشرف محدش بيرد.. سواق التريلا قالي: (عندي حل .. كلم أمن الطرق).. حاجة زي المرور عندنا كده.. فعلًا كلمتهم وحد رد عليا وحكيتله اللي حصل.. وقالي فعلًا باين عندي مكانك في الـGPS ومتقلقش إحنا هنتصرف».
استطرد: «بعدها بدقيقة حد تاني اتصل بيا بيأكد البلاغ وبيسألني أي معلومات عن الأتوبيس.. قولت له لونه وإني تايه وكل حاجتي مش معايا.. قال لي أبشر وقفل.. كل ده وأنا في التريلا بنجري ورا الأتوبيس نلحقه».
بعد دقيقتين، عاود «أمن الطرق» الاتصال بـ«شعبان»: «قالوا: (أستاذ محمد إحنا وقفنا الأتوبيس في نقطة التفتيش قبل مدخل الرياض ومستنيك بالسلامة).. روحت لقيت الأتوبيس راكن على جنب مستنيني بعد ما وصلت».
بالفعل وصل «شعبان» إلى موقع الأتوبيس، وهناك أخبره ضابط: «تحب نعمل شكوى في السواق أو الشركة علشان الضرر اللي وقع عليك؟»، حتى رد عليه الشاب: «الموضوع مش مستاهل إن السواق يتأذي وشكرًا علي تعبكم».
المصري لايت
