منى زكي: مش أنا بس ده ناس كتير يستحقوا

أعربت الفنانة منى زكي عن سعادتها بتكريمها في مهرجان القاهرة للدراما، الذي أقيم حفل افتتاحه منذ بضعة أيام في مدينة العلمين، وذلك عن مسلسل تحت الوصاية الذي نافست به في موسم دراما رمضان 2023.

وقالت منى زكي خلال تصريحات تليفزيونية: كرم كبير والحقيقة مش أنا بس ده ناس كتير يستحقوا، الفضل الأول في الفكرة للكتاب الكبار خالد وشيرين دياب هما الأساس في الورق وكمان الشكل النهائي والصورة بتاعت كل زمايلي نتاج فنان كبير عظيم المخرج محمد شاكر خضير، إحنا شغلتنا عبارة عن عمل جماعي فيه عناصر كتير جدًا مشتركة فيه.

وأضافت منى زكي: إذا كل العناصر معملتش شغلها بحب وضمير أكيد مكنتش هتكون النتيجة كده يمك أنا اللي ظاهرة للناس والحقيقة إن اللي وار الكاميرا مجموعة فنانين وفنيين موهوبين، صناعتنا صناعة مهمة؛ مش لإنه فقط ممكن نقول منها قضايا كبيرة ولكن مجرد رسم ابتسامة ومشاركة إحساس حد فاكر إنه لوحده كل ده بالنسبة لي طوق النجاة في الحياة من وجهة نظري.

وأردفت منى زكي: مش هتكلم على لقب نمبر وان لإنه حاجة متخصنيش، العمل الفني هو عمل جماعي سواء مسرحي أو تليفزيوني أو إعلامي.

أما عن عدم استكمالها العمل في المجال الإعلامي، قالت منى زكي: كنت هبقى حد بتاع يوجا بتاع ميدتيشن أو بعيدة عن المجال ده خالص، دخلت كلية إعلام عشان المجموع، وأنا كنت ابتديت أمثل من قبل ما أدخل الكلية، من زمان خالص، كنت عارفة إني عايزة أكمل في الشغل بتاعي اللي بدأت فيه من وأنا عندي 13 سنة وفي نفس الوقت مش ضامنة هعمل إيه، وكنت عايزة بابا مبسوط ومستريح مش قلقان عليا، فالظروف خلتني بالشكل ده. واختتمت حديثها، قائلة: متشكرة على الحب اللي واصلني بقالي كذا يوم وممتنة لربنا ولباقي مجموعة العمل وللناس.

المصدر: كوش نيوز