العيكورة يكتب : قعر الحلة!
سودافاكس ـ يقول الراوي …. إن اجتماعا (لاولاد عمنا) قحت المركزي بدار حزب الامة . تلوح فيه بخيارات بديلة ودعت مكتبها التنفيذي لاجتماع عاجل !
و فى بعض الروايات انهم قالوا طالما ان الفلول هم من يفرملون الاتفاق الاطاري فسيلجأون لخيارات بديلة … اظن ان القحاطة والدعامة … بهذه الصرخة وصلوا (قعر الحلة) و نقصد بها حلة الملاح المعلومة لاي بيت سوداني تعال اقول ليك حكاية (قعر الحلة)
(فااا) …. على ايامنا ونحن صغار كان ممكن (تحرد) الغداء او الفطور لسبب تافه و لكنك كنت تراه عظيما .
و نظرا لهذا التمرد (فعادتن) الاسرة تتجاوز هذا الدلع و يضربوا الغداء و الحلة المدنكلة .
و غالبا ما يقترح احد اشقائك على الوالدة غسل الحلة كلكولو حتى لا يبقى لك منها شيئا و لكن الام ذات القلب الحنون تمنع هذه الخطوة و تبقي الحلة بها بعض اثرا من الطبيخ (فاااا) ….
العصيير كده عمك المتمرد بتعصرو ليك جوعة حااارة فبرااحة كده بعصر ضنبو و بدخل المطبخ ومعاها صرة وش كده نظام مافى زول يتكلم معاي وكده .
و يمشي على باقي الحلة القبيل داك يقشو ليك كان بباقي الكسرة واللا (رغيفتن بايتي) ! و فى اللحظة دى بتكون الوالدة عاملة حالة طواري ممنوع الضحك ممنوع دخول المطبخ ممنوع التعليق
فاااا تعرف يا (عب باسط) الحركة العملا الولد الشقي ده ياها حال القحاتة الايامات دي ليس امامهم الا (قعر الحلة) يوم سته ابريل جاء و الجيش حا يمشي كلامو ونحن … غايتو الضحكة بتشرطنا ساي كان غمتناها
صحيفة الانتباهة
