إعادة ضبط ( الضٌباط )

تبيان توفيق الماحي
إعادة ضبط ( الضٌباط )
توضيح بسيييط حول بوست ( الضباط ) بتاع أمس الظاهر ماكتبتوا بالشكل المطلوب وعمل لخبطه حبتين وإختلط الأمر عند البعض
عشان أصحح الفهم حبه حأكتب البوست بي طريقه تانيه !! البلد الآن في حالة حرب وفي مرحله صعبه قبل اليوم ماحصلت منذ الإستقلال يعني أكبر أزمة ممكن الناس تتكلم عنها ياها الحاصله الآن دي ،، وده وقت الحوجه الجد جد للمؤسسات العسكريه ومن خلفه الشعب السوداني !!
في ( بعض ) من الضباط ،، ولمن نقول ضباط مفترض مانعمل فرز لأي مؤسسه سواءً كانت شرطه أو جيش او جهاز كلهم سواا لأنو الضابط ده ضابط يعني زول ليدر يعني زول مسؤول ممكن تتفاوت الجرعات التدريبيه لكن بالتأكيد في مستوى معين متساوي بيناتهم في إستخدام أنواع مختلفه من السلاح وعلى أقل تقدير ممكن يكون نوع أربعه خمسه من أنواع السلاح معلوم لكل ( ضابط ) أي كان عمل الضابط ده !! طيب ؟
في ضباط من بدت الحرب دي مرقو الولايات وبعضهم مرقوا بره السودان مرافقين لأهلهم أو من نفسهم أو أي سبب تاني وفي بعض ماعندوا حُجه أصلا وفضلوا لي تاريخ اليوم ده بعيدين من الحاصل في الخرطوم ده وقاعدين يعاينوا لي دفعاتهم وزملائهم في الميديا وهُم في الميدان وأنا كلامي ده ماساي ولا من فراغ لأنو في منطقتي ( بُتري ) في شباب ضباط وصلوا من الخرطوم بعد أسبوعين ثلاثه من الحرب وللآن مارجعوا ومن خلال تعاليق البوست الفات عرفت إنو في حزء منهم سافروا بره السودان وهنا نقطه الخلاف ،،
الضباط المشوا وسلموا نفسهم في الولايات للوحدات المختلفه ديل ممكن نقول عليهم أدوا الواجب العليهم لكن من الضروري إنو يتم ترحيلهم للخرطوم عشان يكونوا مكان عملهم الأساسي مع زملائهم الحاصل عليهم يحصل ليهم سواءً كان إنتصار أو شهاده ده الصاح كده لأنو أصلا مكان عملهم الخرطوم يعني حيكون في حوجه ليهم بالتأكيد!! أما ضباط الشرطه والجهاز فديل أولى من المستنفرين الماعندهم معرفه بالسلاح لأنهم مدربين بمستوى أرفع من الزول العايز يتعلم الكلاش يادوب ،، الولايات عندها ضباط أصلا شغالين فيها من قبل الحرب دي تبدا يعني إذا في حوجه ممكن يتم إختيار جزء من الضباط المشوا الولايات والباقي ترحيل على طول لأرض الميدان ،،
البعض السافروا بره السودان وعملوا حٍميل ودفنوا دقن والقاعدين في بيوتهم بين أهلهم وماسلموا نفسهم لأي وحده ومنتظرين الجيش ينتصر ثم يظهروا فديل ماعندهم حُجه أصلا ومن الضروري جدآ يخلوهم كده لأنو في بعض الضباط خشوا الكليه الحربيه دي من باب الشوفانيه والبرستيج وإكمال الرصه وفي ناس ماكانوا متوقعين إنهم حيشوفوا حرب أصلاً وفي بعض منهم ماشاركوا في حرب قبل اليوم ،، فديل مابيمثلوا الضباط في أي شيء ومابيستحقوها وتاني بكرر مابيستحقوها طالما إنهم خارج السودان وطالما إنهم قاعدين في بيوتهم ماسلموا نفسهم لأي وحده عسكريه قريبه !!
الحاجة المهمه
الجيش السوداني ده لازم يستفيد من الحرب دي ويعمل تقييم للنياشين الملبوسه دي ويعيد النظر في الكم الهائل من الضباط ده ويعمل ترتيب صفوف ويستفيد من الشباب المستنفرين الأصلهم مواطنين ( مًلكيه ) وماعندهم علاقة بالطلقه والسلاح وبمجرد ما قامت النار مشوا من ضميرهم وسلموا نفسهم للجيش ديل هُم الأولى بإنهم ( يبقوا ضباط ) المستنفرين الشغالين الآن والجايين في الشارع عشان يشتغلوا والموجودين في المعسكرات والعندهم نية يمشوا أي كان إنتمائهم هُم أولى وأحق بإنهم يبقوا جيش السودان وهم أولى بإنهم يبقوا جنود وضباط وضباط صف هُم البيستحقوا يلبسوا الجديان ويلقوا التحيه من كل الشعب السوداني ديل هُم الممكن يحافظوا على مؤسسات البلد سواءً كانت شرطه وجهاز وجيش ديل هُم الممكن يعملو درع بأجسادهم قدام أي غزو لأي حرم مؤسسه ممكن ينتموا ليها ،، عشان كده لازم يتم ضبط ( الضابط ) بكل وحداتهم القاعد في الولايات يمشي الخرطوم بدون تردد ،، القاعد في بيتوا وعامل غمران والسافر بره السودان وعامل حٍميل ومنتظرينها تبرد ديل يتجردوا على طول لو كان فيهم إبن البرهان نفسه !! ماعايزين ضباط حدهم اللبسه والريحه والجزمة النضيفه وساعة تكتم يعملوا العيبه !! إنتهى !!
جندي وضابط الجيش السوداني ياهو الفي الشارع ده ياهو المترس البلد الآن وحارسها بروحة ياهو القاعد في الخنادق ده ومغطي الثغور خلاف كده مطلوب إعادة ضبط آجلاً أو عاجلاً !!
نصر الله جيش السودان !!
إنهاء التمرد واجب وطني !!
لاللتفاوض على أنقاض الوطن !!